Iehova ese Egu Matana Ia Kehoa

Patrice Oyeka ese ia sivarailaia

Lau lalohisihisi badina lau matakepulu, sibona lau noho bona reidio lau kamonai. Adorahi ta ai, lau ura sibona lau hamasea. Poisini pauda ta be kapusi mai ena ranu lalonai lau udaia, bona teibolo latanai lau atoa. Lau ura do lau digu, bona dabua namodia lau hahedokilaia murinai, unai poisini lau inua bona do lau mase. Dahaka dainai lau ura sibona lau hamasea? Bona dahaka dainai hari lau noho bona inai sivarai lau gwauraia?

LAU be February 2, 1958 ai lau vara, Kasaï Oriental ena provinsi ta, unai be Democratic Republic of the Congo dekenai. Egu mauri lagani be nain neganai, egu tamana ia mase, bona egu kakana ese lau ia naria.

Sikuli lau haorea murinai, raba plenteisini dekenai lau gaukara. Daba ta lagani 1989 ai, egu ofesi ai ripoti ta lau torea lalonai, karaharaga gabu ibounai ia dibura. Matamanai, lau laloa paua ia blekaot, to jenereita ena regena lau kamonai diba, bona unai be daba! Lau gari dikadika, badina gau ta lau itaia diba lasi, egu vairanai ia noho pepa danu lau itaia diba lasi!

Karaharaga egu gaukara tauna ta lau hamaoroa emai hospital maragina ia naria tauna dekenai lau do ia abia lao. To, unai hospital naria tauna ia gwau Kinshasa siti ai idia noho doketa dekenai lau lao be namo. Badina ia itaia egu matana rua edia lalona kahana (retina) be idia dika.

Kinshasa Ai

Kinshasa ai, matana ena doketa momo dekenai lau lao, to egu matana idia hanamoa diba lasi. Dina 43 hospital ai lau noho murinai, doketa idia gwau lau be matakepulu! Egu famili ese dubu idauidau dekenai lau idia abia lao, badina idia ura hoa dalanai egu matana idia hanamoa, to unai ia vara lasi.

Gabeai, lau ura lasi heduru ma haida lau tahua. Lau lalohisihisi bada, badina lau matakepulu, bona egu gaukara lau haboioa. Danu, egu adavana ese lau ia rakatania, bona emai kohu ibounai ia abia. Lau hemarai dainai ruma ai lau noho sibona, bona taunimanima lau bamoa lasi. Lau mamia egu mauri be anina lasi.

Nega rua lau ura sibona lau hamasea. Nega iharuana ai lau karaia gauna be sivarai matamanai lau gwauraia. To, egu varavara ta ena natuna ese lau ia hamauria. Lau digu lalonai, unai kapusi ia abia bona ia bubua. Lau moale badina unai poisini ia inua lasi. To, lau lalohisihisi badina unai kapusi lau davaria diba lasi. Gabeai, egu famili dekenai unai kapusi lau tahua ena badina, bona lau ura karaia gauna lau gwauraia hedinarai.

Dirava bona egu famili lau tanikiu henia badina lau idia naria. Bona sibona lau hamasea lasi.

Lau Moale Lou

Sunday ta, lagani 1992 ai, ruma ai lau helai bona kuku lau ania lalonai, Iehova ena Witnes taudia rua idia mai. Idia itaia lau matakepulu dainai, Isaia 35:5 idia duahia, ia gwau: “Matakepulu taudia ese do idia itaia diba, bona taia kudima taudia, be do idia kamonai diba.” Unai hereva lau kamonai neganai lau moale bada! Lau lao henia dubu idauidau amo Witnes taudia be idau, idia be hoa dalanai taunimanima idia hanamoa lasi. To, idia gwau bema Dirava lau dibaia, ia gwauhamatalaia tanobada matamatana ai egu matana do idia namo lou. (Ioane 17:3) Maoromaoro, Witnes taudia ida Mauri Hanaihanai Paradaiso Lalonai bukana amo Baibel lau stadilaia matamaia. Danu, edia Kingdom Hall ai idia karaia heboudia dekenai lau lao bona egu mauri lalonai gau haida lau haidaua. Hegeregere kuku ania karana lau rakatania.

To lau matakepulu dainai, hereva momokani dekenai egu diba be bada lasi. Unai dainai matakepulu taudia edia sikuli dekenai lau lao, duahiduahi bona toretore, Braille ai lau dibaia totona. Unai ese lau ia durua Kingdom Hall ai idia karaia haroro sikuli lalonai lau vareai totona. Daudau lasi, egu dekena taudia lau haroro henidia. Oibe, egu mauri lalonai lau moale lou. Hereva momokani dekenai lau goada bona Iehova dekenai egu mauri lau gwauhamatalaia. Bona May 7, 1994 ai lau bapatiso.

Iehova bona taunimanima lau lalokau henia dainai, lau ura ful-taim hesiai gaukara lau karaia. Bona December 1, 1995 amo regula painia gaukara lau karaia. Danu lau moale badina February 2004 ai, egu kongrigeisen ai elda maduna lau abia. Nega haida lau noho gabuna dekenai idia noho kongrigeisen haida ese lau idia boiria Baibel tok ta lau henia totona. Unai hahenamo idauidau lau abia dainai lau moale, bona lau abia dae ena be iseda tauanina ena kahana ta ia dika, to Iehova Dirava ita hesiai henia diba.

Iehova ese Lau Dekenai “Matana” Ia Henia

Matamanai lau hereva bamona, lau matakepulu dainai egu adavana ese lau ia rakatania. To, Iehova amo hahenamo ma ta lau abia. Ia ese matana ia henia. Lau ese Anny Mavambu lau adavaia, bona ia be egu matana ai ia lao. Ia danu be ful-taim haroro gaukara ia karaia dainai, hanaihanai haroro gaukara ai lau ia bamoa. Lau dekenai Baibel bukadia ia duahia danu, unai amo egu tok ena nouti be Braille ai lau torea diba. Lau dekenai Anny be hahenamo ta. Ia dainai, Aonega Herevadia 19:14 ena hereva ia momokani, ia gwau: “Tamana ese iena natuna tau dekenai, ruma bona kohu ia henia diba, to Lohiabada sibona ese, unai mero dekenai hahine mai aonegana ta ia henia diba.”

Iehova ese lau bona Anny ia hanamoa, bona hari emai natudia be rua​—⁠mero bona kekeni. Lau ura dikadika Paradaiso ai edia vairana lau itaia! Hahenamo ma ta be egu kakana be Baibel ena hereva momokani ia abia dae bona bapatiso ia abia! Ai ibounai be kongrigeisen tamona dekenai ai lao.

Ena be lau matakepulu, to lau ura egu hesiai gaukara Dirava dekenai lau habadaia, badina lau dekenai hahenamo momo ia henia. (Malaki 3:10) Dina ta ta lau guriguri ena Basileia do ia mai bona tanobada amo hisihisi ibounai do ia kokia. Iehova lau dibaia dainai, mai momokani ida lau gwau diba: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”​—⁠Aonega Herevadia 10:22.

[Pictures on page 29]

Baibel tok ta lau henia; egu famili bona kakana ida