“Lalogoada Ibounai Ia Henia Diravana” Abidadama Henia
“Iseda Lohiabada Iesu Keriso ena Dirava bona Tamana do ita hanamoa. Ia be hebogahisi Tamana bona lalogoada ibounai ia henia Diravana.”—2 KOR. 1:3.
1. Taunimanima ibounai be dahaka idia ura?
EDA sinana ese ita ia havaraia negana amo, ta ese ita ia durua bona naria. Beibi ta ia tai neganai, ia hahedinaraia ia ura sinana ese ia durua, reana ia rosia o ia ubua be namo. Taunimanima badadia be unai bamona danu, hekwakwanai idia davaria neganai, idia ura ta ese idia ia durua o hagoadaia.
2. Iehova be ia idia abidadama henia taudia dekenai dahaka ia gwauhamatalaia?
2 Iseda ruma bese bona turadia ese ita idia hagoadaia diba. To, ita davaria hekwakwanai haida idia hanamoa diba lasi. Unai bamona negadiai Dirava sibona ese ita ia durua diba. Baibel ia gwau: “Lohiabada be ia dekenai idia boiboi taudia dekenai ia noho. . . . Edia taitai ia kamonai, bona ia ese idia ia hamauria noho.” (Sal. 145:18, 19) Baibel ma ia gwau, “Lohiabada ese kara maoromaoro taudia ia naria noho. Edia taitai be ia ese ia kamonai henia noho.” (Sal. 34:15) To, bema ita ura Dirava ese ita ia durua, namona be ia ita abidadama henia. Davida ia gwau: “Tau dikadia ese idia dagedage henia taudia, be Lohiabada ese do ia bogahisihisi henia. Ia be edia heau mauri gabuna momokani, dika ia ginidae neganai. Lohiabada e, oiemu ladana idia diba taudia ese, oi do idia abidadama henia. Oi dekenai idia mai taudia, be oi ese idia do oi rakatania lasi, lasi momokani.”—Sal. 9:9, 10.
3. Edena haheitalai amo Iesu ia hahedinaraia Iehova be ita ia lalokau henia?
3 Iehova be ia idia tomadiho henia taudia ta ta ia lalodia bada. Iesu ia gwau: “Manu maragidia 5 be koini rua dekenai idia hoihoilaia, ani? To idia ta be Dirava ese ia laloaboio lasi. Ia be emui kwarana huina ibounai ia duahia vadaeni. Umui gari lasi, umui ese manu maragidia ibounai umui hereaia.” (Luka 12:6, 7) Danu, Iehova ese Israela taudia ia hamaoroa: “Nega ibounai lau ese umui lau ura henia vadaeni, bona inai noho hanaihanai lalokau be umui dekenai do lau henia noho, doko lasi.”—Ier. 31:3.
4. Dahaka dainai Iehova ena gwauhamata ita abidadama henidia diba?
4 Ita lalometau neganai, Iehova bona ena gwauhamata namodia ita abidadama henia, unai ese iseda lalona ia hagoadaia diba. Iosua bamona, Dirava ita abidadama henia be gau badana. Ia gwau: “Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Ios. 23:14) Hari inai negai, hekwakwanai momo dainai ita lalometau neganai, ita diba momokani “Dirava be ena hereva ia badinaia” bona ena hesiai taudia do ia rakatania lasi.—1 Korinto 10:13 duahia.
5. Dahaka dainai ita ese ma haida ita hagoadaia diba?
5 Aposetolo Paulo ia gwau Iehova be “lalogoada ibounai ia henia Diravana.” Ma ta hagoadaia anina be ia lalohisihisi tauna ena lalona ita hanamoa o hamoalea. Iehova be lalohisihisi tauna dekenai lalogoada ia henia. (2 Korinto 1:3, 4 duahia.) Oibe, iseda guba Tamana ia ura karaia gauna be gau ta o tau ta ese ia koua diba lasi. Unai dainai, ia idia lalokau henia taudia be dala idauidau ai ia hagoadaia diba. Danu, Dirava ese ita dekenai lalogoada ia henia dainai, “hisihisi idauidau” idia davaria tadikaka taihu ita durua bona hagoadaia diba. Oibe, Iehova sibona ia hegeregere ita ia hagoadaia totona!
Ita Lalohisihisi Ena Badina
6. Dahaka gaudia dainai taunimanima idia lalohisihisi?
6 Iseda mauri lalonai hekwakwanai momo idia vara. Hegeregere, iseda lalokau tauna ta, reana tau, hahine o natu ta ia mase neganai, unai be lalohisihisi gauna badana. Haida be edia bese ese idia luludia dainai idia lalohisihisi. Danu, hekwakwanai ma haida hegeregere gorere, buruka, ogogami, headava lalonai hekwakwanai idia vara, bona raskol karadia dainai ita lalohisihisi. Unai dainai, ita hahegoada heheni be gau badana.
