Headava Namona Bona Goadana Haginia

1-3. Headava taudia ese dahaka hekwakwanai idia davaria? (Laulau ginigunana itaia.)

LAGANI 38 lalonai iena headava ia moalelaia tauna ta, ia gwau: “Bema oi gaukara goada bona oi hahedinaraia oi ura emu headava ia namo, Iehova ena hahenamo oi abia diba.” Oibe, nega aukadia lalonai, tau bona hahine be idia moale bona ta ta idia durua diba.—Aon. 18:22.

² To, headava taudia be “tauanina ai hisihisi” idia davaria danu. (1 Kor. 7:28) Dahaka dainai? Dina ta ta ai idia vara hekwakwanai ese headava ia hadikaia diba. Iseda goevadae lasi malana amo idia mai lalohisihisi herevadia, lalohadai kereredia, bona herevahereva lasi karana ese headava ai hekwakwanai ia havaraia diba. (Iam. 3:2, 5, 8) Headava taudia momo be moni gaukara idia karaia bona edia natudia idia naridia. Haida be gaukara momo idia karaia bona idia lalohekwarahi momo dainai nega be lasi edia headava maurina idia hanamoa totona. Reana moni ena hekwakwanai, gorere, o hekwakwanai ma haida dainai, edia lalokau bona hemataurai karana ia boio. Ma danu, “tauanina ena kara dikadia” hegeregere matabodaga, gwau-edeede hemarai karadia, inai heheni, heai, mama, badu momo, bona heiriheiri karadia ese headava goadana ia hadikaia diba.—Gal. 5:19-21.

³ Inai “dina gabedia” ai, momo be sibona edia namo idia laloa bona Dirava idia badinaia lasi, unai kara ese headava ia hadikaia diba. (2 Tim. 3:1-4) Danu, headava taudia be edia inai tauna badana amo sibona idia gimaia be namo. Aposetolo Petero ia gwau: “Emui inai tauna, Diabolo, be ia boiboi bada laiona bamona ia raka loaloa, do ia ania ore tauna ia tahua noho.”—1 Pet. 5:8; Apok. 12:12.

4. Edena dala ai headava namona ita moalelaia diba?

⁴ Japan ai, headava tauna ta ia gwau: “Moni ena hekwakwanai dainai nega momo lau lalometau. Bona lau be egu adavana ida lau herevahereva namonamo lasi dainai, ia danu ia lalohisihisi bada. Bona vanegai sibona gorere badana ta ia davaria. Nega haida lalometau karana dainai ai hepapahuahu.” Ena be headava lalonai hekwakwanai haida idia vara diba, to ita hanaia diba. Iehova ena heduru amo, headava taudia be headava namona idia moalelaia diba. (Salamo 127:1 duahia.) Headava ia hagoadaia daladia faiv mani ita herevalaia. Bona do ita itaia dahaka dainai headava lalonai lalokau be mai anina bada.

HEADAVA LALONAI IEHOVA BADINAIA

5, 6. Tau bona hahine ese Dirava idia badinaia totona, dahaka idia karaia be namo?

⁵ Headava ia goada totona, gau badana be tau bona hahine ese headava Ia havaraia tauna idia badinaia. (Hadibaia Tauna 4:12 duahia.) Unai idia karaia totona, namona be Iehova ena hakaua hereva namodia idia badinaia. Baibel ese Dirava ena idaunegai Israela taudia ia herevalaia, ia gwau: “Idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’” (Isa. 30:20, 21) Hari, headava taudia ese Dirava ena gadona idia “kamonai” totona, Baibel idia duahia hebou be namo. (Sal. 1:1-3) Headava taudia ese Ruma Bese Ena Tomadiho idia moalelaia, bona unai ese edia abidadama ia hagoadaia bona edia headava ia hanamoa. Tau bona hahine idia guriguri hebou be mai anina bada, badina unai ese edia headava do ia hagoadaia bena Satani ena tanobada dikana amo sibona idia gimaia diba.

⁶ Germany ai, Gerhard ia gwau: “Emai huanai idia vara hekwakwanai ese lalohisihisi ia havaraia neganai, Baibel ena sisiba namodia ese ai ia durua ai haheauka bona ta ta emai dika ai gwauatao totona. Headava ia namo totona unai bamona ita karaia be mai anina bada.” Bema headava taudia ese Dirava tomadiho henia karadia idia karaia hebou, Dirava kahirakahira do idia lao bona do idia moale.

