Ma Haida Ita Durua Diba Daladia

OGOGAMI tanona ta ai elda ta ladana François, ia gwau: “Eleksen ta murinai, idia lusi taudia ese dagedage bada herea idia havaraia. Unai dainai, Iehova ena Witnes taudia tausen momo be edia hanua amo idia heau. Muramura bona aniani be momo lasi bona edia davana be bada herea. Banika idia koua bona ATM masini idia gaukara lasi.”

Betele tadikaka ese moni, aniani bona gau ma haida idia siaia, unai amo edia hanua amo idia heau bona Kingdom Hall ai idia noho Witnes taudia idia durua diba. Ena be idia heatu heheni oreadia rua ese dala idia koua, to brens motuka idia koua lasi idia hanaia totona, badina idia diba Iehova ena Witnes taudia be tuari amo idia gini siri.

François ia gwau: “Kingdom Hall ta dekenai ai lao gwauraia neganai, idia hunia tuari taudia haida ese emai basi idia pidia. To, buleti ese ai ia reaia. Ai itaia tuari tauna ta mai ena ipidi be ai dekenai ia heau mai dainai, motuka ai rives haraga bona brens dekenai ai giroa. Iehova ai tanikiu henia badina unai dina ai ai mase lasi. Unai dina murinai, Kingdom Hall dekenai idia noho tadikaka 130 be gabu ma ta dekenai idia lao. Haida be brens ofesi dekenai idia mai bona Baibel amo idia ai hagoadaia, bona tauanina dalanai heduru ai henia ela bona unai heatu ia ore.”

François ia gwau: “Gabeai, unai tano ai idia noho tadikaka taihu momo ese brens ofesi dekenai tanikiu revarevana idia siaia. Idia gwau, gabu idauidau amo tadikaka taihu edia heduru karana ese edia abidadama Iehova dekenai ia hagoadaia.”

Disasta eiava hekwakwanai negadiai, eda tadikaka taihu ita hamaorodia lasi, “oi sibona oi hasiahua, bona oi aniani namonamo.” (Iam. 2:15, 16) Lasi. To ita hekwarahi idia ita durua totona. Unai hegeregerena, aposetolo edia negai hahediba taudia idia diba hitolo bada do ia vara dainai, “edia lalona idia hadaia, idia dekenai ia noho gauna hegeregerena, heduru gaudia be Iudea ai idia noho tadikaka dekenai do idia siaia.”—Kara 11:28-30.

Ita be Iehova ena hesiai taudia dainai, ita ura tauanina dalanai taunimanima ita durua. To, idia be Dirava dibaia totona idia hitolo danu. (Mat. 5:3) Iesu ena hahediba taudia be unai idia lalopararalaia totona, ia haganidia ‘hahediba taudia halaoa’ gaukarana do idia karaia. (Mat. 28:19, 20) Ita ta ta be iseda nega, goada, bona kohu ita gaukaralaia unai hahegani ita badinaia totona. Iseda orea ese kontribusen monina haida ia gaukaralaia tauanina dalanai tadikaka ia durua totona. To, ena kahana badana ia gaukaralaia Basileia ena gaukara durua bona sivarai namona harorolaia totona. Unai amo ita hahedinaraia iseda Dirava bona eda dekena taudia ita lalokau henia.—Mat. 22:37-39.

Namona be Iehova ena Witnes taudia edia tanobada ibounai gaukarana idia durua taudia idia diba, idia henia kontribusen be Iehova ena orea ese dala maorona ai ia gaukaralaia. Oi ese emu tadikaka oi durudia diba, a? Oi ura hahediba taudia halaoa gaukarana oi durua, a? Bema oibe, vadaeni “bema dika ese taunimanima namodia ia hadikaia, bona bema oi be mai oiemu dala do oi durudia neganai, oiemu durua do oi koua lasi.”—Aon. 3:27.

TANOBADA HEGEGEMADAI GAUKARANA DURUA TOTONA KONTRIBUSEN HENIA DALADIA

Aposetolo Paulo ena nega bamona, hari momo ese edia ‘moni sisina idia haboua,’ maua ladana “Tanobada Ibounai Gaukarana Durua Monina” lalonai idia udaia totona. (1 Kor. 16:2) Hua ta ta iboudiai, kongrigeisen ese unai moni be edia tano ai ia noho Iehova ena Witnes taudia edia brens ofesi dekenai idia siaia. Emu tano ai Iehova ena Witnes taudia ese idia gaukaralaia ofesi ta dekenai, emu moni oi siaia diba danu. Idia gaukaralaia ofesi ena ladana oi diba totona, emu tano ai ia noho Iehova ena Witnes taudia edia brens ofesi oi tore henia diba. Brens ofesi ena adres be www.jw.org /ho dekenai oi davaria diba. Inai harihari gaudia oi siaia diba:

KONTRIBUSEN MONINA MAI TARAVATUNA
- Taunimanima ese moni idia henia diba, trust fund ai do ia noho totona. To bema nega ta, henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.
PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens ofesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 325 3011.