Mase, Eda Inai Gauna Ginigabena, Do Ia Ore Momokani

1, 2. Matamanai, Adamu bona Heva edia mauri be edena bamona, bona edena henanadai idia vara?

IEHOVA ese Adamu bona Heva ia karaia neganai, idia ia inai henia gauna ta be lasi. Idia be paradaiso ai idia noho goevadae taudia. Idia be natuna bamona, Iehova, edia Havaraia Tauna, idia tura henia namonamo. (Gen. 2:7-9; Luka 3:38) Dirava ese idia dekenai gaukara badana ta ia henia. (Genese 1:28 duahia.) “Tanobada ena gabu ibounai dekenai do [idia] noho, bona unai tano do [idia] biagua” ena taravatu be lagani haida lalonai idia hagugurua diba. To, ‘tanobada dekenai idia noho mauri gaudia ibounai idia biagua’ totona, Adamu bona Heva idia mauri hanaihanai be namo.

² Dahaka dainai hari mauri be idau? Dahaka dainai taunimanima edia moale idia hadikaia gaudia be momo, hegeregere mase? Dirava ese dahaka do ia karaia unai gaudia ia haorea totona? Unai henanadai bona henanadai ma haida edia haere be Baibel lalonai idia noho, bona hari unai do ita tahua.

LALOKAU SISIBANA TA

3, 4. (a) Dirava ena hahegani Adamu bona Heva dekenai be dahaka? (b) Dahaka dainai unai hahegani idia badinaia be mai anina bada?

³ Ena be Adamu bona Heva idia mauri hanaihanai diba, to idia ese gau haida idia karaia be namo idia mauri noho totona. Unai gaudia be do idia hahodi, aniani, inuinu bona mahuta. To mai anina bada gauna be Iehova, Mauri Ia Henia Tauna do idia tura henia. (Deu. 8:3) Dirava ena hakaua dalana idia abia dae neganai, edia mauri do idia moalelaia bona do idia mauri noho. Iehova ese Heva ia do karaia lasi neganai, Adamu dekenai unai ia hadibaia. Edena dala ai? Baibel ia gwau: “Lohiabada Dirava ese unai tau dekenai taravatu ia atoa, ia gwau, ‘Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.’”—Gen. 2:16, 17.

⁴ “Kara namo bona kara dika hadibaia au ena huahua” ese ia hahedinaraia, Dirava be mai ena maoro dahaka be namo bona dahaka be dika ia abia hidi totona. Dirava ese Adamu be iena toana hegeregerena ia karaia bona ia be mai ena lalomamina dainai, Adamu ia diba vadaeni dahaka be namo bona dahaka be dika. Unai au huahua ese Adamu bona Heva dekenai ia hahedinaraia, nega ibounai Iehova ena hakaua dalana idia badinaia be namo. To, bema idia ese unai au huahua idia ania, anina be idia ese Dirava ena kara maoromaoro taravatudia idia dadaraia, bona unai ese idia bona edia natudia dekenai dika bada do ia havaraia. Dirava ia gwau, unai au huahua do idia ania neganai do idia mase, ese ia hahedinaraia iena taravatu idia badinaia be gau badana.

TAUNIMANIMA DEKENAI MASE IA HANAIA DALANA

5. Edena dala ai Adamu bona Heva ese Iehova ena taravatu idia utua?

⁵ Dirava ese Heva ia karaia murinai, Adamu ese Heva dekenai Dirava ena taravatu ia gwauraia. Heva be unai taravatu ia diba goevagoeva, bona gabeai ia ese unai taravatu ena hereva ibounai ia gwauraia lou. (Gen. 3:1-3) Hegeregere, Satani Diabolo ese gaigai ta amo ia hereva henia neganai, Heva be unai taravatu ia gwauraia lou. Satani ia ura dikadika sibona do ia biagua bona lohia siahuna ia abia. (Iamesi 1:14, 15 sekea.) Ena ura dikana ia hagugurua totona, ia gwau Dirava be koikoi tauna. Satani ese Heva ia hamaoroa, bema Dirava ena taravatu ia utua, do ia mase lasi, to Dirava bamona do ia lao. (Gen. 3:4, 5) Heva be Satani ena hereva ia abia dae, sibona ena abia hidi ia karaia bona au huahua ia ania, bena Adamu ia doria unai au huahua ia ania totona. (Gen. 3:6, 17) Satani Diabolo ese Heva ia koia unai. (1 Timoteo 2:14 duahia.) Ena be Adamu ia diba unai be kerere, to ena “adavana dekenai [ia] kamonai.” Reana idia dekenai unai gaigai be turana namona ta bamona, to Satani Diabolo be hebogahisi lasi inai tauna, bona ia diba iena koikoi herevana ese dika do ia havaraia.