7. (a) Metau negadiai daika ese ita ia durua diba? (b) Edena dala ai Iehova ese “lalohisihisi” tauna ia durua?
7 Nega aukadia ai, ita be dala idauidau ai hisihisi ita mamia. Nega haida unai ese eda kudouna, lalona, bona hemami ia hadikaia, ita ia hagorerea eiava eda abidadama ia hamanokaia diba. Baibel ia gwau, “tau ta be iena kara dika dainai ia lalohisihisi momokani.” (Sal. 51:17) To, Iehova ese ita ia durua diba, badina Baibel ia gwau: “Edia kudoudia idia makohia taudia, be Lohiabada ese ia hagoadaia lou noho, bona edia bero ia kumia noho.” (Sal. 147:3) Oibe, metau negadiai bema Dirava ita guriguri henia, ia ita abidadama henia, bona ena taravatu ita badinaia, goada do ia henia iseda metau ita haheaukalaia totona.—1 Ioane 3:19-22; 5:14, 15 duahia.
8. Ita lalohekwarahi neganai, Iehova be edena dala ai ita ia durua diba?
8 Hahetoho idauidau ita davaria neganai ita lalohewarahi, unai dainai ta ese ita ia hagoadaia be namo. Salamo 94:19 ia gwau: “Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.” Danu, Paulo ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia, Keriso Iesu amo.” (Fili. 4:6, 7) Bema ita lalohekwarahi, namona be Baibel ita duahia bona ena hereva ita laloa dobu, unai ese ita ia hagoadaia diba.—2 Tim. 3:15-17.
9. Lalohadai kereredia ita abia neganai, dahaka ese ita ia durua diba?
9 Nega haida badina haida dainai lalohadai kereredia ita abia bona ita lalomanoka. Reana ita laloa ita be hegeregere lasi ruma bese ena maduna o kongrigeisen lalonai hesiai gaukara ita karaia totona. Iehova ese ita ia hagoadaia bona durua diba. Hegeregere, Iehova ese Iosua ia hamaoroa Israela taudia do ia hakaua bona bese goadadia do idia tuari henia. Mose ese Israela taudia ia hamaoroa: “Do umui goada, emui lalona do umui ha-aukaia, bona idia dekenai do umui gari henia lasi. Badina be Lohiabada, emui Dirava ese umui dekenai do ia noho. Ia ese umui do ia negea lasi, ia ese umui do ia rakatania lasi.” (Deu. 31:6) Iehova ese Iosua ia durua dainai, Israela taudia be gwauhamata tanona ai ia hakaudia vareai bona edia inai taudia ibounai idia halusia. Guna, Davara Kakakakana dekenai Dirava ese Mose ia durua danu.—Eso. 14:13, 14, 29-31.
10. Bema ita laloa momo dainai ita gorere, dahaka ita karaia diba?
10 Hekwakwanai ta ita laloa momo neganai, unai ese ita ia hagorerea diba. To bema ita aniani namonamo, ita laga-ani, wiki ta ta ita eksasais, eda tauanina bona ruma idia goeva, unai ese iseda tauanina ia hagoadaia bona do ita moale danu. Danu, Baibel ena gwauhamata vaira negana totona ita lalodia neganai, unai ese iseda lalona ia hamoalea diba. Bema hahetoho o hekwakwanai ta ita davaria, namona be Paulo ita laloa. Ia danu be hisihisi momo ia davaria to inai hahegoada herevana ia torea, ia gwau: “Kahana ibounai amo metau idauidau ese ai idia koua noho, to ai idia koua momokani lasi, ai laloa daradara, to hanaia dalana ia noho. Ai idia dagedage henia, to Dirava ese ai ia rakatania lasi, hisihisi idauidau ese ai idia hametaua, to ai idia hadikaia ore lasi.”—2 Kor. 4:8, 9.
11. Bema ita mamia iseda abidadama ia manoka ia lao, dahaka ita karaia be namo?
11 Hekwakwanai haida ese iseda abidadama ia hamanokaia diba. To, Iehova ese ita ia durua diba. Baibel ese ita ia hagoadaia, ia gwau: “Hisihisi idia abia noho taudia, be Lohiabada ese ia durua noho, bona dagedage taudia ese tau haida idia hahisia neganai, Lohiabada ese unai hisihisi taudia ia abia isi noho.” (Sal. 145:14) Bema ita mamia eda abidadama be ia manoka ia lao, namona be elda taudia dekenai ita lao edia heduru ita abia totona. (Iam. 5:14, 15) Hekwakwanai ta ita davaria neganai, mauri hanaihanai helarona laloa loulou karana ese iseda abidadama ia hagoadaia diba.—Ioa. 17:3.
