Hakaua Tauna Goevadaena Keriso Ita Badinaia

TANOBADA ena lohia idia abidadama henia taudia be nega momo idia lalohisihisi. To, Keriso ena hakaua dalana idia badinaia taudia be idia moale. Iesu ia gwau: “Hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia. Lauegu huaia auna do umui huaia bona lau dekenai diba umui tahua, badina lau be manau bona lalomanada tauna bona goada matamata do umui davaria.” (Mat. 11:​28, 29) Iesu ena hakaua dalana ese ita ia durua bona hagoadaia. Idia hekwarahi bona lalometau taudia be ia ese ia boiridia iena huaia auna idia huaia totona. To, Iesu ena hakaua dalana ita badinaia ena anina be dahaka?

Aposetolo Petero ia gwau: “Keriso danu be umui dainai hisihisi ia abia. Ia be haheitalai namona umui dekenai, unai amo iena aena gabudia ai do umui raka namonamo.” (1 Pet. 2:21) Dahaka dainai unai be mai anina bada? Mani oi laloa: Oi bona ma haida be bomu momo idia guria tanona ai umui raka hanaia gwauraia. To, tau tamona sibona be mai ena diba bona bomu idia noho gabudia ia moia lasi. Oi diba iena aena gabudia oi badinaia be aonega karana. Unai hegeregerena, nega vaira ai ita mauri totona, Iesu ena mauri dalana ita tohotohoa be gau badana. Namona be ia ita kamonai henia bona badinaia, bona iena gwaukau taudia ida ita gaukara hebou.

Ita Kamonai Bona Badinaia

Iesu ena Ororo Harorona dokonai, ia gwau: “Egu hereva idia kamonai bona badinaia taudia ibounai be aonega tauna bamona, iena ruma be nadi badana latanai ia haginia. Bena medu ia diho, abata ranu ia daekau, lai ia toa bona unai ruma ia botaia, to ia moru lasi, badina nadi badana latanai ia haginia.”​—⁠Mat. 7:​24, 25.

Iesu ia gwau iena hereva ia kamonai bona badinaia tauna be “aonega tauna.” Ita be mai eda lalona ibounai ida Keriso ita kamonai henia dainai, ia ita matauraia bona ena sisiba ita laloa bada, a? Eiava ena sisiba haida sibona ita badinaia, to haida ita dadaraia? Iesu ia gwau: “Hanaihanai [Dirava] hamoalea gaudia lau karaia.” (Ioa. 8:29) Namona be ita hekwarahi iena kara ita tohotohoa totona.

Aposetolo taudia be Keriso ena hakaua dalana idia badinaia taudia. Nega ta Petero be Iesu ia hamaoroa: “Ai be gau ibounai ai rakatania bona oi murinai ai raka noho.” (Mar. 10:28) Oibe, aposetolo taudia be Iesu ena hakaua dalana idia laloa bada dainai, mai edia ura bada ida gau ibounai idia rakatania bona ia murinai idia raka.​—⁠Mat. 4:​18-22.

Keriso Ena Gwaukau Taudia ida Ita Gaukara Hebou

Iesu ia do mase lasi neganai, iena hakaua dalana ma ta ia herevalaia. Ia gwau: “Lau ia abia dae tauna ese lau ia siaia tauna danu ia abia dae.” (Ioa. 13:20) Oibe, Iesu ese iena horoa gwaukau taudia ia gwauraidia ena “tadikakana.” (Mat. 25:​40, BH) Iesu ia toreisi lou bona guba dekenai ia daekau murinai, iena “tadikakana” ia abidia hidi iena gabu idia abia totona. Idia ese ma haida idia boiridia Dirava ida maino idia karaia totona. (2 Kor. 5:​18-20) Iesu be iseda hakaua tauna anina be iena “tadikakana” edia hakaua dalana ita badinaia be namo.

To, namona be eda kara ita tahua, Baibel bukadia amo sisiba ita abia neganai ita badinaia, a? Baibel ita stadilaia bona kongrigeisen heboudia ita lao neganai, Keriso ena hereva ita kamonai loulou. (2 Pet. 3:​1, 2) Hanaihanai, Dirava ena Hereva amo sibona ita ubua karana ese ia hahedinaraia ita be iena hereva ita laloa bada. Iseda magasin ese Baibel ena sisiba ta ia herevalaia loulou neganai, iseda lalohadai be dahaka? Unai sisiba do ita badinaia eiava lasi? Hegeregere, Dirava ena Hereva ia gwau Keristani taudia be “Lohiabada lalonai sibona” do idia headava be namo. (1 Kor. 7:39) Lagani 1800 amo ema bona hari unai hakaua herevana be Gima Kohorona magasin ai idia halasia loulou. Keriso ena tadikaka be iseda hetura karana Iehova ida idia laloa bada dainai, buka bona magasin haida amo ita idia durua herevadia idia halasia. Unai bamona hakaua herevadia ita badinaia neganai, ita hahedinaraia eda Hakaua Tauna goevadaena, Iesu Keriso ita badinaia.

Aonega Herevadia 4:18 ia gwau: “Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.” Oibe, Iesu be kongrigeisen ia gunalaia dainai, ia helai kava lasi, to ia be gaukara idauidau ia karaia, iena taunimanima dekenai gau matamatadia momo ia hadibaia bona ia hanamodia. Keriso ena “tadikakana” ita badinaia dalana ma ta be, ‘igui hesiai tauna mai ena kamonai bona kara maoromaoro’ ese diba matamatadia idia halasia neganai, ita abia dae be namo.​—⁠Mat. 24:⁠45.

Keriso ena “tadikakana” ita badinaia dalana ma ta be, Keristani kongrigeisen lalonai idia abia hidi elda taudia ida ita gaukara hebou. Aposetolo Paulo ia gwau: “Umui idia hakaua taudia do umui kamonai henia, bona idia henunai do umui noho, badina idia ese umui idia naria noho.” (Heb. 13:17) Hegeregere, elda ta ese ita ia hagoadaia Ruma Bese Ena Tomadiho ita karaia totona, eiava iseda haroro gaukara ita hanamoa dalana ta ia herevalaia. Loaloa naria tauna ese Baibel amo ita ia sisiba henia eda Keristani karana ta ita hanamoa totona. Bema mai lalona ibounai ida edia sisiba ita badinaia, ita hahedinaraia eda Hakaua Tauna, Iesu ita badinaia.

Tanobada ena lohia taudia be taunimanima hakaua namonamo dalana idia diba lasi. To, Keriso be mai ena lalokau ida ita ia hakaua dainai, ita moale! Unai dainai, gau badana be eda Hakaua Tauna ita kamonai henia bona ena gwaukau taudia ida ita gaukara hebou.

[Pictures on page 27]

Abidadama lasi tauna adavaia karana dekenai Baibel ena sisiba oi abia dae, a?