6, 7. Edena dala ai Iehova ese Adamu bona Heva ia kota henia?

⁶ Adamu bona Heva be Iehova, idia dekenai mauri bona gau ibounai ia henia Tauna, idia gwau-edeede henia. Bona Iehova be idia vara gaudia ibounai ia itaia. (1 Siv. 28:9; Aonega Herevadia 15:3 duahia.) To ia ese Adamu, Heva bona Satani ia koudia lasi, badina ia ura idia ese edia hemami korikorina ia dekenai do idia hahedinaraia. Tama ta bamona, Iehova ia lalohisihisi bada. (Genese 6:6 sekea.) Bena Iehova be Hahemaoro Tauna ai ia lao, bona iena taravatu hegeregerena Adamu bona Heva ia hahemaoro henia.

⁷ Guna, Dirava ese Adamu ia hamaoroa: “[Kara namo bona kara dika hadibaia au ena huahua] oi ania dina dekenai do oi mase momokani.” Reana Adamu ia laloa unai “dina” ena lata be hora 24. Unai dainai, ia gwau-edeede murinai, reana ia laloa Iehova ese dina ia do diho lasi neganai ia do ia hamasea. To, “adorahi kahanai” Iehova ese Adamu bona Heva ia hereva henidia. (Gen. 3:8) Ia kota henidia neganai, Adamu bona Heva edia hereva ia kamonai guna. (Gen. 3:9-13) Bena edia kerere davana ia gwauraia. (Gen. 3:14-19) Bema Iehova ese Adamu bona Heva be maoromaoro ia hamasedia, iena ura idia bona edia natudia totona do ia guguru lasi. (Isa. 55:11) Ena be Iehova ia gwau Adamu bona Heva be do idia mase bona unai nega amo idia be kara dika taudia ai idia lao, to nega ia henia natudia idia havaraia totona. Vaira negana ai, unai natudia be Dirava ese ia henia hahenamo do idia moalelaia. Dirava ena matanai, Adamu bona Heva be idia kara dika dinana ai idia mase, badina Ia dekenai “dina” tamona be lagani 1,000.—2 Pet. 3:8.

8, 9. Adamu ena kara dika dainai ena natudia dekenai dahaka ia vara? (Laulau ginigunana itaia.)

⁸ Adamu bona Heva edia kara dika ena metau be edia natudia dekenai do ia hanaia danu, a? Oibe. Roma 5:12 ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” Abidadama tauna Abela be ia mase tauna ginigunana. (Gen. 4:8) Bena Adamu ena natudia ma haida danu be idia buruka bona idia mase. Idia ibounai dekenai kara dika bona mase ia hanaia, a? Aposetolo Paulo ia haere ia gwau: “Tau tamona ena gwau-edeede karana dainai, taunimanima momo be kara dika taudia ai idia lao.” (Roma 5:19) Adamu amo ia hanaia kara dika bona mase be taunimanima edia inai gaudia badadia ai idia lao. Ita diba lasi edena dala ai kara dika bona mase be Adamu ena natudia dekenai idia hanaia, to ita ibounai be unai metau ita huaia noho.

⁹ Baibel ia gwau Adamu amo ita abia kara dika bona mase be ‘bese idauidau ibounai idia koua noho dabua badana bamona.’ (Isa. 25:7) Unai dabua badana be taunimanima ibounai ia hametaua o tarapua bamona. Unai dainai Baibel ia gwau: “Adamu amo taunimanima ibounai idia mase noho.” (1 Kor. 15:22) Unai dainai, Paulo ia henanadai: “Inai tauanina, egu mase do ia havaraia gauna amo daika ese lau ia hamauria diba?” Ta ese Paulo ia hamauria diba, a?a—Roma 7:24.

