BAIBEL HENANADAI EDIA HAERE
Daidia be guba dekenai do idia lao, bona dahaka dainai?
Taunimanima milioni idia ura guba dekenai idia lao. Iesu ia gwau ena aposetolo taudia be guba ai do idia noho. Ia do mase lasi neganai, ia gwauhamata iena guba Tamana ida ena aposetolo taudia totona gabu ta do idia hegaegaelaia.—Ioane 14:2 duahia.
Dahaka dainai tanobada taudia haida be mase amo do idia toreisi lou bena guba ai do idia noho? Unuseniai dahaka gaukara do idia karaia? Iesu ese ena aposetolo taudia ia hamaoroa, idia be king ai do idia lao bona tanobada do idia lohiaia.—Luka 22:28-30; Apokalupo 5:10 duahia.
Kara namo taudia ibounai be guba dekenai do idia lao, a?
Tano momo ai, gavamani ai idia lohia taudia be momo lasi. Unai dainai ita diba Iesu be mase amo ia hatorea isi lou taudia haida sibona ia abia hidi, guba amo tanobada idia lohiaia totona. (Luka 12:32) Iesu ida do idia lohia taudia edia namba be Baibel ese ia gwauraia.—Apokalupo 14:1 duahia.
Iesu be hahediba taudia haida totona guba ai gabu ta ia hegaegaelaia. Unuseniai dahaka gaukara do idia karaia?
To, Iesu ena Basileia idia abidadama henia taudia hutuma be tanobada paradaisona ai do idia mauri hanaihanai. (Ioane 3:16) Haida be inai nega oromana dikana ena dokona ai do idia roho mauri bena Paradaiso do idia noholaia. To ma haida be mase amo do idia toreisi lou bena Paradaiso ai do idia noho.—Salamo 37:29; Ioane 5:28, 29 duahia.