Natudia​—⁠Dirava Idia Dibaia be Namo, A?

“Tomadiho be mai ena siahu inai henia karana ia havaraia, to ia be siahu lasi lalokau karana ia havaraia totona.”​—⁠JONATHAN SWIFT, ENGLISH AUTHOR.

SWIFT be lagani 1800 murinai unai hereva ia gwauraia, to hari momo ese ena hereva idia abia dae. To haida idia laloa, tama sina be maoro lasi natudia dekenai Dirava idia hadibaia totona. Idia laloa tomadiho idia goadalaia ruma besedia lalonai idia bada natudia be gau haida idia reaia.

Dahaka oi laloa? Henunai idia noho herevadia amo, edena be lalohadai maorona?

● Tama sina be maoro lasi natudia dekenai Dirava idia hadibaia totona.

● Tama sina idia naria ela bona natudia idia bada murinai, tomadiho gaudia idia herevalaia.

● Natudia idia maragi neganai, tama sina ese Dirava abidadama henia karana be natudia idia hadibaia. To idia bada daekau lalonai, namona be idia hagoadaia unai gaudia idia laloa namonamo totona.

● Natudia be tama sina ese idia abia dae gaudia idia badinaia sibona be namo.

Tomadiho ese Natudia Ia Hadikaia, A?

Lalokau tama sina idia ura lasi edia natuna idia hahisia. Haida ese natudia idia koua Dirava idia dibaia lasi totona, to hamomokania gaudia ese edia hereva ia durua, a? Lagani momo lalodiai, tahua gaukara idia karaia taudia be tama sina edia tomadiho karadia idia stadilaia, unai ese natudia ia durua o lasi. Unai stadi amo dahaka idia davaria?

Tahua gaukara idia karaia taudia idia davaria, tomadiho ese natuna ia hadikaia lasi, to ena tubu daekau dalana ia durua. Lagani 2008 ai, buka ta (Social Science Researcha) ia gwau: “Tomadiho ese tama sina bona natudia huanai hetura karana ia hagoadaia.” Unai buka ma ia gwau: “Tomadiho be mai anina bada natudia momo edia mauri lalonai, bona ruma bese lalonai danu.” Unai hereva be Iesu Keriso ena hereva ida ia hegeregere, ia gwau: “Dirava dibaia totona idia hitolo taudia be idia moale.”​—⁠Mataio 5:⁠3.

Tama sina idia naria ela bona natudia idia bada, bena idia dekenai Dirava bona tomadiho idia hadibaia, a? Lasi. Baketi lalonai gau ta ia noho lasi hegeregerena, natudia edia lalona danu be unai bamona. Unai dainai, tama sina ese unai ‘baketi’​—⁠edia lalona unai​—⁠be kara maoromaoro taravatudia amo idia hahonua. Eiava idia rakatania bona tanobada ena lalohadai idauidau ese edia lalona ia hahonua.

Edena Dala ai Natudia Idia Kwalimu?

Histori ese ia hamomokania, tomadiho ese lalodika bona inai heheni karadia ia havaraia. Jonathan Swift ia gwauraia herevana be natudia dekenai ia guguru lasi totona, tama sina ese dahaka idia karaia be namo? Edena dala ai edia natudia idia hadibaia ma haida idia lalokau henia totona?

Inai henanadai toi amo unai hereva ena anina do ita dibaia: (1) Natudia ese dahaka idia dibaia be namo? (2) Daika ese ia hadibadia be namo? (3) Edena hadibaia dalana ese anina namona ia havaraia?

[Footnote]