Dahaka Dainai Ita Helaga be Mai Anina Bada?

1. Edena dala ai Levitiko bukana ese ita ia durua diba?

BAIBEL lalonai, Levitiko bukana sibona ese helaga karana ia herevalaia momo. Iehova idia tomadiho henia taudia ese helaga karana idia hahedinaraia be gau badana. Unai dainai, Levitiko bukana ita lalopararalaia bona ita laloa bada neganai, ita do ia durua ita helaga totona.

2. Levitiko bukana lalonai dahaka ita davaria diba?

² Levitiko bukana be peroveta tauna Mose ese ia torea, bona ia be “Toretore Helagadia ibounai” ena kahana ta dainai, ia be mai ena namo ma haida hadibaia totona. (2 Tim. 3:16, BHḡ) Heberu toretoredia lalonai, Levitiko bukana ena karoa ta ta lalonai, Iehova ena ladana be nega 10 mai kahana ia hedinarai. Bema Levitiko bukana ita lalopararalaia, unai ese ita do ia durua eda kara amo Dirava ena ladana ita hahemaraia lasi totona. (Lev. 22:32) Motu gado Baibel ai, Levitiko bukana be nega momo inai hereva “Lau inai Iehova” ia gaukaralaia. Namona be unai ese ita ia hadibaia Dirava ita badinaia be gau badana. Inai stadi bona stadi gabena ai, Levitiko bukana ena hereva namodia haida do ita stadilaia. Levitiko bukana be harihari gauna ta Iehova amo ita do ia durua tomadiho helagana ita badinaia totona.

ITA HELAGA BE GAU BADANA

3, 4. Mose ese Arona bona ena natudia ia hadigua karana ese dahaka ia laulaulaia? (Laulau ginigunana itaia.)

³ Levitiko 8:5, 6 duahia. Iehova ese Arona ia abia hidi Israela besena ena hahelaga tauna badana ai do ia lao, bona iena natudia Ia abia hidi Israela besena totona hahelaga gaukara do idia karaia. Arona ese Iesu Keriso ia laulaulaia, bona Arona ena natudia ese horoa Keristani taudia idia laulaulaia. To, Mose ese Arona ia hadigua anina be Iesu danu be do idia hagoevaia, a? Lasi. Iesu be ia kara dika lasi bona ia “goeva momokani” dainai, ta ese ia hagoevaia be anina lasi. (Heb. 7:26; 9:14) To, Mose ese Arona ia hadigua karana ese ia hahedinaraia, Iesu be goeva bona kara maoromaoro tauna. Vadaeni, Mose ese Arona ena natudia ia hadigua karana ese dahaka ia laulaulaia?

⁴ Mose ese Arona ena natudia ia hadigua karana be guba ai hahelaga gaukara do idia karaia horoa taudia idia hagoevaia karana ia laulaulaia. Bapatiso karana ese horoa taudia ia hagoevaia, a? Lasi, badina bapatiso karana ese kara dika ia kokia lasi, to unai ese ia hamomokania ta be ia gwauhamata Iehova Dirava ena ura sibona do ia karaia. To, horoa taudia be “Dirava ena hereva” ena ranu amo idia hagoevaia. Anina be edia mauri lalonai mai edia kudouna ibounai ida Keriso ena hadibaia herevadia idia badinaia be mai anina bada. (Efe. 5:25-27) Unai dala amo idia be idia helaga bona goeva. To, “mamoe ma haida” be edena bamona?—Ioa. 10:16.

5. Dahaka dainai ita gwau diba, “mamoe ma haida” be Dirava ena Hereva ese ia hagoevadia?

⁵ Arona ena natudia be Iesu ena mamoe ma haida o “hutuma bada” taudia idia laulaulaia lasi. (Apok. 7:9) To, “mamoe ma haida” danu be Baibel ese ia hahelagadia bona hagoevadia. Tanobada helarona idia abia taudia be Baibel lalonai Iesu ese ia bouboulaia rarana ena sivarai idia duahia neganai, unai hereva idia abidadama henidia bona “dina bona hanuaboi [Iehova ena] hesiai gaukara helagana idia karaia.” (Apok. 7:13-15) Horoa taudia bona mamoe ma haida hagoevaia gaukarana be hanaihanai idia karaia gauna. Unai dainai, idia ese hanaihanai ‘kara namodia idia karaia noho.’ (1 Pet. 2:12) Iehova ia moale badina ia itaia horoa taudia bona mamoe ma haida be idia goeva bona mai lalotamona ida, edia Mamoe Naria tauna, Iesu idia kamonai henia bona badinaia.