Dirava ese Ia Hagoadaia Taudia
12. Edena dala ai Iehova ese Aberahamo ia hagoadaia?
12 Salamo 119 ia torea tauna ese Iehova ia hamaoroa: “Lohiabada e, lau, oiemu hesiai tauna dekenai oi henia gwauhamata, be mani do oi laloatao. Inai gwauhamata lau abidadama henia dainai, egu lalona ia moale. Hisihisi ese lau ia abia neganai goada lau davaria lou, badina oiemu gwauhamata ese, mauri matamata lau dekenai ia henia.” (Sal. 119:49, 50) Baibel lalonai Dirava ese ia hagoadaia taudia edia sivarai momo ita duahia diba. Hegeregere, Aberahamo ia kamonai Iehova be Sodom bona Gomora do ia hadikaia neganai, ia lalohekwarahi bada. Dirava ia nanadaia: “Momokani, oi ese kara maoromaoro bona kara dika taudia danu nega tamona do oi alaia ore?” Iehova ese ia hamaoroa bema kara maoromaoro taudia 50 ia davaria, Sodoma do ia hadikaia lasi. To, Aberahamo be nega faiv Iehova ia nanadaia: To bema kara maoromaoro taudia 45 eiava 40, 30, 20, 10 idia noho be edena bamona? Iehova be mai manau ida Aberahamo ia gwauhamata henia, bema kara maoromaoro taudia ten sibona idia noho, unai hanua do ia hadikaia lasi. Ita diba kara maoromaoro taudia ten idia noho lasi, to Iehova ese Lota bona ena natuna kekeni rua ia hamauridia.—Gen. 18:22-32; 19:15, 16, 26.
13. Edena dala ai Hana ia hahedinaraia ia be Iehova ia abidadama henia?
13 Elikana ena adavana Hana ia ura dikaka natuna ta ia havaraia, to ia gabani dainai ia lalohisihisi bada. Iehova ia guriguri henia bona Hahelaga Tauna Badana Eli ese ia hamaoroa: “Israela ena Dirava ese oiemu noinoi gauna oi dekenai do ia henia.” Unai hereva ese Hana ena lalona ia hagoadaia “bona iena lalohisihisi ia ore.” (1 Sam. 1:8, 17, 18) Hana ia abia dae Iehova be ena lalohekwarahi gauna ia diba bona do ia durua. Ena be ia diba lasi dahaka do ia vara, to unai ia laloa momo lasi. Gabeai, Iehova ese iena guriguri ia haerelaia. Ia rogorogo bona natuna mero ta ia havaraia, bona ena ladana ia atoa Samuela.—1 Sam. 1:20.
14. Dahaka dainai ta ese Davida ia hagoadaia be namo? Davida be daika ena heduru ia noia?
14 King Davida be Dirava ese ia hagoadaia tauna ma ta. Iehova be taunimanima edia “kudouna ia itaia.” Unai dainai Israela ena king ai ia halaoa gwauraia neganai, ia diba Davida be kara maoromaoro bona tomadiho momokani ia ura henia tauna. (1 Sam. 16:7; 2 Sam. 5:10) To gabeai, Davida be Bataseba ida ia heudahanai bona ena kara dika ia hunia totona Bataseba ena adavana ia alaia. Natana ese Davida ia durua bona ia laloparara ia be kara dika badana ia karaia neganai, Iehova ia guriguri henia, ia gwau: “Oiemu bogahisihisi bada herea dainai, egu kara dika do oi kokia ore. Egu dika mani do oi huria ore, bona egu kerere dekena amo lau do oi hagoevaia. Badina be egu kara dika be lau diba momokani. Lauegu kerere be egu vairana dekenai ia noho nega ibounai.” (Sal. 51:1-3) Ena be Davida ia helalo-kerehai bona Iehova ese ena dika ia gwauatao, to ena kara dika dainai hekwakwanai momo ia davaria. (2 Sam. 12:9-12) Oibe, unai nega ai Iehova ese Davida ia hagoadaia.
15. Iehova ese edena dala ai Iesu hagoadaia?
15 Iesu be tanobada ai ia noho neganai, hekwakwanai momo ia davaria. Ena be Dirava ese unai hekwakwanai ia koudia lasi, to Iesu be ena Tamana ia badinaia noho. Ia be goevadae tauna to nega ibounai Iehova ia abidadama henia bona ia kamonai henia. Idia dogoatao bona hamasea gwauraia neganai, iena Tamana ia guriguri henia, ia gwau: “Egu ura lasi, oiemu ura do ia vara be namo.” Bena aneru ta ia hedinarai bona Iesu ia hagoadaia. (Luka 22:42, 43) Oibe, unai nega ai Dirava ese Iesu ia durua bona ia hagoadaia.
