Ma Ta Oi Durua Dalana

Ma ta be emu heduru ia tahua, a? Hegeregere, oi ia nanadaia: ‘Dahaka lau karaia be namo? Inai aria lau lao be namo, a? Inai moni gaukara do lau abia dae eiava? Inai mero o kekeni do lau tura henia, eiava?’

Reana ta ia ura karaia abia hidi be mai anina bada ena turadia, ruma bese, o Iehova dekenai dainai, emu heduru ia tahua. Sibona emu aonega amo eiava Baibel amo do oi durua? Edena dala ai ma haida oi durua sibona edia abia hidi idia karaia totona? Herevana oi dekenai edena bamona henanadai ia henia, to namona be Aonega Herevadia 15:28 ena hereva oi laloatao, ia gwau: “Kara maoromaoro taudia ese, haere idia henia neganai idia laloa namonamo guna.” Mani ita itaia edena dala ai Baibel ena hakaua herevadia faiv ese ita do idia durua heduru maorona ita henia totona.

1 Gau Ibounai Tahua Namonamo Guna.

“Hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.”​—⁠AON. 18:13.

Ta dekenai heduru maorona ita henia totona, gau ibounai ita tahua namonamo guna be namo. Hegeregere, bema ta be emu noho gabuna ia ura diba, dahaka do oi karaia? Namona be ia noho gabuna oi diba guna, unai amo emu ruma do ia davaria dalana oi hadibaia diba. Unai hegeregerena, bema ita ura ta ita durua, iena hekwakwanai bona lalohadai ita diba guna be namo. Badina bema gau ibounai ita tahua namonamo lasi, reana ita henia sisibana ese ia do ia durua lasi bona do ia daradara.​—⁠Luka 6:39.

Nanadaia Bema Tahua Karana Ia Karaia. Reana aonega karana be oi nanadaia: “Oi laloa edena hakaua herevadia oi badinaia diba?” “Do oi karaia abia hidi ena namo bona dika oi laloa vadaeni, a?” “Tahua karana oi karaia vadaeni, a?” “Ma haida, hegeregere elda taudia, emu tama sina o oi ia stadi henia tauna edia lalohadai be dahaka?”

Reana iena haere amo do ita diba bema ia be tahua karana ia karaia vadaeni, eiava ma haida amo heduru ia tahua o lasi. Danu, iena hereva bona toana amo do ita laloparara, bema ia be Baibel ena Hereva ia laloa bada eiava ia ura sibona ena ura ia badinaia.​—⁠2 Tim. 4:3.

2 Hereva Haraga Lasi.

“Namona be taunimanima ibounai be idia kamonai haraga, to idia hereva haraga lasi.”​—⁠IAM. 1:19.

Reana nega haida do ita laloa heduru ia tahua tauna dekenai eda lalohadai do ita gwauraia haraga be namo. To tahua karana ita karaia lasi bona heduru herevadia ita henia haraga be aonega karana lasi. Aonega Herevadia 29:20 ia gwau: “Iena laloa ia gwauraia haragaharaga tauna oi itaia, a? Kavakava tauna be sedira ia namo diba, to unai tau ia namo diba lasi.”

Namona be emu heduru herevadia be Baibel amo. Sibona oi nanadaia, ‘Egu sisiba be tanobada taudia edia lalohadai hegeregerena, a?’ (1 Kor. 2:12, 13) Iesu ia gwau hisihisi do ia davaria bona do idia hamasea neganai, Petero ese ia hamaoroa: “Lohiabada e, oi sibona oi hebogahisi henia, oi dekenai unai bamona do ia vara lasi.” Petero ena hereva amo dahaka ita dibaia? Bema ita naria namonamo lasi, ita henia sisiba be “Dirava ena lalohadai lasi, to taunimanima edia.” (Mat. 16:21-23) Momokani, ita ura ma haida ita durua to namona be ita laloatao, Dirava ena aonega ese iseda aonega ia hereaia. Unai dainai ita laloa namonamo guna bona gabeai ita hereva be mai anina bada.​—⁠Iobu 38:1-4; Aon. 11:2.

3 Oi Manau Bona Baibel Oi Gaukaralaia.

“Lau be sibona egu ura dekenai gau ta lau karaia lasi, to Tamana ese lau ia hadibaia hegeregerena, unai gaudia lau herevalaia.”​—⁠IOA. 8:28.

Namo lasi ita gwau, “Bema lau be oi, lau ese . . . . ” Ena be heduru ia tahua tauna ena henanadai ita haerelaia haraga diba, to namona be Iesu bamona ita manau. Ena be iena aonega bona diba ese taunimanima edia ia hereaia, to ia gwau: “Lau be sibona egu ura dainai lau hereva lasi, to . . . Tamana ese lau dekenai hahegani ta ia henia, bona unai hegeregerena lau hereva bona hadibaia.” (Ioa. 12:49, 50) Iesu be nega ibounai ena Tamana ena ura hegeregerena taunimanima ia hadibaia bona sisiba henidia.