6. Dahaka dainai nega ibounai sibona eda kara ita sekea be mai anina bada?

⁶ Guna, Israela ena hahelaga taudia be tauanina dalanai idia goeva be mai anina bada. Hari, Iehova ena taunimanima dekenai unai ena anina be dahaka? Nega momo iseda Baibel stadi taudia idia itaia iseda Kingdom Hall idia goeva, bona iseda dabua bona toana idia goeva danu. To, hahelaga taudia edia goeva karana amo ita laloparara, bema ta ia ura Iehova do ia tomadiho henia, namona be mai ena “laloa goevagoeva” o kudouna goevana ida ia karaia. (Salamo 24:3, 4 duahia; Isa. 2:2, 3) Unai dainai, ita ese Dirava ita hesiai henia totona, eda lalona, kudouna bona tauanina idia goeva be gau badana. Unai ita karaia totona, namona be nega ibounai sibona eda kara do ita sekea. Unai ese ita do ia durua eda kara haida ita haidaua, unai amo do ita helaga. (2 Kor. 13:5) Hegeregere, bema bapatiso tauna ta be mai ena ura ida ponografi ia raraia, namona be sibona ia nanadaia, ‘Lau hahedinaraia lau be helaga tauna, a?’ Bena namona be heduru do ia tahua unai kara dika ia hadokoa totona.—Iam. 5:14.

KAMONAI KARANA AMO ITA HAHEDINARAIA ITA HELAGA

7. Levitiko 8:22-24 hegeregerena, Iesu ese dahaka haheitalai namona ia hahedinaraia?

⁷ Israela ena hahelaga taudia idia hahelagaia neganai, Mose ese Hahelaga Tauna Badana Arona bona ena natudia edia taiana idibana, ima kwakikwaki badana bona aena kwakikwaki badana be mamoe ena rarana amo ia dahua. (Levitiko 8:22-24 duahia.) Rara idia gaukaralaia karana ese ia hahedinaraia, unai hahelaga taudia be mai kamonai ida edia gaukara do idia karaia namonamo. Unai hegeregerena, Hahelaga Tauna Badana, Iesu ese horoa taudia bona mamoe ma haida dekenai haheitalai namona ia hahedinaraia. Iesu ena taiana be Dirava ena hereva sibona ia kamonai. Danu, ena imana ia gaukaralaia Iehova ena ura ia karaia totona, bona ena aena amo mauri dala helagana ia badinaia.—Ioa. 4:31-34.

8. Iehova idia tomadiho henia taudia ibounai ese dahaka idia karaia be namo?

⁸ Horoa Keristani taudia bona Iesu ena mamoe ma haida ese edia Hahelaga Tauna Badana ena abidadama karana idia tohotohoa be namo. Iehova idia tomadiho henia taudia ibounai ese Dirava ena Hereva lalonai idia noho taravatu idia badinaia be namo, unai amo lauma helaga do idia hahisia lasi. (Efe. 4:30) Idia ese ‘edia aena edia raka daladia do idia hamaoromaoroa’ be namo.—Heb. 12:13.

9. Hakaua Oreana taudia ida idia gaukara hebou tadikaka toi be dahaka idia gwau? Bona edena dala ai edia hereva ese oi idia durua oi helaga noho totona?

⁹ Hakaua Oreana taudia ida lagani momo lalonai idia gaukara hebou tadikaka toi edia hereva mani ita laloa. Idia ta ia gwau: “Horoa taudia ida lau gaukara hebou be hahenamo badana, to nega ta ta ai ia hedinarai, ena be idia be lauma helaga ese ia horodia, to idia be do goevadae lasi taudia. Unai dainai, idia hanaia laganidia lalonai egu tahua gauna be do lau gaukara goada gunalaia taudia lau badinaia totona.” Tadikaka iharuana ia gwau: “Siri haida hegeregere, 2 Korinto 10:5 be ‘Keriso badinaia karana’ idia herevalaia, bona unai ese lau ia hagoadaia gunalaia taudia lau kamonai henia bona idia ida lau gaukara hebou totona. Unai be kudouna amo ia mai badinaia karana.” Tadikaka ihatoina ia gwau: “Iehova ese ia lalokau henia gaudia lau lalokau henia, bona ia ese ia inai henia gaudia lau inai henia, bona nega ibounai iena heduru lau tahua bona ia hamoalea karadia lau karaia. Unai amo lau hahedinaraia lau be iena orea bona gunalaia taudia lau badinaia.” Unai tadikaka ia laloatao Nathan Knorr, gabeai Hakaua Oreana ena memba ta ai ia lao tauna, be lagani 1925 ai The Watchtower ena atikol ta ladana, “Birth of the Nation” (“Bese ta Ena Vara”) ena hereva ia abia dae, ena be haida ese idia abia dae lasi. Tadikaka Knorr ena badinaia karana ese unai tadikaka ia hagoadaia bada. Ataiai ita herevalaia tadikaka toi edia hereva oi laloa dobu neganai, oi do idia durua Dirava oi badinaia bona oi helaga totona.

