DUAHIA TAUDIA EDIA HENANADAI

Guna Israela taudia ese kara dika taudia idia hamasea totona, au dekenai idia taua dae, a?

Roma taudia ese kara dika tauna be au dekenai idia kwatua o kokoa kau bona dina haida lalonai unuseniai ia noho bona hisihisi ia mamia, ia hitolo, ia ranu mase bena ia mase. Idia laloa kara dika badadia idia karaia taudia be unai bamona hemarai dalanai idia hamasea be maoro.

Israela besena be edena bamona? Kara dika taudia idia hamasea totona, au dekenai idia taua dae, a? Mose ena Taravatu ia gwau: “Sedira tau ta ese kara dika ta ia karaia, bona unai kara ena davana be mase, [“bona idia hamasea vadaeni, bona au dekenai idia taua dae.” NW] To ia be unuseni do ia noho lasi ela bona dabai. Unai mase tauna be idia taua dae dinana dekenai do idia guria.” (Deu. 21:22, 23) Ia hedinarai goevagoeva, Heberu Toretoredia idia badinaia negana lalonai, kara dika tauna be idia hamasea guna, bena gabeai au dekenai idia taua dae.

Unai hegeregerena, Levitiko 20:2 ia gwau: “Bema Israela tauna ta o Israela taudia edia huanai idau bese tauna ta ese iena natuna, be Moleka dirava dekenai do ia henia, gabua ore boubouna totona, unai tau be momokani do ia mase. Hanua taudia ese nadi dekena amo ia do idia hodoa mase.” Danu, Taravatu ia gwau, ‘mase taudia edia lauma idia hereva henia’ bona ‘meamea taudia’ idia hamasea be maoro. Edena dala ai unai idia karaia? ‘Nadi amo idia hodoa mase.’​—⁠Lev. 20:27, NW.

Deuteronomi 22:23, 24 ia gwau: “Bema rami hebou kekeni ta ia maoheni, bona bema tau ta ese hanua lalonai ia davaria, bona ia ese unai kekeni ia sihari henia, umui ese hanua ena murimurinai idia do umui hakaua lao, bona unuseni umui ese idia ruaosi nadi dekenai do umui hodoa mase. Kekeni be do umui hodoa mase, badina ia be hanua lalonai, to ia boiboi lasi. Bona tau be do umui hodoa mase, badina ia ese tau ta ena maoheni kekeni ia sihari henia dainai. Inai dala dekenai inai bamona kara dika do umui haorea momokani.” Israela taudia ese kara dika badadia idia karaia taudia idia panisia dala badana, be nadi amo idia hodoa mase.a

Deuteronomi 21:23 ia gwau: “Tau ta be au dekenai idia taua dae neganai, Dirava ese unai tau ia hadikaia noho.” Kara dika tauna ena tauanina be au ta dekenai idia taua dae karana ese Israela taudia bona ma haida ia hadibaia kara dika badadia do idia karaia lasi.