Iesu Ena Toreisi Lou​—Ia Vara Momokani, A?

LAGANI 2,500 gunanai ia noho Grik histori torea tauna, Herodotus, ese iena negai idia noho Aigupito taudia ia sivarailaia. Ia gwau: “Taga taudia edia aria dekenai, aniani murinai tau ta ese mase mauana ta ia huaia loaloa. Unai maua lalonai be mase tauna ena tauanina, au amo idia koroa gauna ia noho, idia penia bona ena toana be mase tauna korikorina bamona, bona ena lata be kiubit ta o rua bamona. Unai maua be aria idia lao taudia dekenai ia hahedinaraia bona ia gwau, ‘Umui inuinu bona umui moale badina umui mase neganai umui be inai maua ai ia noho tauna bamona.’”

Unai lalohadai mauri bona mase dekenai be Aigupito taudia sibona ese idia abia lasi. Hari inai negai danu, momo be inai hereva idia gwauraia, “ita aniani, ita inuinu bona ita moale.” Bema nega ta do ita mase, vadaeni hari eda mauri ita moalelaia be namo, ani? Dahaka dainai ita hekwarahi kara maorodia ita karaia totona? Bema do ita mase, vadaeni hari ita mauri lalonai eda ura gaudia ita karaia be namo. Aposetolo Paulo ese unai ia herevalaia. Ia ese toreisi lou idia abia dae lasi taudia edia kara ia herevalaia, ia gwau: “Bema mase taudia be do idia toreisi lou lasi, ‘namona be ita aniani bona ita inuinu badina kerukeru do ita mase.’”​—1 Korinto 15:32.

Momokani, Paulo ia abia dae lasi mase taudia do idia ore vaitani. Ia abia dae mase taudia be do idia toreisi lou, bona do idia mauri hanaihanai. Unai ia abia dae badina ia diba Keriso Iesu be ia toreisi loua momokani. Unai toreisi lou karana ese aposetolo taudia edia abidadama ia hagoadaia.

Dahaka dainai ita dekenai Iesu ena toreisi lou be mai anina bada? Edena bamona ita diba unai ia vara momokani? Paulo ese Korinto Keristani taudia ia tore henia neganai unai ia herevalaia dalana mani ita itaia.

BEMA KERISO IA TOREISI LOU LASI BE EDENA BAMONA?

Idaunegai Korinto Keristani taudia haida be Keriso ena toreisi lou dekenai idia daradara bona ma haida idia abia dae lasi unai ia vara momokani. Aposetolo Paulo ese unuseniai idia noho Keristani taudia dekenai ia torea revareva ginigunana lalonai, ia hahedinaraia dahaka gaudia idia vara diba bema toreisi lou be lasi. Ia gwau: “Momokani, bema mase taudia be do idia toreisi lou lasi, vadaeni Keriso danu be ia toreisi lou lasi. To bema Keriso be ia toreisi lou lasi, vadaeni iseda haroro gaukara be anina lasi, bona iseda abidadama be anina lasi. Ma danu, ia hedinarai ai be Dirava ena hereva gwauraia koikoi taudia, . . . emui abidadama be anina lasi, umui be emui kara dika lalonai umui do noho. Momokani, Keriso ida idia hakapua bona mase lalonai idia mahuta taudia be idia ore vaitani.”​—1 Korinto 15:13-18.

“Ia be tadikaka 500 mai kahana dekenai nega tamona ia hedinarai. . . . Unai murinai Iamesi dekenai ia hedinarai, bena aposetolo taudia ibounai dekenai ia hedinarai, to dokonai lau dekenai danu ia hedinarai.”​—1 Korinto 15:6-8.

Paulo ese inai siri ai ia gwauraia hereva ginigunana be ta ese ia hepapahuahulaia diba lasi: Bema mase taudia idia toreisi lou lasi, vadaeni Keriso danu be ia toreisi lou lasi. Bema Keriso ia toreisi lou lasi, vadaeni dahaka do ia vara? Anina be sivarai namona harorolaia gaukarana be anina lasi. To, Keriso ia toreisi lou dainai, Keristani taudia idia abidadama, bona Baibel ena hahediba hereva badadia haida, hegeregere Dirava ena lohia siahuna, iena ladana, iena Basileia, bona eda hahemauri karana be mai anina. Bema Keriso ia toreisi lou lasi, Paulo bona aposetolo taudia ma haida ese idia harorolaia sivaraina be anina lasi.

Do idia vara gaudia ma haida be inai: Bema Keriso be mase amo ia toreisi lou lasi, Keristani taudia edia abidadama be anina lasi, bona idia be koikoi herevadia idia abia dae. Ma danu, taunimanima ese Paulo bona ma haida ese Iesu ena toreisi lou bona ia ia hatorea isi lou tauna, Iehova Dirava totona idia gwauraia herevana be do idia hakoikoia. Danu, Keriso be “iseda kara dika dainai ia mase” herevana be koikoi, badina bema Hamauria Tauna be ia toreisi lou lasi, ma haida ia hamauria diba lasi. (1 Korinto 15:3) Unai ena anina be idia mase vadaeni Keristani taudia, idia haida be abidadama dainai idia mase, be idia boio badina edia helaro toreisi lou dekenai be koikoi.