LALOKAU DALANAI KWARA DAGINA GAUKARALAIA

7. Edena dala ai tatau ese edia kwara dagina idia gaukaralaia namonamo diba?

⁷ Tau ese ena kwara dagina ia gaukaralaia namonamo dalana ese headava ia hanamoa diba. Baibel ia gwau: “Tatau ibounai edia kwarana be Keriso, hahine ena kwarana be tau, bona Keriso ena kwarana be Dirava.” (1 Kor. 11:3) Unai hereva ese ia hahedinaraia, tau be ena kwara dagina do ia gaukaralaia namonamo—Iesu ese tatau dekenai ena kwara dagina ia gaukaralaia bamona. Iesu be ia dagedage o kara auka lasi, to lalokau, hebogahisi, manau bona lalomanada ia hahedinaraia.—Mat. 11:28-30.

8. Tau be dahaka ia karaia diba ena adavana ese ia lalokau henia bona matauraia totona?

⁸ Keristani tatau ese edia adavadia idia hamaoroa loulou lasi idia do idia matauraia totona. To, namona be ‘edia adavadia ida idia noho hebou negadiai, mai laloa namonamo ida do idia kara henia. Hahine dekenai hemataurai do idia henia, badina idia be hodu manokana bamona.’ (1 Pet. 3:7) Taunimanima vairanai bona sibona idia noho neganai, namona be tau ese ena kara bona hereva amo ia hahedinaraia ena adavana ia matauraia bona ia laloa bada. (Aon. 31:28) Tau ese unai bamona ia karaia neganai, ena adavana be ia do ia lalokau henia bona matauraia, bona Dirava ese edia headava do ia hanamoa.

HAHINE ESE MAI MANAU IDA TATAU IDIA BADINAIA

9. Edena dala ai hahine ese ia hahedinaraia ena tau ia badinaia?

⁹ Iehova lalokau henia karana ese ita do ia durua iena imana goadana henunai ita manau totona. (1 Pet. 5:6) Hahine ese Iehova ena siahu ia matauraia dalana ta be, ruma bese ida ia gaukara hebou bona ia durudia. Baibel ia gwau: “Umui hahine e, emui tatau henunai do umui noho, unai be maoro Lohiabada matanai.” (Kol. 3:18) Momokani, nega haida tau ia karaia abia hidi be adavana ese do ia abia dae lasi. To, bema ena abia hidi be Dirava ena taravatu ia utua lasi, adavana ese do ia badinaia.—1 Pet. 3:1.

10. Dahaka dainai badinaia karana be mai anina bada?

¹⁰ Hahine be ena adavana ena “durua tauna.” (Gen. 2:20) Ruma bese ese abia hidi ta idia karaia neganai, hahine be mai hemataurai ida ena lalohadai bona hemami ia gwauraia diba, to badinaia karana ia hahedinaraia be namo. Aonega tauna be ena adavana ena lalohadai do ia kamonai namonamo. (Aon. 31:10-31) Danu, badinaia karana ese ruma bese lalonai moale, maino, bona lalotamona ia havaraia. Bona tau bona hahine idia diba Dirava idia hamoalea dainai unai ese idia ia hagoadaia.—Efe. 5:22.

TA TA ENA DIKA UMUI GWAUATAO NOHO

11. Dahaka dainai dika gwauatao karana be mai anina bada?

¹¹ Headava lalonai ta ta ena dika gwauatao karana be mai anina bada. Tau bona hahine edia hetura karana do ia goada bema ‘ta ta edia kara do idia haheaukalaia noho bona mai kudouna ibounai ida do idia gwauatao heheni.’ (Kol. 3:13) To, bema tau bona hahine be guna idia vara hekwakwanai idia laloa bona ta ta idia gwauraia dika, unai ese headava ia hadikaia diba. Ruma ena haba ai ia noho maka maragina ia bada ia lao neganai, ruma ia hadikaia diba. Unai hegeregerena, iseda kudouna ai badu bona maumau karana ia bada ia lao neganai, ma haida edia dika ita gwauatao be auka. To, tau bona hahine edia headava ia namo totona, namona be ta ta edia dika idia gwauatao, Iehova ese edia dika ia gwauatao hegeregerena.—Mika 7:18, 19.