KARA DIKA BONA MASE DO IDIA ORE MOMOKANI

10. (a) Edena Baibel siri ese idia hamomokania Iehova ese Adamu amo ia vara mase do ia haorea? (b) Unai siri amo Iehova bona ena Natuna dekenai dahaka ita dibaia?

¹⁰ Oibe, Iehova ese Paulo ia hamauria diba. Baibel ia gwau: “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.” (Isa. 25:8) Natu ta be gau ta ese ia hahisia neganai, tama ese unai hahisia gauna ia kokia bona ena mata ranu ia dahua oho. Unai hegeregerena, Iehova ia ura dikadika Adamu amo ia vara mase ia kokia! Unai ia karaia totona Iesu ese ia durua. Korinto Ginigunana 15:22 ia gwau: “Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia.” Unai hegeregerena, Paulo be ia henanadai, “Daika ese lau ia hamauria diba?” murinai, ia gwau: “Iesu Keriso, iseda Lohiabada amo Dirava lau tanikiu henia!” (Roma 7:25) Oibe, ena be Adamu bona Heva idia gwau-edeede, to Iehova ena lalokau taunimanima totona ia ore lasi. Bona Iesu, Iehova ia durua bona Adamu bona Heva idia karaia tauna, be taunimanima ia lalokau henia noho. (Aon. 8:30, 31) To, edena dala ai Iehova ese taunimanima ia hamauria?

11. Iehova be dahaka ia karaia taunimanima ia durua totona?

¹¹ Adamu ia kara dika neganai, Iehova ese ia kota henia bona ia hamaoroa do ia mase. Unai dainai, kara dika bona mase be taunimanima dekenai ia hanaia. (Roma 5:12, 16) Baibel ia gwau: “Tau tamona ena kara dika dainai, taunimanima idauidau ibounai be Dirava ese ia gwauraidia dika.” (Roma 5:18) To, Iehova be dahaka ia karaia diba, unai amo taunimanima ia durua bona sibona ena taravatu ia utudia lasi? Iesu ese haere ia henia, ia gwau: “Taunimanima ena Natuna bamona, ia mai . . . bona ena mauri ia henia, taunimanima momo edia mauri davana karaia totona.” (Mat. 20:28) Oibe, tanobada ai Iesu sibona be goevadae tauna, unai dainai ia sibona be hegeregere ena mauri ia bouboulaia totona. Edena dala ai unai mauri davalaia boubouna ese Iehova ena kota maoromaoro karana ia hagugurua?—1 Tim. 2:5, 6.

12. Daika ena boubou gauna ese Iehova ena kota maoromaoro karana ia hagugurua?

¹² Iesu be goevadae tauna dainai, tanobada ai ia mauri hanaihanai diba. Unai be Iehova ena ura Adamu totona. Iesu be ena Tamana bona Adamu ena natudia ia lalokau henia dainai, ia ese ena mauri ia bouboulaia. Oibe, Iesu ese ena mauri goevadaena ia bouboulaia, unai be guna Adamu ese ia haboioa mauri goevadaena bamona. Gabeai, Iehova ese ena Natuna be lauma tauanina ai ia hatorea isi lou. (1 Pet. 3:18) Unai boubou gauna ese Iehova ena kota maoromaoro karana ia hagugurua, badina Iesu ese ena mauri goevadaena ia henia, Adamu ese ia haboioa mauri goevadaena ena davana ia karaia totona. Unai dainai ita gwau diba, Iesu ese Adamu ena gabu ia abia. Paulo ia gwau: “Toretore Helagadia lalonai danu, ia gwau: ‘Tau ginigunana Adamu be mauri tauna ai ia lao.’ To Adamu ginigabena be mauri ia henia laumana ai ia lao.”—1 Kor. 15:45.

13. Edena dala ai “Adamu ginigabena” ese mase taudia do ia durua?

¹³ Kahirakahira, “Adamu ginigabena” ese Adamu ena natudia dekenai mauri hanaihanai do ia henia. Guna, idia mase vadaeni taudia momo danu be unai hahenamo do idia abia. Idia be tanobada ai do idia toreisi lou, bona mauri hanaihanai do idia abia.—Ioa. 5:28, 29.