Paulo be ena hereva dokonai ia gwau: “Bema inai mauri sibona lalonai Keriso ita abidadama henia, taunimanima ibounai amo ita madi o.” (1 Korinto 15:19) Keristani taudia ma haida bamona, Paulo danu be Keriso ena toreisi lou ia abidadama henia dainai hisihisi bona dagedage ia davaria, nega aukadia ia haheaukalaia, bona ia mase. Bema toreisi lou be lasi unai ibounai be anina lasi.

DAHAKA DAINAI OI ABIA DAE BE NAMO?

Paulo ia abia dae Keristani taudia ese idia abia dae gaudia be momokani. Ia diba Iesu be mase amo ia toreisi lou, bona ia hamomokania gaudia be Korinto taudia dekenai ia herevalaia. Ia gwau: “Keriso be iseda kara dika dainai ia mase, Toretore Helagadia lalonai ia torea hegeregerena. Oibe, ia idia guria, to dina ihatoina ai ia toreisi lou, Toretore Helagadia lalonai ia torea hegeregerena. Kepa dekenai ia hedinarai, bena aposetolo 12 dekenai ia hedinarai.”b Paulo ma ia gwau: “Unai murinai, ia be tadikaka 500 mai kahana dekenai nega tamona ia hedinarai, idia momo be idia do mauri noho, to haida be mase lalonai idia mahuta vadaeni. Unai murinai Iamesi dekenai ia hedinarai, bena aposetolo taudia ibounai dekenai ia hedinarai, to dokonai lau dekenai danu ia hedinarai.”​—1 Korinto 15:3-8.

Paulo be mai lalogoada ida ia gwau, Keriso be iseda kara dika dainai ia mase, idia guria, bona ia toreisi lou. Dahaka dainai Paulo be unai bamona ia hereva? Badina ta be, momo ese ia toreisi lou tauna Iesu idia itaia bona herevalaia. Iesu ia toreisi lou neganai ia be taunimanima ta ta dekenai (Paulo dekenai danu) ia hedinarai, grup maragidia dekenai, bona taunimanima 500 mai kahana dekenai ia hedinarai danu, idia momo be Iesu ena toreisi lou sivaraina idia kamonai neganai idia abia dae lasi! (Luka 24:1-11) Iesu ena toreisi lou idia itaia taudia momo be Paulo ena negai idia do mauri noho, bona idia ese Iesu ena toreisi lou idia hamomokania. (1 Korinto 15:6) Taunimanima ta o rua ese idia itaia lasi, to 500 mai kahana ese idia itaia, unai dainai ta ese Iesu ia toreisi lou herevana ia hakoikoia diba lasi.

Danu, Paulo ese Iesu ia mase, idia guria, bona ena toreisi lou ia herevalaia neganai, nega rua ia gwau “Toretore Helagadia lalonai ia torea hegeregerena.” Unai ese ia hahedinaraia Heberu Toretoredia ai Mesia idia perovetalaia herevadia be idia guguru, bona unai ese idia hamomokania Iesu be gwauhamata Mesiana.

Ena be toreisi lou tauna Iesu idia itaia taudia edia hereva bona Baibel ena hereva ese Iesu ena toreisi lou idia hamomokania, to momo idia abia dae lasi Iesu ia toreisi lou. Haida idia gwau, ena hahediba taudia ese iena tauanina idia henaoa bena idia gwau idia itaia ia toreisi lou. To, hahediba taudia be siahu lasi Iesu idia guria gabunai idia vareai totona, badina Roma ena gadi taudia be unai guria gabuna ena iduara idia gimaia. Ma haida idia gwau Iesu ena toreisi lou be nihi ta sibona. To unai be momokani lasi badina Iesu be nega idauidau ai taunimanima momo dekenai ia hedinarai.

To, ma haida idia gwau, aposetolo taudia be taunimanima idia koia bena do idia laloa Iesu ia toreisi lou. To bema unai bamona idia karaia, dahaka namo do ia vara? Bema aposetolo taudia ese Iesu ena toreisi lou sivaraina idia gwauraia, taunimanima ese do idia kirikirilaia, hahisia bona hamasea. Bema aposetolo taudia idia koikoi, vadaeni dahaka dainai hisihisi idia davaria? Ma danu, matamanai Ierusalema dekenai edia inai taudia vairanai Iesu ena toreisi lou idia herevalaia, unai taudia be idia hegaegae aposetolo taudia idia guia totona.

Iesu ena toreisi lou ese aposetolo taudia ia hagoadaia, edia Lohiabada idia herevalaia totona, herevana dagedage bada do idia davaria. Unai toreisi lou be Keristani taudia edia abidadama ena badina badana ta. Aposetolo taudia be edia mauri idia henia lasi, aonega tauna hamasea herevana idia harorolaia totona. To edia mauri idia henia Iesu ena toreisi lou herevana idia harorolaia totona, badina ia be Keriso, Dirava ena Natuna, siahu bada, noho hanaihanai tauna bona ia ese idia ia durua bona hakaua. Iena toreisi lou ese ia hamomokania idia danu be mase amo do idia toreisi lou. Momokani, bema Iesu ia toreisi lou lasi, Keristani tomadihona be lasi. Bema Iesu ia toreisi lou lasi, reana iena sivarai do ita kamonai lasi.

Dahaka dainai ita dekenai Iesu ena toreisi lou be mai anina bada?