Iehova Ita Abidadama Henia Dainai Ita Gari Lasi
“Lau ese lau boiboi henia neganai, Lohiabada ese lau dekenai ia kamonai henia.”—SAL. 4:3.
1, 2. (a) Davida be dahaka hekwakwanai ia davaria? (b) Edena karoa rua do ita stadilaia?
KING DAVIDA be lagani momo Israela besena ia lohiaia, to hekwakwanai badana ta ia davaria. Ena natuna Abesaloma be sibona king ai ia halaoa, bona Davida be Ierusalema amo ia heau. Danu, ena turana namona ese ia rakatania bona Abesaloma ia badinaia. Davida be mai taitai ida Olive Ororona dekenai ia raka bona ia idia bamoa taudia be momo lasi. Simei, King Saulo ena bese tauna ta ese nadi bona kahu amo Davida ia hodoa bona ia hereva dika henia.—2 Sam. 15:30, 31; 16:5-14.
2 Davida be ena hekwakwanai ese do ia hamasea, a? Lasi, badina ia be Iehova ia abidadama henia tauna. Salamo karoa 3 lalonai, Davida be Abesaloma amo ia heau ena sivarai ia torea. Ia ese Salamo karoa 4 ia torea danu. Unai karoa rua ese idia hahedinaraia Iehova be guriguri ia kamonai bona haerelaia Diravana. (Sal. 3:4; 4:3) Danu, ita idia hadibaia dina bona hanuaboi ai Iehova be ena abidadama hesiai taudia ida ia noho, bona maino bona noho namo ia henidia. (Sal. 3:5; 4:8) Unai dainai, hari Salamo karoa 3 bona 4 ita stadilaia bona do ita itaia, edena dala ai iseda abidadama Dirava dekenai ita hagoadaia diba.
Ita Idia ‘Tuari Henia Taudia be Momo’ Neganai
3. Davida be dahaka hekwakwanai ia davaria?
3 Hesiai tauna ta ese Davida ia hamaoroa: ‘Israela taudia ese Abesaloma idia lalokau henia.’ (2 Sam. 15:13) Abesaloma ena bamodia be momo dainai, Davida ese Dirava ia guriguri henia, ia gwau: “Lohiabada e, lau dekenai idia dagedage taudia be momo herea. Lau dekenai idia tuari henia taudia, be idia momo lao noho. Idia ese lau idia herevalaia noho. Idia gwau, ‘Dirava ese ia do ia durua lasi.’ ” (Sal. 3:1, 2) Israela taudia idia laloa Abesaloma bona ena bamodia edia imana amo Iehova ese Davida do ia hamauria lasi.
4, 5. (a) Davida ia diba momokani Dirava be dahaka do ia karaia? (b) Inai hereva “oi ese egu kwarana oi abia isi” ena anina be dahaka?
4 To Davida be ia gari lasi badina Dirava ia abidadama henia. Ia gwau: “To Lohiabada e, oi ese [kesi bamona, BHğ] dika dekena amo lau oi gimaia noho. Oi ese kwalimu lau dekenai oi henia noho. Oi ese egu [kwarana oi abia isi, BHğ].” (Sal. 3:3) Davida ia diba Iehova ese ia do ia gimaia, kesi ese tuari tauna ia gimaia bamona. Madi, King Davida be ia buruka vadaeni, to Abesaloma ena kara dainai ia heau, bona mai hemarai ida kwarana ia atoa diho bona dabua amo ia koua. To, Atai Momokani Diravana ese ia dekenai kwalimu do ia henia bona ena king dagina do ia henia lou danu. Iehova ese do ia durua ia gini tore totona, bona ena kwarana do ia abia isi lou. Davida ia guriguri neganai, ia diba momokani Dirava ese do ia haere henia. Davida bamona, oi be Iehova oi abidadama henia, a?
5 Davida ese inai hereva “oi ese egu kwarana oi abia isi” ia gwauraia neganai, ia be Iehova amo do ia abia heduruna ia herevalaia. Baibel ta (Today’s English Version) ia gwau: “To oi, LOHIABADA E, dika amo lau oi gimaia; lau dekenai kwalimu oi henia bona egu lalona oi hagoadaia lou.” Buka ta ese inai hereva “oi ese egu kwarana oi abia isi” ena anina ia herevalaia, ia gwau: “Dirava ese ta ena ‘kwarana’ ia abia isi ena anina be, unai tauna dekenai helaro bona goada ia henia.” Abesaloma ese Davida be ena terona amo ia lulua dainai, Davida ia daradoko. To, Dirava ese ena ‘kwarana ia abia isi’ neganai, Davida ia goada, ia gari lasi bona Dirava ia abidadama henia lou.
