Iesu be Edena Negai King ai Ia Lao?

Inai atikol lalonai, reana oi gwauraia vadaeni henanadai haida idia noho bona emu Baibel ai edia haere oi davaria dalana ia hahedinaraia. Iehova ena Witnes taudia be mai moale ida oi dekenai unai henanadai do idia haerelaidia.

1. Dirava ia gwauhamata edena basileia be Iesu do ia henia?

Dirava ia gwauhamata King Davida ena tubuna ta be Iena terona ai do ia helai bona lohia ela bona hanaihanai. Unai be Iesu, bona hari ia be guba ai Dirava ena Basileia ena King.​—Salamo 89:4; Luka 1:32, 33 duahia.

Davida be mero neganai, Iehova ese ia abia hidi Iena taunimanima, Israela besena unai, ia lohiaia totona. Davida ia mase neganai, Iehova ese Solomona ia abia hidi “ena terona” latanai ia helai. (1 Sivarai 28:4, 5; 29:23) Solomona ia mase murinai, king momo ese Ierusalema idia lohiaia, to Dirava idia badinaia lasi. Gabeai, Babulonia tuari taudia ese Ierusalema idia hadikaia bona ena king idia kokia neganai, Iehova ese unai ia koua lasi. Unai be lagani 607 B.C.E. ai ia vara. Unai nega amo Davida ena famili lalonai ta ese Ierusalema ia lohiaia lasi.​—Esekiela 21:27 duahia.

2. Lagani hida lalonai Ierusalema be ta ese ia lohiaia lasi?

Ierusalema idia hadikaia murinai, Iehova ese peroveta tauna Daniela ia hamaoroa, Ia be king ta do ia abia hidi guba amo ia lohia totona. Edena negai ia lohia matamaia?​—Daniela 7:13, 14 duahia.

Daniela ese matahanai ta ena anina ia herevalaia ia gwau, Dirava be oda ia henia au badana ta do idia utua, unai be Ierusalema basileiana do idia hadikaia ore ena oda ia henia hegeregerena. To au ena ramuna be tano lalonai do idia rakatania, unai amo “lagani 7” murinai ia tubu lou diba. Baibel ese ia hahedinaraia lagani toi mai kahana (o lagani 31⁄2) be dina 1,260. Unai ena anina be lagani 7 be dina 2,520. (Apokalupo 12:6, 14) Baibel ena peroveta herevadia lalonai, dina ta ena anina be lagani ta. (Numera 14:34) Unai dainai ita gwau diba, lagani 2,520 lalonai Dirava ena Basileia be ta ese ia lohiaia lasi.​—Daniela 4:10-17 duahia.

3. Iesu be edena negai King ai ia lao?

Lagani 1914 ai, guba dekenai Dirava ese Iesu be King ai ia halaoa. Unai be Ierusalema idia hadikaia bena lagani 2,520 murinai ia vara. Iesu be King ai ia lao neganai ia karaia gauna ginigunana be, Satani bona ena demoni be guba amo ia negedia diho. (Apokalupo 12:7-10) Taunimanima ese edia matana amo unai idia itaia lasi, to unai ia vara murinai tanobada ai dika badadia idia vara matamaia. (Apokalupo 12:12) Lagani 1914 amo idia vara gaudia ese idia hamomokania Iesu be unai lagani ai King ai ia lao.​—Mataio 24:14; Luka 21:10, 11, 31 duahia.

4. Iesu ena lohia dalana amo dahaka namo oi abia diba?

Iesu ena lohia dalana ia perovetalaia herevadia idia guguru dainai, Baibel ena hereva oi abidadama henia diba. Kahirakahira, Iesu be ena lohia siahuna do ia gaukaralaia taunimanima edia hisihisi ibounai ia haorea totona.​—Salamo 72:8, 12, 13; Daniela 2:44 duahia.

Diba ma haida abia totona, inai buka ena rau 215-218 itaia. Iehova ena Witnes taudia ese idia karaia. Baibel be Dahaka Ia Hadibaia?

[Chart on pages 16, 17]

(For fully formatted text, see publication)

October

607 B.C.E. ← Lagani 2,520 → 1914 C.E.

1000 B.C.E. | 1 B.C.E. | 1 C.E. | 1000 C.E. | 2000 C.E.

← Lagani 606.25 →← Lagani 1,913.75 →

Ierusalema basileia idia hadikaia

Calculator gaukaralaia: 606.25 + 1,913.75 = 2,520

Dirava ese Iesu bese ibounai edia King ai ia halaoa