16. Iehova ese edena dala ai ita ia durua diba?
16 Iehova ita tomadiho henia dainai, reana iseda mauri ita haboioa diba, to ita do ia durua ia ita badinaia noho totona. Ma danu toreisi lou helarona ese ita ia hagoadaia. Ita moale badina kahirakahira “mase, iseda inai tauna ginigabena unai, be do ia ore momokani”! (1 Kor. 15:26) Iehova idia badinaia ela bona idia mase taudia bona ma haida be ia ese ia lalodiatao bona do ia hatoredia isi lou. (Ioa. 5:28, 29; Kara 24:15) Toreisi lou helarona ita abidadama henia dainai, dagedage negadiai unai ese ita ia hagoadaia.
17. Iseda lalokau tauna ta ia mase neganai, Iehova be edena dala ai ita ia hagoadaia?
17 Ita diba iseda lalokau taudia, idia mase vadaeni, be tanobada matamatana ai do idia toreisi lou. Unai helaro ese ita ia hagoadaia. Unai nega ai, hisihisi ibounai be do idia ore momokani. Bona inai tanobada ena dokona amo do idia roho mauri “hutuma bada” taudia be toreisi lou taudia do idia welkam henidia bona hadibadia. Unai be hahenamo badana!—Apok. 7:9, 10.
Iehova be Hanaihanai Ita Do Ia Durua
18, 19. Dirava ena hesiai taudia be dagedage idia davaria neganai, edena dala ai ia durudia?
18 Mose ese ia torea ane namona ta ese Israela taudia edia lalona ia hagoadaia, ia gwau: “Dirava ese nega ibounai umui ia gimaia noho. Iena noho hanaihanai imadia ese umui idia hagoadaia noho.” (Deu. 33:27) Gabeai peroveta tauna Samuela ese Israela taudia ia hamaoroa: “Lohiabada dekena amo do umui raka siri lasi. Lohiabada ena hesiai gaukara do umui karaia, mai emui kudouna ibounai. . . . Lohiabada ese gwauhamata metauna ia karaia vadaeni, ia ese umui do ia rakatania lasi, badina ia ura umui be iena bese korikori umui do ia halaoa.” (1 Sam. 12:20-22) Bema Iehova ita tomadiho henia noho ita do ia rakatania lasi. Ia ese hanaihanai ita do ia durua.
19 Inai nega dokona ai Dirava ena taunimanima be metau dikadia momo idia davaria noho, to ia be hanaihanai idia ia durua bona hagoadaia. Tanobada hegegemadai iseda tomadiho karana dainai, iseda tadikaka momo be inai taudia ese idia dagedage henidia bona dibura ruma ai idia koudia. Edia sivarai ese idia hamomokania Iehova be nega aukadiai ena hesiai taudia ia hagoadaia. Hegeregere, guna Soviet Union tanona ai iseda tadikaka ta be lagani 23 lalonai dibura ruma ai idia koua. Herevana dibura ruma ai ia noho, to ia abia Baibel bukadia ese ia idia hagoadaia. Ia gwau: “Unai lagani 28 lalonai Iehova dekenai lau tabekau, bona ia ese lau ia hagoadaia.”—1 Petero 5:6, 7 duahia.
20. Dahaka dainai ita diba momokani Iehova ese ita do ia rakatania diba lasi?
20 Nega vaira ai herevana dahaka ia vara, namona be salamo torea tauna ena hagoadaia herevana ita laloatao, ia gwau: “Lohiabada ese iena bese taudia do ia rakatania lasi.” (Sal. 94:14) Ena be ita lalohisihisi, to ita ese ma haida ita hagoadaia diba. Pura vaira ena stadi ai, idia taitai taudia hagoadaia daladia haida do ita herevalaia.
Emu Haere be Dahaka?
• Dahaka gaudia ese iseda lalona idia hahisia diba?
• Edena dala ai Iehova ese ena hesiai taudia ia hagoadaia?
• Ena be iseda mauri ita haboioa diba, to dahaka ese ita ia hagoadaia?
[Box/Pictures on page 25]
ITA IDIA HAGOADAIA SIRIDIA
▪ kudouna Sal. 147:3; 1 Ioa. 3:19-22; 5:14, 15
▪ lalona Sal. 94:19; Fili. 4:6, 7
▪ gari Eso. 14:13, 14; Deu. 31:6
▪ gorere 2 Kor. 4:8, 9
▪ abidadama Sal. 145:14; Iam. 5:14, 15