DIRAVA ENA TARAVATU RARA DEKENAI BADINAIA AUKA

10. Dahaka dainai Dirava ena taravatu rara dekenai do ita badinaia auka be gau badana?

¹⁰ Levitiko 17:10 duahia. Iehova ese Israela taudia ia hagania mauri gaudia idauidau edia “rara” do idia ania lasi. Unai hegeregerena, Baibel ia gwau Keristani taudia danu be taunimanima bona animal edia rara do idia abia lasi. (Kara 15:28, 29) Ita gari badina ita ura lasi Iehova ese ‘ita do ia badu henia’ bona iena kongrigeisen amo ita ia atoa siri. Ia ita lalokau henia bona ita ura ia do ita badinaia. Ena be reana do ita mase, to namona be eda lalona do ita hadaia Iehova idia diba lasi taudia bona iena taravatu idia badinaia lasi taudia edia hagaria herevadia do ita dadaraia. Oibe, ita diba rara ita abia lasi dainai ma haida ese ita do idia hereva dika henia, to eda lalona ita hadaia Dirava do ita badinaia. (Iuda 17, 18) Dahaka ese ita do ia durua eda lalona ita hadaia rara do ita ania lasi o medikol dalanai rara ita abia lasi totona?—Deu. 12:23.

11. Dahaka dainai ita gwau diba, Kara Dika Ena Davana Karaia Dinana be kastom karana ta sibona lasi?

¹¹ Kara Dika Ena Davana Karaia Dinana ai, Israela ena hahelaga taudia ese animal edia rara idia gaukaralaia karana ese ita do ia durua, Dirava ena lalohadai rara dekenai ita lalopararalaia totona. Rara be mai anina bada gaudia sibona totona idia gaukaralaia. Rara idia gaukaralaia unai amo Iehova ese Israela taudia edia kara dika ia gwauatao diba. Boromakau bona nanigosi edia rara be taravatu mauana ena latanai bona vairana kahanai idia negea. (Lev. 16:14, 15, 19) Unai ese dala ia kehoa Iehova ese Israela taudia edia kara dika ia gwauatao totona. Danu, Iehova ese taravatu ia atoa bema Israela tauna ta be aniani totona animal ta ia alaia, namona be ena rara be tano dekenai do ia bubua bona tano amo ia koua, “badina be mauri gaudia ibounai edia mauri be rara.” (Lev. 17:11-14) Unai be anina lasi kastom karadia sibona, a? Lasi. Kara Dika Ena Davana Karaia Dinana ai rara idia gaukaralaia bona rara be tano dekenai do idia bubua taravatuna, be Iehova ese guna Noa bona ena natudia dekenai ia henia taravatuna hegeregerena. (Gen. 9:3-6) Iehova ese idia ia hamaorodia vamu idia ania diba, to rara ania karana ia taravatua. Keristani taudia dekenai unai ena anina be dahaka?

12. Paulo ena revareva Heberu Keristani taudia dekenai ese rara bona dika gwauatao karana be edena bamona ia herevalaia?

¹² Aposetolo Paulo be Heberu Keristani taudia ia tore henia bona rara ena hagoevaia siahuna ia herevalaia neganai, ia gwau: “Taravatu hegeregerena, kahirakahira gau ibounai be rara amo idia hagoevaia, bona bema rara idia bubua lasi, kara dika gwauatao karana be lasi.” (Heb. 9:22) Danu, Paulo ia hahedinaraia animal bouboulaia karana ese Israela taudia ia hadibaia idia be goevadae lasi taudia, bona boubou gauna hereadaena ta ese edia dika ibounai ia kokia vaitani be namo. Oibe, Mose ena Taravatu be “do idia mai gau namodia edia laulau sibona, to ia be unai gaudia edia toana korikorina lasi.” (Heb. 10:1-4) Vadaeni, Dirava ese edena dala ai kara dika do ia gwauatao?