Hegeregere, Luka 22:49 ese ia hahedinaraia, Iesu idia dogoatao gwauraia neganai, iena hahediba taudia be ia idia nanadaia bema idia tuari be maoro. Hahediba tauna ta be Iesu ia gimaia totona ena tuari kaia ia gaukaralaia. Mataio 26:52-54 ese ia hahedinaraia Iesu be ena hahediba tauna ia durua Iehova ena ura ia lalopararalaia totona. Iesu be Genese 9:6 ena hakaua herevana bona Salamo 22 bona Isaia 53 edia peroveta herevadia ia diba dainai, sisiba maorona ia henia, unai amo heai ia koua bona Iehova ia moale.

4 Iseda Buka Bona Magasin Gaukaralaia.

“Igui hesiai tauna mai ena kamonai bona mai ena kara maoromaoro, ena Biaguna ese ia abia hidi ena hesiai taudia do ia naria, bona nega korikori ai edia aniani do ia henia tauna be daika?”​—⁠MAT. 24:45.

Iesu be “igui hesiai tauna mai ena kamonai” ia gaukaralaia buka bona magasin idauidau ia halasia totona. Ma ta dekenai heduru herevadia oi do henia lasi neganai, nega oi atoa Baibel bukadia amo tahua karana oi karaia totona, a?

Heduru hereva namodia momo be Watch Tower Publications Index bona Watchtower Librarya dekenai oi davaria diba. Namona be hanaihanai unai tulu namodia ita gaukaralaia. Hereva kwaradia idauidau idia noho bona edia henunai buka bona magasin edia referens idia hedinarai danu. Namona be ma haida oi durua unai tulu namodia amo Baibel ena hakaua herevadia idia stadilaia bona hahegeregerea, unai amo abia hidi maorodia idia karaia diba. Mapu ese ta ia durua ia lao henia gabuna ia davaria hegeregerena, iseda buka bona magasin ese ta ia durua diba abia hidi maorona ia karaia, bona mauri hanaihanai do ia abia.

Elda taudia momo ese pablisa taudia dekenai Index eiava Watchtower Library gaukaralaia dalana idia hadibaia. Unai amo pablisa idia durua, Baibel ena sisiba idia tahua bona abia hidi idia karaia totona. Tahua karana idia dibaia neganai, unai ese idia ia durua hekwakwanai idia hamaoromaoroa bona dina ta ta ai idia vara gaudia idia hanaia totona. “Idia ese edia darana idia gaukaralaia karana amo, sibodia idia hadibaia, unai amo maoro bona kerere edia idau idia dibaia.”​—⁠Heb. 5:14.

5 Idia Totona Abia Hidi Karaia Lasi.

“Ta ta ese sibona ena maduna do ia huaia.”​—⁠GAL. 6:5.

Iehova ese ita dekenai ura kwalimu ia henia, unai dainai sibona do ita abia hidi, bema iena hakaua herevadia do ita badinaia eiava lasi. (Deu. 30:19, 20) Ta dekenai Baibel ena hakaua herevadia idauidau oi hahedinaraia diba, to ia sibona ese abia hidi do ia karaia. Bema ta be ita amo heduru ia tahua, namona be sibona ita nanadaia, ‘Lau be mai egu maoro ia lau durua totona, a?’ Nega haida elda taudia ese ia idia durua be namo. Eiava bema ia be matamata tauna, ena tama sina ese idia durua be namo.

[Footnote]

[Box/Picture on page 8]

Ruma Bese Ena Tomadiho Ai

Ruma bese ena tomadiho ai, reana ta ese oi ia henia henanadai ena haere oi tahua diba. Edena atikol o Baibel ena hakaua herevadia do oi gaukaralaia, unai henanadai oi haerelaia totona? Hegeregere, bema tadikaka o taihu ta ia ura ta ia tura henia bona reana do ia adavaia dainai heduru ia tahua, namona be Index eiava Watchtower Li­brary ai inai hereva “Dating” o “Marriage” oi itaia. Bena hereva kwara maragidia henunai ia henanadailaia gauna oi tahua. Danu, hereva kwarana badana henunai inai hereva “See also” ia noho. Unai kahana dekenai hereva ma haida oi tahua diba.

[Box on page 9]

Ita moale badina Iehova ena orea amo sisiba namodia ita abia bona ta ita durua diba. Hadibaia Tauna 12:11 ia gwau: “Aonega taudia edia hereva be au ta mai matana . . . bamona. Bona aonega herevadia, idia haboua namonamo gaudia, be mai edia goada, idia kokoa auka ikokodia bamona. Mamoe Naria Tauna tamona, Dirava ese, inai aonega hereva ita dekenai ia henia.” Nega momo “au ta mai matana” idia gaukaralaia animal idia hakaua totona. Unai hegeregerena, sisiba namodia be au ta mai matana bamona dala maorona ai ita ia hakaua. Ruma be ikoko amo idia “kokoa auka” neganai, do ia moru lasi. Unai hegeregerena, tau ta dekenai sisiba namona ita henia neganai, abia hidi maorona ia karaia diba. Aonega taudia be Iehova ena “aonega herevadia” idia laloa bada bona badinaia.

Namona be Iehova ita tohotohoa. Oibe, ta ena hekwakwanai ita kamonai bona sisiba ita henia be hahenamo ta! Bona Baibel amo ita sisiba henia tauna be mauri hanaihanai ia abia diba.