‘Iehova ese Lau Do Ia Haere Henia!’
6. Dahaka dainai Davida ia gwau Iehova be ena ororo helagana amo iena guriguri do ia haerelaia?
6 Davida be Iehova ia abidadama henia momokani dainai, ia gwau: “Lohiabada dekenai durua totona lau boiboi noho, bona iena ororo helagana dekena amo, lau dekenai ia haere henia.” (Sal. 3:4) Taravatu Mauana, Dirava be edia huanai ia noho ia laulaulaia gauna be Davida ena oda hegeregerena Siona Ororona dekenai idia abia lao. (2 Samuela 15:23-25 duahia.) Unai dainai, Davida ia gwau Iehova be ena ororo helagana amo iena guriguri do ia haerelaia.
7. Dahaka dainai Davida be gabeai do idia vara gaudia ia laloa momo lasi?
7 Davida ia diba momokani Dirava ese ena guriguri do ia haerelaia, unai dainai gabeai do idia vara dika ia laloa momo lasi. Ia gwau: “Lau hekure, lau mahuta, bona lau noga lou, bona hanuaboi ena negana ibounai, Lohiabada ese lau ia naria noho.” (Sal. 3:5) Hanuaboi ai ia mahuta neganai, ia be ena inai taudia dainai ia gari lasi. Ia diba do ia noga, badina guna ia dekenai idia vara gaudia amo ia diba momokani Dirava ese ia do ia durua noho. “Lohiabada ena dala” ita badinaia bona rakatania lasi neganai, Iehova ese ita do ia durua danu.—2 Samuela 22:21, 22 duahia.
8. Edena dala ai Salamo 27:1-4 ena hereva amo ita diba Davida be Dirava ia abidadama henia?
8 Davida ese ia torea anedia ese idia hahedinaraia, Dirava ia abidadama henia momokani dainai ia gari lasi. Ia gwau: “Lohiabada be lauegu diari, ma ia ese lau ia hamauria noho. Daika dekenai do lau gari? Lohiabada ese mase gaudia ibounai dekena amo, lau ia gimaia noho. Daika garina do lau gari? . . . Sedira tuari taudia momo ese lau do idia hagegea, to lau be lau gari lasi. . . . Gau tamona sibona Lohiabada dekena amo do lau noinoi, unai gau sibona do lau tahua. Lau ura Lohiabada ena Dubu lalonai do lau noho, egu mauri dinadia ibounai. Vadaeni Lohiabada ena namo do lau laloa, bona iena aonega do lau tahua.” (Sal. 27:1-4) Bema oi be Davida bamona oi laloa, bona gau ta ese oi ia koua lasi, vadaeni nega ibounai kongrigeisen heboudia dekenai Iehova idia tomadiho henia taudia oi bamoa be namo.—Heb. 10:23-25.
9, 10. Ena be Salamo 3:6, 7 be Davida ese ia torea, to dahaka dainai ita gwau diba, Davida ia ura lasi haida edia dika davana ia haloua?
9 Ena be Davida be Abesaloma ena koikoi karana bona ma haida ese ia idia rakatania dainai ia lalohisihisi, to ia gwau: “Taunimanima 1000, 1000 dekenai lau gari lasi. Egu kahana kahana dekena amo, lau dekenai idia tuari henia noho, to lau gari henidia lasi. Lohiabada e, lau dekenai do oi mai. Egu Dirava e, lau do oi hamauria. Lau dekenai idia tuari henia taudia, edia [aukina do oi paisia bona kara dika taudia edia isena do oi hamakohia, BHğ].”—Sal. 3:6, 7.
