“Taravatu Ibounai amo Edena Taravatu be mai Anina Bada?”

Dirava ia ura dahaka ita karaia? Taravatu momo herea do ita badinaia, a? Lasi. Dirava ena Natuna, Iesu Keriso, ese ia hahedinaraia Dirava ia ura kara badana ta ita hahedinaraia.​—Mareko 12:28-31 duahia.

Mani Iesu ena hereva ita laloa guna. Nisan 11​—dina haida idia do noho bena do idia hamasea negana​—ai Iesu be dubu ai ia haroro. Iena inai taudia be henanadai idauidau idia henia, ena kerere idia tahua totona. To nega ta ta ai, Iesu ese ena haere amo edia hereva ia hadokoa. Bena, Iesu dekenai inai henanadai idia henia: “Taravatu ibounai amo edena taravatu be mai anina bada?”​—Siri 28.

Unai be henanadai badana ta. Iuda taudia haida ese idia hepapahuahulaia gauna be inai: Mose ena Taravatu 600 mai kahana lalonai edena be ginigunana o mai anina bada. Toana be, haida idia laloa taravatu ibounai be mai anina bada, bona taravatu ta ese taravatu ma ta ia hereaia lasi. Edena dala ai Iesu ese unai henanadai ia haerelaia?

Iesu ena haere lalonai taravatu rua ia herevalaia. Ginigunana be inai, ia gwau: “Iehova emu Dirava do oi lalokau henia mai emu kudouna ibounai, mai emu mauri ibounai, mai emu darana ibounai, bona mai emu goada ibounai ida.” (Siri 30; Deuteronomi 6:5) Anina be: Eda mauri ibounai lalonai Iehova ita lalokau henia be namo. Baibel ia herevalaia bukana ta ia gwau: “Dirava ita lalokau henia momokani.” Unai dainai, bema Dirava oi lalokau henia, dina ta ta ai gau ibounai do oi karaia, Iena lalonamo abia totona.​—1 Ioane 5:3.

Iharuana be, Iesu ia gwau: “Namona be emu dekena tauna oi lalokau henia, oi sibona oi lalokau henia hegeregerena.” (Siri 31; Levitiko 19:18) Dirava bona dekena tauna lalokau henia karana be idia gaukara hebou. Dirava ita lalokau henia neganai, eda dekena taudia do ita lalokau henia danu. (1 Ioane 4:20, 21) Bema eda dekena taudia ita lalokau henia, sibona ita lalokau henia hegeregerena, vadaeni ita ura idia ese ita dekenai idia karaia hegeregerena, idia dekenai danu unai bamona do ita karaia. (Mataio 7:12) Unai amo ita hahedinaraia, ita be Dirava bona dekena taudia ita lalokau henia, badina Dirava ese ita ibounai ia karaia iena toana hegeregerena.​—Genese 1:26.

Dahaka dainai Dirava bona dekena taudia lalokau henia taravatuna be mai anina bada? Iesu ia gwau: “Taravatu ma ta ese unai taravatu rua ia hereaia lasi.” (Siri 31) Mataio bukana lalonai, Iesu ia gwau Taravatu iboudiai be unai taravatu rua latanai idia haginia.​—⁠Mataio 22:40.

Dirava hamoalea karadia ita karaia be auka lasi. Ia ura lalokau dainai gau ibounai ita karaia. Dirava ia ura iena hesiai taudia be nega ibounai ia do idia lalokau henia. To lalokau be hereva o hemami ta sibona lasi, to kara amo ita hahedinaraia danu. (1 Ioane 3:18) Namona be Iehova, “lalokau” Diravana, oi lalokau henia dalana oi dibaia bona unai kara oi habadaia.​—1 Ioane 4:8.