Duahia Taudia Edia Henanadai

Keristani tauna be ponografi ia itaia loulou dainai idia atoa siri diba, a?

▪ Oibe. Unai dainai ponografi laulau idia hahedinaraia buka, magasin, muvi, vidio, bona Intanet sait ita dadaraia be namo.

Hari, tanobada hegegemadai ponografi itaia karana be bada herea. Intanet dainai ponografi laulau momo idia hedinarai, bona momo ese idia itaia. Taunimanima haida be Intanet idia gaukaralaia lalonai, ponografi laulau idia hedinarai kava. To, haida be ponografi laulau idia ura itaia dainai, edia ruma o opesi ai idia hunia bona Intanet Web sait idia kehoa bona unai laulau idia itaia badina idia laloa ta ese idia ia itaia lasi. Unai ese edena dala ai Keristani tauna ia hadikaia diba?

Iesu be ita dekenai mai anina bada sisiba ia henia, ia gwau: “Bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” (Mat. 5:28) Oibe, headava tau bona hahine idia mahuta hebou be maoro bona unai idia moalelaia diba. (Aon. 5:15-19; 1 Kor. 7:2-5) To, ponografi laulau be matabodaga karadia idia hahedinaraia dainai, ia itaia tauna ese lalohadai dikadia ia abia diba, bona Iesu ena sisiba Mataio 5:28 dekenai ia laloaboio. Ia be Dirava ena taravatu ia utua danu. Baibel ia gwau: “Emui tauanina ena kahadia idauidau umui hamasea, idia havaraia gaudia be inai, matabodaga karadia, kara mirodia, matabodaga urana, ura dikadia, bona mataganigani, unai be kaivakuku tomadiho henia karana.”​—⁠Kol. 3:5.

Bema ta be nega ta o rua ponografi laulau ia itaia, dahaka ia vara diba? Dika ia davaria diba. Asapa danu be kahirakahira dika ia davaria. Ia gwau: “Egu aena be kahirakahira ia dedi. Lauegu kamonai be ia manoka lao, bona egu abidadama be kahirakahira ia ore.” Bema Keristani tauna ta be kopina kavakava hahine o tau edia laulau eiava mahuta hebou karadia ia raraia, ena lalomamina ia hamiroa diba bona Dirava ena lalonamo do ia haboioa. Asapa bamona do ia gwau: “Dina ibounai lau hisihisi noho, bona daba ibounai, matakani lau davaria noho.”​—⁠Sal. 73:2, 14.

Ponografi laulau ia itaia tauna ia laloparara unai kara ese ena hetura karana Iehova ida ia hadikaia diba, unai dainai elda taudia amo heduru ia tahua be namo. Baibel ia gwau: “Ena be tau ta be dala kererena ai ia raka bona ia diba lasi, namona be umui lo Keristani taudia ese unai tauna be mai manau ida umui hamaoromaoroa. To umui ta ta umui naria namonamo.” (Gal. 6:1) Elda ta o rua ese ia idia durua diba. Ia totona do idia guriguri, badina idia diba Iehova ese “gorere tauna do ia hanamoa” bona ena kara dika “do ia gwauatao.” (Iam. 5:13-15) Asapa be Dirava kahirakahira ia lao neganai, ia goada lou. Ponografi laulau idia ura dadaraia taudia be elda taudia amo heduru idia abia neganai, idia goada lou bona edia hetura karana Iehova ida do ia namo.​—⁠Sal. 73:28.

To, aposetolo Paulo ia gwau, kara dika idia karaia taudia haida be “kara mirodia, matabodaga karadia, bona gwau-edeede hemarai karadia amo idia helalo-kerehai lasi.”a (2 Kor. 12:21) Profesa Marvin R. Vincent ia gwau “kara mirodia” be kara dika rohorohodia. Unai be ponografi laulau dika rohorohodia hegeregere, tatau (o hahine) idia sihari heheni, tatau bona hahine momo mahuta henia karadia, animal sihari henia karana, natuna dekenai matabodaga karadia karaia karana, taunimanima momo ese ta idia reipia, ta be mai dagedage ida hahine ia hadikaia, eiava ta be varo amo ma ta ia kwatua bena matabodaga karana idia karaia. Paulo ia gwau ena negai, haida “edia lalona be ia dibura” bona “idia hemarai lasi momokani dainai, gwau-edeede hemarai karadia lalonai idia vareai momokani, mai mataganigani ida kara mirodia idauidau ibounai idia karaia totona.”​—⁠Efe. 4:18, 19.

Galatia 5:19 ai, Paulo ese “miro karadia” ia herevalaia danu. Britain ena diba bada tauna ta ese “miro karadia” ia herevalaia neganai, ia be headava tau bona hahine edia mahuta hebou karana ia herevalaia lasi. Bona Keristani taudia ibounai idia diba ponografi laulau ibounai be dika, bona ta ena lalona ia veria diba matabodaga lalohadaidia ia abia totona. Galatia 5:21 ai Paulo ia gwau unai bamona kara mirodia “idia karaia taudia be Dirava ena basileia do idia abia lasi.” To, edena bamona bema ta be lagani momo lalodiai ponografi laulau ia itaia? Bema ia helalo-kerehai lasi, bona unai kara ia rakatania lasi, kongrigeisen amo do idia atoa siri, kongrigeisen ia goeva noho totona.​—⁠1 Kor. 5:5, 11.

Ita moale badina ponografi laulau idia itaia taudia haida be elda taudia amo heduru idia abia, bona unai kara idia rakatania. Iesu ese Sadi Keristani taudia ia hamaorodia: “Kahirakahira idia mase gaudia oi hagoadaia, . . . oi abia gaudia bona oi kamonai gaudia do oi laloa noho, bona unai gaudia do oi badinaia noho bona oi helalo-kerehai. Momokani bema oi noga lasi, . . . do oi diba lasi momokani edena hora ai do lau mai.” (Apok. 3:2, 3) Unai ese ia hahedinaraia ta be ia helalo-kerehai, bona ponografi ena igui amo sibona ia ruhaia diba.​—⁠Iuda 22, 23.

Gau badana be ponografi laulau ibounai ita dadaraia. Anina be iseda lalona ita hadaia ponografi laulau idia hahedinaraia buka, laulau o vidio ita itaia lasi bona dadaraia momokani.

[Footnote]

[Blurb on page 30]

Namona be ponografi laulau ia itaia tauna ia laloparara unai kara be dika bona elda taudia amo heduru ia tahua be namo