Raskol Tauna ta amo Dahaka Ita Dibaia?

Ita be inai laulau ai Iesu ese ia hereva henia raskol tauna amo gau haida do ita dibaia. Ia be ena kerere dainai ia lalohisihisi. Ia ese Iesu ia noia: “Emu Basileia lalonai oi vareai neganai lau oi laloa.” Bena laulau ai oi itaia hegeregerena, Iesu ese ia hereva henia. Oi laloa Iesu be ia dekenai dahaka ia gwau?​—a Iesu ese ia gwauhamata henia: “Hari dina oi lau hamaoroa momokani, oi be lau ida Paradaiso ai do ita noho.”

Oi laloa unai Paradaiso ena toana be edena bamona?​— Haere maorona ita diba totona, namona be Dirava ese ia karaia tau bona hahine ginigunadia, Adamu bona Heva, dekenai ia henia Paradaisona ita herevalaia. Unai Paradaiso be edeseniai ia noho? Guba ai o tanobada ai ia noho?​—

Emu haere be maoro bema oi gwau, “tanobada ai.” Anina be, bema ita gwau raskol tauna be “Paradaiso ai” ia noho, anina be ita gwau gabeai ia be inai tanobada paradaisona ai do ia noho. Unai Paradaiso ena toana be edena bamona?​— Mani ita itaia.

Iehova ese Adamu bona Heva ia karaia murinai, Baibel ia gwau, Dirava ese idia ruaosi be inai tanobada ena paradaiso o ‘uma ta ladana Eden’ ai ia atodia. Mani emu lalona ai oi piksaia, reana unai “Eden” umana be hairai momokani, ani?​— Reana ena hairai ese hari ita itaia gabu ma haida edia hairai ia hanaia momokani!

Oi laloa ita herevalaia raskol tauna bona Iesu be inai tanobada do idia noholaia hebou, a?​— Lasi, badina Iesu be King ta guba ai do ia noho bena tanobada Paradaisona do ia lohiaia. To, Iesu ena hereva (“oi be lau ida Paradaiso ai do ita noho”) ena anina be, unai raskol tauna be tanobada ai do ia toreisi lou, paradaiso ai do ia noho, bona Iesu ese do ia lohiaia. To dahaka dainai Iesu ese raskol tauna ia hamaoroa Paradaiso ai do ia noho?​— Mani unai ita herevalaia.

Unai raskol tauna sibona lasi, to tanobada taudia bilioni ma haida danu be kara dika rohorohodia idia karaia. Idia momo be kerere idia karaia badina Iehova bona ena ura idia diba lasi.

Unai bamona taudia​—bona Iesu ese satauro ai ia hereva henia raskol tauna​—be mase amo do idia toreisi lou bona inai tanobada Paradaisona do idia noholaia. Unai negai idia ese Dirava ena ura do idia dibaia. Bena dala ta amo idia hamomokania diba idia be Iehova idia lalokau henia eiava.

Oi laloa edena dala amo unai idia hamomokania diba?​— Dirava ena ura idia badinaia be namo. Unai negai Paradaiso ai ita noho bona nega ibounai Iehova bona ma haida idia lalokau henia taudia ida ita noho hebou be namo herea, ani?