13. Iesu ese sibona ena rara be Iehova dekenai ia henia karana be edena bamona oi laloa?

¹³ Efeso 1:7 duahia. Iesu Keriso bona ena Tamana idia lalokau henia taudia ibounai dekenai, Iesu be mai ena ura ida ‘sibona ia henia’ bona ia mase karana be mai anina bada. (Gal. 2:20) To, Iesu ese ia mase bona toreisi lou murinai ia karaia karana ese ita ia ruhaia, bona dala ia kehoa Dirava ese iseda dika ia gwauatao totona. Iesu ese ia karaia karana be Mose ena Taravatu henunai Kara Dika Ena Davana Karaia Dinana ai idia karaia gaudia ia hagugurua. Unai dina ai, hahelaga tauna badana ese idia bouboulaia animal ena rara ia abia, bona Helaga Herea Gabuna lalonai ia vareai. Unuseniai ia ese unai rara be Dirava dekenai ia henia. (Lev. 16:11-15) Unai hegeregerena, Iesu be guba dekenai ia vareai, bona ia sibona ese ena rara be Iehova dekenai ia henia. (Heb. 9:6, 7, 11-14, 24-28) Ita moale badina Iesu ena rara ita abidadama henia dainai, Dirava ese iseda dika ia gwauatao bona eda lalomamina ia goeva diba!

14, 15. Dahaka dainai Iehova ena taravatu “rara” dekenai ita lalopararalaia bona badinaia be gau badana?

¹⁴ Hari oi laloparara dahaka dainai Iehova ese ita ia taravatua gau idauidau edia “rara” do ita abia lasi, a? (Lev. 17:10) Oi laloparara dahaka dainai Dirava ena matanai rara be helaga, a? Ia dekenai rara be mauri ena badina. (Gen. 9:4) Oi laloa ita ese Dirava ena lalohadai rara dekenai do ita abia dae bona iena hahegani hegeregerena rara do ita dadaraia be maoro, a? Dirava ida maino ai ita noho totona, namona be ita ese Iesu ena mauri davalaia boubouna do ita abidadama henia bona ita abia dae iseda Havaraia Tauna dekenai rara be mai anina bada.—Kol. 1:19, 20.

¹⁵ Reana nega ta ita, eda famili tauna ta o eda tura namona ta be doketa ese do idia doria rara abia hanai totona. Unai bamona negadiai, abia hidi do ita karaia rara ena kahana maragidia do ita abia o lasi, bona edena bamona opereisen daladia do ita gaukaralaia. Unai dainai, hekwakwanai ta ia do vara lasi neganai, gau badana be do ita guriguri, tahua gaukara ita karaia bona ita hegaegae. Unai ese ita do ia durua eda lalona ita hadaia bona rara do ita dadaraia. Momokani, ita ura lasi Iehova ese ia taravatua gauna ta ita karaia bona iena lalona ita hahisia! Doketa bona taunimanima momo ese ma haida idia noia rara do idia henia totona, badina idia laloa unai dala amo ma haida idia hamauria diba. To, Iehova ena helaga taudia idia abia dae Havaraia Tauna sibona be mai ena maoro rara gaukaralaia dalana ia abia hidi totona. Ia dekenai mauri gaudia idauidau edia “rara” be helaga. Namona be ita gaukara goada iena taravatu rara dekenai ita badinaia totona. Danu, namona be ita ese kara helagadia do ita hahedinaraia, unai amo ita hamomokania Iesu ese ia bouboulaia rarana ita laloa bada. Iena rara sibona ese dala ia kehoa Dirava ese eda dika do ia gwauatao bona mauri hanaihanai ita abia totona.—Ioa. 3:16.

IEHOVA IA URA DO ITA HELAGA ENA BADINA

16. Dahaka dainai Iehova ena taunimanima idia helaga be namo?

¹⁶ Dirava ese Israela taudia be Aigupito ena igui hesiai amo ia ruhadia neganai, idia dekenai ia gwau: “Lau be Lohiabada, Aigupito tano dekena amo umui lau hakaua mai, emui Dirava do lau lao totona. Unai dainai do umui helaga, badina lau be helaga.” (Lev. 11:45) Iehova be ia helaga dainai, ia ura Israela taudia danu do idia helaga. Ita be Iehova ena Witnes taudia dainai, ita danu ita helaga be namo. Levitiko bukana ese unai ia hahedinaraia goevagoeva.

17. Hari, oi ese Levitiko bukana be edena bamona oi laloa?

¹⁷ Ita ese Levitiko bukana ena kahana haida ita herevalaia vadaeni, bona unai ita moalelaia bada. Oibe, inai stadi ese ita ia durua Levitiko bukana ita laloa bada totona. Unai buka lalonai idia noho mai anina bada herevadia ita laloa dobu karana ese ita ia durua dainai, hari ita laloparara dahaka dainai ita helaga be mai anina bada. To, dahaka hereva namodia ma haida be Levitiko bukana lalonai ita davaria diba? Iehova ena hesiai gaukara helagana ita karaia totona, Levitiko bukana ese dahaka sisiba ia henia? Stadi gabena ai unai do ita herevalaia.