14. Edena dala ai taunimanima be goevadae taudia ai do idia lao?

¹⁴ Edena dala ai kara dika taudia be goevadae taudia ai do idia lao? Iehova ese Basileia gavamanina ta ia haginia unai do ia karaia totona. Unai Basileia lalonai “Adamu ginigabena” bona 144,000 taudia do idia lohia. (Apokalupo 5:9, 10 duahia.) Iesu ida guba ai idia lohia taudia be guna goevadae lasi taudia dainai, taunimanima edia hemami do idia lalopararalaia diba. Edia lagani 1,000 lohia negana lalonai, idia ese tanobada taudia do idia durua goevadae taudia ai idia lao totona.—Apok. 20:6.

15, 16. (a) “Mase, iseda inai tauna ginigabena” ena anina be dahaka, bona edena negai do ia ore momokani? (b) Korinto Ginigunana 15:28 bamona, Iesu be kahirakahira dahaka do ia karaia?

¹⁵ Basileia ena lagani 1,000 lohia negana ena dokonai, abidadama taudia ibounai be kara dika bona mase ena igui amo do idia ruhaia. Baibel ia gwau: “Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia. To idia ta ta be edia nega ta ta ai mauri do idia abia: Keriso ia toreisi lou guna, unai murinai Keriso idia badinaia taudia be iena noho negana lalonai do idia toreisi lou. Bena dokonai, ia ese ena Dirava bona Tamana dekenai basileia do ia henia hanai, bona unai neganai gavamani ibounai, lohia taudia ibounai, bona siahu taudia ibounai be ia ese ia haorea vadaeni. Badina ia be do ia king ela bona Dirava ese ena inai taudia ibounai be ena aena henunai ia atoa. Bona mase, iseda inai tauna ginigabena unai, be do ia ore momokani.” (1 Kor. 15:22-26) Oibe, Adamu amo ia vara mase, taunimanima ia koua “dabua badana bamona gauna” unai, be do ia ore ela bona hanaihanai.—Isa. 25:7, 8.

¹⁶ Aposetolo Paulo be ena hereva dokonai ia gwau: “Dirava ese gau ibounai be iena Natuna henunai do ia atoa murinai, unai Natuna ese ia sibona do ia atoa gau ibounai be ia henunai ia atoa Tauna henunai, vadaeni Dirava be gau ibounai edia kwarana ai do ia lao.” (1 Kor. 15:28) Unai neganai, Dirava ena Natuna ese ia lohia ena badina do ia hagugurua. Unai dainai, Iesu be mai moale ida iena lohia siahuna bona goevadae taudia ibounai be Iehova ena lohia siahuna henunai do ia atodia.

17. Satani dekenai dahaka do ia vara?

¹⁷ To Satani, taunimanima ese idia davaria hisihisi ia hamatamaia tauna dekenai, dahaka do ia vara? Haere be Apokalupo 20:7-15 ese ia henia. Lagani 1,000 dokonai, Satani do idia ruhaia bona ia ese taunimanima be nega ginigabena do ia tohoa lou. Unai murinai, Iesu ese Diabolo bona ia idia badinaia taudia do ia haorea vaitani. Unai be “mase iharuana.” (Apok. 21:8) Unai “mase iharuana” be “do ia ore momokani” lasi, badina ia lalonai idia mase taudia be do idia toreisi lou diba lasi. To, Iehova idia abidadama henia taudia dekenai, “mase iharuana” be siahu lasi.

18. Edena dala ai Dirava ese Adamu dekenai ia henia gaukara do ia guguru?

¹⁸ Goevadae taudia dekenai inai gauna ta be lasi dainai, Iehova ena vairanai do idia gini bona ia ese gwaumaoro do ia henidia mauri hanaihanai idia abia totona. Adamu be Iehova ese ia henia gaukarana do ia guguru dalana do ia itaia lasi. Adamu ena natudia ese tanobada do idia hahonua, do idia naria bona ia lalonai idia noho mauri gaudia ibounai do idia moalelaia. Oibe, namona be Iehova ese mase, iseda inai tauna ginigabena unai, do ia haorea dalana ita laloa bada!