10 Davida ia ura lasi haida edia dika davana ia haloua. Badina ia diba Dirava ese ena inai taudia edia ‘aukina do ia paisia.’ King Davida sibona ese Taravatu ena kopi ta ia torea dainai ia diba Iehova ia gwau, ia “ese dika ena davana do ia henia, bona namo ena davana danu.” (Deu. 17:14, 15, 18; 32:35) Danu, Dirava sibona ese ‘kara dika taudia edia isena do ia hamakohia.’ Unai ena anina be idia be goada lasi Davida idia hadikaia totona. Iehova be kara dika taudia ia diba, badina edia “kudouna ia itaia” diba. (1 Sam. 16:7) Ita moale badina Dirava ese ita dekenai abidadama bona goada ia henia, unai amo Satani ena hahetoho idauidau ita dadaraia diba. Ia be ia boiboi bada isena lasi laiona ta bamona, kahirakahira guri dobu masemasena lalonai do idia negea diho, bona do idia hamasea!—1 Pet. 5:8, 9; Apok. 20:1, 2, 7-10.
‘Lohiabada Sibona ese Ita Ia Hamauria Diba’
11. Dahaka dainai iseda tadikaka taihu totona ita guriguri be namo?
11 Davida ia laloparara Iehova sibona ese ia ia hamauria diba. To, sibona ena namo ia laloa lasi. Ia be Iehova ena taunimanima ia laloa danu, unai dainai ena ane dokonai, ia gwau: “Lohiabada e, oi sibona ese ai oi hamauria diba. Oi ese oiemu bese taudia oi hanamoa noho.” (Sal. 3:8) Momokani, Davida be hekwakwanai badadia ia davaria, to Iehova ena taunimanima ia lalodia bona ia diba Dirava ese do ia hanamodia. Ita danu be iseda tadikaka taihu ita lalodia, a? Namona be iseda guriguri lalonai idia ita laloa bona Iehova ita noia idia dekenai lauma helaga do ia henia, unai amo mai gari lasi ida sivarai namona idia harorolaia diba.—Efe. 6:17-20.
12, 13. Abesaloma dekenai dahaka ia vara bona Davida be dahaka ia karaia?
12 Abesaloma be hemarai dalanai ia mase—unai be ita dekenai gau ta ia hadibaia: Dirava ese ia abia hidi taudia, hegeregere Davida, idia matauraia lasi taudia be dika do idia davaria. (Aonega Herevadia 3:31-35 duahia.) Tuari ta ai Abesaloma bona ena tuari taudia idia lusi. Abesaloma be doniki amo ia heau mauri to iena huina be au badana ta ena rigi dekenai ia mogea bona ia hetaudae. Au amo sibona ena huina ia ruhaia diba lasi bona Ioaba ese ia davaria neganai, io toi amo ena kudouna ia gwadaia bona ia mase.—2 Sam. 18:6-17.
13 Davida be ena natuna ena mase sivaraina ia kamonai neganai ia moale, a? Lasi, to ia raka lao raka mai bona mai taitai danu ia gwau: “Natugu Abesaloma o! Natugu Abesaloma o! Bema oiemu gabuna dekenai lau mase be namo! Abesaloma o, natugu, Abesaloma o!” (2 Sam. 18:24-33) Ioaba ena hereva ese Davida ia durua ena taitai ia hadokoa totona. Abesaloma ia ura dikadika ladana bada ia abia dainai ena tamana, Iehova ena abia hidi tauna ia tuari henia. Ia kerere dainai ena mauri ia halusia!—2 Sam. 19:1-8; Aon. 12:21; 24:21, 22.
Davida ese Dirava Ia Abidadama Henia Noho
14. Salamo karoa 4 be daika ese ia torea bona dahaka dainai ia torea?
14 Salamo karoa 4 be karoa 3 hegeregerena. Inai karoa lalonai Davida ena guriguri amo ia hahedinaraia Iehova ia abidadama henia. (Sal. 3:4; 4:3) Reana, Davida be iena king dagina ia abia lou murinai, karoa 4 ia torea badina unai hekwakwanai ia hanaia bona ia ura Dirava ia tanikiu henia. Eiava ia torea ena badina ma ta be Levi taudia ese idia anelaia totona. Herevana ia torea ena badina be dahaka, to unai karoa ita duahia bona laloa dobu neganai, iseda abidadama Iehova dekenai ia hagoadaia diba.
