Natudia—Dahaka Idia Dibaia be Namo?
“Toretore Helagadia be Dirava ena hahekau henunai idia torea, bona ia be mai ena namo hadibaia totona, sisiba henia totona, gau idauidau hamaoromaoroa totona, bona kara maoromaoro ai matahakani henia totona.”—2 TIMOTEO 3:16.
NATUDIA ese Dirava ena hereva momokani idia dibaia be namo. Edeseniai unai idia dibaia? Tanobada hegegemadai, taunimanima momo ese idia matauraia bukana, Baibel, amo do idia dibaia.
Baibel be Dirava amo ia mai revarevana ta bamona. Unai revareva lalonai, Dirava ese matamata bona buruka taudia ibounai dekenai ena kara bona taravatu maoromaorodia ia hahedinaraia. Baibel ena hadibaia herevadia amo natudia ese do idia dibaia gaudia haida mani ita itaia.
Dirava ia ura ia dekenai dahaka ita diba?
▪ Baibel ena hereva: “Do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”—Salamo 83:18.
Ita Dibaia Gauna: Dirava be siahu ta sibona lasi, to Ia noho momokani bona ia be mai ena ladana.
▪ Baibel ena hereva: “Dirava ese iseda laloa ibounai bona iseda ura ibounai ia diba. Bema oi ese Lohiabada oi tahua, ia ese oi do ia abia dae.”—1 Sivarai 28:9.
Ita Dibaia Gauna: Iehova Dirava be ita ibounai ia laloa, natudia maragidia danu. (Salamo 10:14, BHğ; 146:9) Ia ura ia do ita dibaia.
▪ Baibel ena hereva: “Tamana sinana lasi maragina ta dekenai hisihisi do umui henia lasi. Bema hisihisi umui henidia, vadaeni lau dekenai idia tai, be momokani edia tai do lau kamonai.”—Esodo 22:22-24.
Ita Dibaia Gauna: Iehova ese natuna maragidia edia guriguri ia kamonai danu. Nega ibounai Dirava ita hereva henia bona Ia dekenai iseda lalohadai bona hemami ibounai ita gwauraia hedinarai diba.
▪ Baibel ena hereva: ‘Dirava ena bogahisihisi idia tohoa lou, tohoa lou, bona idia ese Israela edia Helaga Diravana ena lalona idia hahisia.’—Salamo 78:41.
Ita Dibaia Gauna: Iseda hereva bona kara amo Iehova ena hemami ita hanamoa eiava hadikaia diba, unai dainai gau ta ita do herevalaia o karaia lasi neganai, ita laloa namonamo guna.
Ita amo idia idau taudia be edena bamona ita kara henidia?
▪ Baibel ena hereva: “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.”—Kara 10:34, 35.
Ita Dibaia Gauna: Bema Dirava ese taunimanima idauidau ia abia dae, vadaeni ita danu ese idia ita abia dae, herevana edia kopina kala eiava vairana toana be iseda amo idia idau.
▪ Baibel ena hereva: “Nega ibounai do umui noho hegaegae, emui helaro dainai idia henanadai taudia ibounai umui haere henia totona, to mai manau bona hemataurai bada ida unai do umui karaia.”—1 Petero 3:15.
Ita Dibaia Gauna: Tomadiho ita herevalaia neganai, namona be mai lalogoada bona manau ida eda lalohadai ita gwauraia. Danu, namona be tomadiho haida idia abia dae gaudia ita matauraia.
Edena bamona iseda ruma bese taudia ita kara henia?
▪ Baibel ena hereva: “Natudia e, gau ibounai dekenai emui tama sina do umui kamonai henia, badina Lohiabada ese unai ia moalelaia.”—Kolose 3:20.
Ita Dibaia Gauna: Kamonai natudia idia hahedinaraia, edia tama sina idia lalokau henia sibona lasi, to idia ura Dirava idia hamoalea danu.
▪ Baibel ena hereva: ‘Bema ta be badina ta dainai ma ta dekenai ia maumau, ta ta emui kara umui haheaukalaia bona mai kudouna ibounai ida umui gwauatao heheni. Iehova ese mai kudouna ibounai ida umui ia gwauatao hegeregerena.’—Kolose 3:13.
Ita Dibaia Gauna: Taunimanima ma haida o ruma bese taudia ese nega haida eda lalona idia hahisia. To bema ita ura Dirava ese eda dika ia gwauatao, vadaeni ma haida edia dika ita gwauatao.—Mataio 6:14, 15.
Kara momokani bona hebogahisi ena badina
▪ Baibel ena hereva: ‘Koikoi karana umui atoa siri dainai, emui dekena tauna dekenai hereva momokani do umui gwauraia.’—Efeso 4:25.
Ita Dibaia Gauna: Hereva momokani gwauraia karana amo, Dirava ita tohotohoa bona hamoalea. Bema hereva koikoi gwauraia karana ita manadalaia, ita be Diabolo bamona ai do ita lao, ia be “koikoi ena tamana.”—Ioane 8:44; Tito 1:2.
▪ Baibel ena hereva: “Taunimanima ese umui dekenai idia karaia hegeregerena, idia dekenai danu unai bamona do umui karaia.”—Mataio 7:12.
Ita Dibaia Gauna: Eda ruma bese bona dekena taudia edia hemami, lalohadai, bona ura gaudia ita laloa be gau badana. Unai amo, idia danu ese dala namonai ita do idia kara henia.—1 Petero 3:8; Luka 6:38.
Ita duahia vadaeni haheitalai ese idia hahedinaraia, Baibel ai ita dibaia gaudia ese natudia ia durua tanikiu karana, hemataurai, bona hebogahisi karadia idia hahedinaraia totona. To, daidia ese natudia dekenai unai gaudia do idia hadibaia?