Seint Ita Guriguri Henidia be Maoro, A?

NEGA haida ita lalohekwarahi neganai, ta ena heduru ita tahua, ani? Reana eda tura namona ta ita hereva henia, badina ia be eda hemami bona metau ia lalopararalaia bona heduru maorona ia henia diba.

Haida be metau negadiai Dirava idia guriguri henia lasi, badina idia laloa ia be daudau momokani bona ia be helaga herea dainai ia idia gari henia. To, idia gwau seint idia guriguri henia diba badina edia hemami bona metau idia lalopararalaia bona heduru maorona idia henia diba. Hegeregere, bema taunimanima be mai anina bada gauna ta idia haboioa, reana Padua tauna “Seint” Anthony​—edia kohu ia boio o ta ese ia henao taudia ia durua diravana​—idia guriguri henia. Bema edia animal ta ia gorere, reana Assisi tauna “Seint” Francis idia guriguri henia, o bema idia lalometau “Seint” Jude Thaddeus idia guriguri henia.

To, edena bamona do ita diba seint guriguri henidia karana be Baibel ena hereva hegeregerena o lasi? Guriguri amo Dirava dekenai eda hemami ita gwauraia, unai dainai ita ura diba: Dirava ese eda guriguri ia kamonai, eiava? Danu, namona be ita henanadai: Seint guriguri henidia karana dekenai Dirava ena lalohadai be dahaka?

SEINT GURIGURI HENIDIA KARANA BONA BAIBEL ENA HEREVA

Katolik Dubu ena hahediba herevana ta ia gwau, seint ita guriguri henidia be maoro, badina idia be Dirava bona taunimanima edia medieita. New Catholic Encyclopedia ia gwau, ‘Dirava ese ita ia hebogahisi henia diba bema ia lalonamo henia tauna amo ia ita guriguri henia.’ Unai dainai, seint ia guriguri henidia tauna ia laloa, Dirava ese unai seint amo ia do ia hanamoa, badina edia dagi be Dirava ese ia henia.

To, Baibel be dahaka ia gwau? Haida idia gwau, aposetolo Paulo ena toretore ese seint ita guriguri henidia karana ia hamomokania. Hegeregere, Paulo ese Roma Keristani taudia ia hamaoroa: “Vadaeni egu tadikaka e, iseda Lohiabada Iesu Keriso amo bona lauma helaga ese ia havaraia lalokauna amo umui lau hagoadaia, lau ida Dirava do ita guriguri henia goadagoada, lau ia durua totona.” (Roma 15:30) Oi laloa Paulo be Keristani taudia ia noia iena medieita ai idia lao, bona ia totona Dirava do idia guriguri henia, a? Lasi. Paulo ia hahedinaraia, bema Keristani tauna ta ita noia ita totona Dirava ia guriguri henia, unai be kerere lasi. To, bema seint ta ita guriguri henia badina ita laloa ia be guba ai ia noho bona ita totona Dirava do ia noia, unai be kerere. Dahaka dainai?

Aposetolo Ioane ena Evanelia ai, Iesu ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioane 14:6) Ma ia gwau: “Lauegu ladana dekenai Tamana do umui noia gaudia ibounai, be ia ese do ia henia umui dekenai.” (Ioane 15:16) Iesu ia gwau lasi namona be ia ita guriguri henia bena ita totona ia ese Dirava do ia hereva henia. Bema ita ura Dirava ese iseda guriguri ia kamonai, vadaeni seint ta amo lasi to Iesu ena ladana amo Dirava ita guriguri henia be namo.

Iesu ese ena hahediba taudia dekenai guriguri dalana ia hadibaia neganai, ia gwau: “Umui guriguri neganai be umui gwau: ‘Aiemai Tamana e, oiemu ladana do ai hahelagaia.’” (Luka 11:2) Oibe, ita guriguri “neganai,” Iesu o ma tau ta ita guriguri henia lasi, to Dirava sibona ita guriguri henia be namo. Iesu ena hereva amo ita itaia, Iesu Keriso ena ladana amo Dirava ita guriguri henia be maoro, to “seint” ta amo be kerere.

Guriguri be iseda tomadiho karana badana ta dainai, bema Dirava ita tomadiho henia lasi to idau tauna ta ita tomadiho henia, unai be Baibel ena hereva hegeregerena lasi. (Ioane 4:23, 24; Apokalupo 19:9, 10) Unai dainai, Dirava sibona ita guriguri henia be namo.

DIRAVA GURIGURI HENIA TOTONA OI GARI, A?

Iesu be ena Ororo Harorona ai, natu ta be ena tamana dekenai aniani gauna ta ia noia ena sivarai ia gwauraia. Tamana be ena natuna dekenai paraoa lasi to nadi do ia henia, a? Eiava gwarume lasi to gaigai do ia henia, a? (Mataio 7:9, 10) Tama lalokauna be unai bamona ia karaia diba lasi!

Tama o sina edia lalohadai ia hahedinaraia haheitalai ma ta mani oi laloa. Emu natuna ia ura oi dekenai gau ta ia noia. Umui be tura namodia, bona nega ibounai ia be mai gari lasi ida ena lalohadai oi dekenai ia gwauraia. Bena nega ta, ia ura gau ta ia noia oi dekenai, to ia gari dainai idau tauna ta amo ena ura gauna ia gwauraia. Emu hemami be edena bamona? Bema emu natuna ese unai kara ia manadalaia, bona oi itaia ia be hanaihanai unai tauna amo oi ia hereva henia be edena bamona? Do oi moale, a? Lasi, ani? Lalokau tama sina idia ura edia natudia ida idia herevahereva, bona idia ura edia natudia be mai gari lasi ida edia ura gauna idia gwauraia.

Aniani ia noia natuna ena sivarai ena anina ia hahedinaraia totona, Iesu ese hutuma ia hamaoroa: “Unai dainai, bema umui kara dika taudia ese emui natudia dekenai harihari gaudia namodia umui henia diba, namona be umui diba momokani, emui Tamana, guba ai ia noho ese gau namodia be idia noinoi taudia dekenai do ia henia!” (Mataio 7:11) Momokani, tama o sina idia ura dikadika edia natudia dekenai gau namodia idia henia. Eda guba Tamana ia ura dikadika eda guriguri ia kamonai bona haerelaia.

Bema eda kerere ta dainai ita lalohekwarahi, Dirava ia ura maoromaoro guriguri amo ia ita hereva henia. Ia be ma ta dekenai guriguri kamonai henia ena maduna ia henia lasi. Baibel ese ita ia hagoadaia: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” (Salamo 55:22) Unai dainai, seint o ma ta amo lasi, to guriguri amo Iehova Dirava ita hereva henia be namo.

Eda guba Tamana be ita ta ta ia laloa bada. Ia ura hekwakwanai negadiai ita ia durua bona ita ia boiria ia kahirakahira ita lao. (Iamesi 4:8) Ita moale badina eda guba Tamana, ‘guriguri ia kamonai’ Diravana ita hereva henia diba.​—⁠Salamo 65:2.