15. Dahaka dainai Iesu ena ladana ai Iehova ita guriguri henia diba?
15 Davida ia hahedinaraia ia be Dirava ia abidadama henia noho, bona ia diba Dirava ese ena guriguri ia kamonai bona do ia haerelaia. Ia gwau: “Egu Dirava e, oiemu kara be maoromaoro. Oi dekenai lau boiboi neganai, lau dekenai oi haere vadaeni. Dika ese lau ia hadikaia vadaeni neganai, oi ese lau oi durua. Hari danu lau dekenai do oi bogahisihisi henia, egu noinoi mani do oi kamonai.” (Sal. 4:1) Bema kara maoromaoro ita badinaia Dirava ese iseda guriguri do ia kamonaia danu. Ita diba Iehova, ‘kara maoromaoro Diravana,’ be iena kara maoromaoro taudia ia hanamodia. Iena Natuna Iesu ena boubou gauna dainai, mai abidadama ida iena ladana ai Dirava ita guriguri henia diba. (Ioa. 3:16, 36) Oibe, guriguri karana ese lalomaino ia havaraia!
16. Dahaka dainai Davida ia lalometau?
16 Nega haida hekwakwanai ta dainai iseda abidadama ia manoka diba. Reana, unai be Davida dekenai ia vara danu, badina ia gwau: “Taunimanima e, egu ladana namona, be do umui hadikaia noho ela bona edena negai? Hereva kavakava do umui ura henia, bona hereva koikoi do umui tahua noho, ela bona edena negai?” (Sal. 4:2) Inai hereva “taunimanima” ia gaukaralaia neganai, ia hahedinaraia idia dekenai ia moale lasi, badina ena inai taudia be “hereva kavakava” idia ura henia. Baibel ta (New International Version) ia gwau: “Lalohadai kavakava bona Dirava koikoidia do umui tahua noho ela bona edena negai?” Ena be ma haida edia kara dainai ita lalometau, to namona be Dirava momokani tamona ita guriguri henia bona ia ita abidadama henia noho.
17. Edena dala ai Salamo 4:3 ita badinaia diba?
17 Inai hereva amo Davida ena abidadama ia hahedinaraia: “Do umui laloa, Lohiabada ese kara maoromaoro taudia, be ia abia hidi vadaeni, iena. Bona lau ese lau boiboi henia neganai, ia ese lau dekenai ia kamonai henia.” (Sal. 4:3) Bema ita ura Iehova ita badinaia, gari lasi karana bona abidadama be mai anina bada. Hegeregere, bema Keristani ruma bese lalonai ta ia helalo-kerehai lasi dainai idia atoa siri, unai kara rua be mai anina bada. Ruma bese taudia ese Dirava bona ena taravatu idia badinaia neganai, do ia hanamodia. Danu, Iehova idia badinaia bona abidadama henia dainai, do idia moale.—Sal. 84:11, 12.
18. Salamo 4:4 hegeregerena, bema ta ese ita ia hereva dika o kara auka henia, dahaka ita karaia be namo?
18 Bema ta ena kara o hereva ese ita ia hahisia, dahaka do ita karaia? Bema Davida ia hereva bamona ita karaia, do ita moale, ia gwau: “Emui badu ia toreisi neganai, do umui kara dika lasi. Emui mahuta gabunai umui noho neganai, emui lalona do umui tahua, bona badu ena laloa do umui koua.” (Sal. 4:4) Bema ta ese ita ia hereva dika henia o ia kara auka henia, namo lasi ena kara ita haloua. (Roma 12:17-19) Iseda mahuta gabuna ai Dirava ita guriguri henia lalonai, iseda lalohisihisi ita gwauraia diba. Unai ita gurigurilaia neganai, lalohadai maorona do ita abia bona lalokau dainai ena kara dika ita gwauatao diba. (1 Pet. 4:8) Aposetolo Paulo ena sisiba be Salamo 4:4 ena hereva bamona. Ia gwau: “Umui badu neganai, umui kara dika lasi. Bona dina ia do diho lasi neganai, emui badu ia ore be namo. Danu, namo lasi Diabolo ena dala umui kehoa.”—Efe. 4:26, 27.
