BAIBEL HENANADAI EDIA HAERE
Dahaka dainai Dirava ena Basileia ia mai totona ita guriguri?
Oi ura Dirava ena Basileia bona do ia hagugurua gaudia dekenai diba ma haida oi abia, a?
Dirava ena Basileia be guba gavamanina. Iesu ese ena hahediba taudia ia hamaoroa unai Basileia ia mai totona do idia guriguri, badina ia ese tanobada ai kara maoromaoro bona maino do ia havaraia. Taunimanima edia gavamani be hegeregere lasi dagedage, kara gageva, o gorere ia haorea totona, to Dirava ena Basileia sibona ese unai ia karaia diba. Dirava ese ena Natuna, Iesu ia abia hidi Basileia ena King ai ia lao. Danu, Iehova ese Iesu ena hahediba taudia haida ia abia hidi Iesu ida Basileia do idia lohiaia.—Luka 11:2; 22:28-30 duahia.
Kahirakahira, Dirava ena Basileia ese Dirava ena lohia dalana idia dadaraia taudia do ia haorea. Unai dainai, Dirava ena Basileia ia mai totona ita guriguri anina be, ita noinoi Dirava ena gavamani ese tanobada ena gavamani ibounai edia gabu do ia abia.—Daniela 7:13, 14; Apokalupo 11:15, 18 duahia.
Dahaka dainai Dirava ena Basileia ese taunimanima do ia durua?
Iesu be King maorona, badina ia be mai ena hebogahisi. Danu, ia be Dirava ena Natuna dainai, iena siahu be hegeregere Dirava ena heduru totona idia taitai taudia ibounai ia durua totona.—Salamo 72:8, 12-14 duahia.
Dirava ena Basileia totona idia guriguri bona iena ura idia badinaia taudia ibounai be, unai Basileia amo namo do idia abia. Baibel amo Dirava ena Basileia oi dibaia dainai do oi moale.—Luka 18:16, 17; Ioane 4:23 duahia.