19. Dirava ese iseda hesiai gaukara ia abia dae totona, Salamo 4:5 ese edena dala ai ita ia durua?
19 Davida ia hahedinaraia Dirava abidadama henia karana be mai anina bada. Ia gwau: “Boubou maorodia Lohiabada dekenai do umui henia, bona Lohiabada do umui abidadama henia.” (Sal. 4:5) Israela taudia be badina maorodia dainai boubou gaudia idia henia neganai, Dirava ese edia boubou gaudia ia abia dae. (Isa. 1:11-17) Hari danu, Dirava ese iseda hesiai gaukara ia abia dae totona, badina maorodia dainai ia ita hesiai henia be namo bona mai iseda kudouna ibounai ida ia ita abidadama henia.—Aonega Herevadia 3:5, 6; Heberu 13:15, 16 duahia.
20. ‘Lohiabada ena vairana ena diari’ ena anina be dahaka?
20 Davida ma ia gwau: “Taunimanima momo ese inai bamona idia guriguri noho: ‘Lohiabada e, daika ese ai do ia hanamoa diba? Oiemu vairana ena diari, be mani ai dekenai do oi hedinaraia.’ ” (Sal. 4:6) Inai hereva ‘Lohiabada ena vairana ena diari’ ena anina be Dirava ese Davida ia lalonamo henia. (Sal. 89:15) Unai dainai Davida ena guriguri ai inai hereva, “Oiemu vairana ena diari, be mani ai dekenai do oi hedinaraia,” ena anina be ‘mani ai oi lalonamo henia.’ Iehova ita abidadama henia dainai, iena ura ita karaia neganai, ia ese ita ia lalonamo henia bona do ia moale.
21. Haroro gaukara ita karaia neganai, dahaka hahenamo ita davaria diba?
21 Davida be Dirava amo ia davaria moalena ia herevalaia neganai, ia gwau ia be uiti momo idia davaria taudia edia moale ia hereaia. Iehova dekenai ia gwau: “Oi ese moale bada, be lau dekenai oi henia vadaeni, bona egu moale ese, uiti bona uaina momo idia davaria taudia, edia moale ia hereaia momokani.” (Sal. 4:7) Bema haroro gaukara ita karaia goadagoada, ita diba momokani nega vaira ai do ita moale bada. (Luka 10:2) Danu ita moale badina horoa taudia ese haroro gaukara idia gunalaia dainai, “uiti idia utua bona haboua” taudia edia namba ia bada ia lao noho. (Isa. 9:3) Oi be haroro gaukara oi moalelaia, a?
Dirava Abidadama Henia Bona Gaukara Goada Noho
22. Salamo 4:8 hegeregerena, Israela taudia be Dirava ena Taravatu idia badinaia dainai, dahaka namo idia davaria?
22 Davida ena ane dokonai ia gwau: “Mai egu maino danu, lau hekure bona lau mahuta noho. Lohiabada e, oi sibona ese lau oi naria, bona dika dekena amo lau oi gimaia noho.” (Sal. 4:8) Israela taudia be Iehova ena Taravatu idia badinaia neganai, maino ai idia noho bona idia gari lasi. Hegeregere, Solomona ena lohia negana ai, “Iuda bona Israela taudia be mai maino danu idia noho.” (1 Kin. 4:25) Ena be bese haida ese idia dagedage henidia, to Israela besena be Dirava idia abidadama henia dainai maino ai idia noho. Davida bamona, hanuaboi ai ita mahuta neganai ita gari lasi, badina ita diba Dirava ese ita do ia gimaia.
23. Mai iseda kudouna ibounai ida Iehova ita abidadama henia ena namo be dahaka?
23 Namona be Iehova ena hesiai gaukara ita karaia goadagoada. Danu mai abidadama ida Dirava ita guriguri henia neganai, “Dirava ena maino, laloparara ibounai ia hereaia gauna” do ita abia. (Fili. 4:6, 7) Unai ese ita dekenai moale ia havaraia! Bema mai iseda kudouna ibounai ida Iehova ita abidadama henia noho, mai gari lasi ida nega vaira ita naria noho diba.
Edena Bamona Do Oi Haere?
• Davida be dahaka hekwakwanai ia davaria?
• Edena dala ai Salamo karoa 3 ese ita ia durua ita gari lasi totona?
• Edena dala ai Salamo karoa 4 ese ita ia durua Dirava ita abidadama henia totona?
• Dirava ita abidadama henia ena namo be dahaka?
[Picture on page 29]
Ena be Davida be Abesaloma amo ia heau, to Iehova ia abidadama henia noho
[Pictures on page 32]
Mai emu kudouna ibounai ida Iehova oi abidadama henia, a?