12. Edena dala ai lalokau ese “kara dika momo ia koua”?

¹² Lalokau korikorina be “ta ena kerere ia laloatao noho lasi.” Momokani, “lalokau ese kara dika momo ia koua.” (1 Kor. 13:4, 5; 1 Petero 4:8 duahia.) Unai dainai ta ita lalokau henia neganai, ena dika ita gwauatao diba, herevana ena dika be momo herea. Aposetolo Petero ia henanadai nega hida ta ena dika do ia gwauatao neganai, Iesu ia gwau: “Nega 7 lasi to nega 77.” (Mat. 18:21, 22) Iesu ia hahedinaraia Keristani tauna be hanaihanai ma haida edia dika ia gwauatao be namo.—Aon. 10:12.a

13. Dahaka ita karaia diba ta ta edia dika ita gwauatao totona?

¹³ Annette ia gwau: “Bema tau bona hahine idia ura lasi ta ta edia dika idia gwauatao, do idia badu bona abidadama heheni lasi, bona unai ese headava ia hadikaia diba. Ta ta ena dika gwauatao karana ese headava ia hanamoa bona hetura karana ia hagoadaia.” Ta ta edia dika gwauatao totona, namona be tanikiu karana bona ma haida laloa bada karana oi hahedinaraia. Namona be emu adavana dekenai hanamoa herevadia oi gwauraia. (Kol. 3:15) Dika gwauatao karana ese lalomaino bona lalotamona ia havaraia, bona Dirava ena hahenamo ita abia diba.—Roma 14:19.

HAKAUA HEREVANA HEREADAENA BADINAIA

14, 15. Hakaua Herevana Hereadaena be dahaka, bona edena dala ai headava lalonai unai be mai anina bada?

¹⁴ Oi ura ma haida ese oi do idia matauraia, ani? Ma haida ese emu lalohadai bona hemami idia hanamoa neganai, oi moale, ani? To ma ta amo inai hereva oi kamonai vadaeni, “Lau dekenai ia karaia hegeregerena, ia dekenai unai bamona do lau karaia danu.” Reana unai bamona idia hereva taudia edia hemami ita lalopararalaia. To Baibel ia gwau: “Do oi hereva lasi inai bamona: ‘Ia ese lau dekenai ia karaia hegeregerena, be lau ese ia dekenai do lau karaia.’” (Aon. 24:29) Momokani, Iesu be hekwakwanai hamaoromaoroa dalana namona ta ia gwauraia. Taunimanima momo ese unai idia diba bona idia gwauraia, Hakaua Herevana Hereadaena. Iesu ia gwau: “Umui ura taunimanima ese umui dekenai idia karaia hegeregerena, idia dekenai danu unai bamona do umui karaia.” (Luka 6:31) Iesu ena hereva anina be, taunimanima ita kara henia neganai, ita ura ita do idia kara henia hegeregerena do ita kara henia. To Iesu ia gwau lasi ta ena dika davana do ita henia. Unai hegeregerena, bema ita ura iseda headava ita moalelaia, kara namodia ita hahedinaraia be namo.

¹⁵ Headava taudia ese ta ta edia hemami idia laloa neganai, edia hetura karana do ia goada. South Africa ai, tau ta ia gwau: “Ai ura Hakaua Herevana Hereadaena be emai mauri lalonai ai badinaia. Momokani, nega haida ai lalohisihisi, to ai gaukara goada ta ta dekenai hemataurai ai hahedinaraia totona.”

16. Headava taudia be ta ta dekenai dahaka idia karaia lasi be namo?

¹⁶ Namo lasi ma haida edia vairanai emu adavana ena kerere maragidia o kara haida oi herevalaia o hevasehalaia. Laloatao, headava lalonai ita ura lasi hahedinaraia ita ese ma haida ita hereaia, hegeregere eda goada be bada, ita boiboi badabada diba, o hadikaia herevadia ita gwauraia diba. Momokani, ita be goevadae lasi bona nega haida ma haida edia lalona ita hahisia. To namo lasi headava taudia be hadikaia herevadia idia gwauraia eiava idia heatu.—Aonega Herevadia 17:27; 31:26 duahia.

17. Edena dala ai tatau ese Hakaua Herevana Hereadaena idia badinaia diba?

¹⁷ Tano haida ai, tau ese adavana ia biagua auka o botaia neganai, taunimanima do idia laloa ia be tau goadana. To Baibel ia gwau: “Haheauka tauna ese, tuari tauna goadana ia hereaia noho, bona ia sibona ena lalona ia biagua noho tauna, ese tuari dekenai hanua ia halusia tauna ia hereaia noho.” (Aon. 16:32) Bema ta ia ura tau hereadaena Iesu Keriso ia tohotohoa bona ena lalona ia biagua, namona be ena lalona ia hagoadaia. Ena adavana ia hereva dika henia o ia dadabaia tauna be lalogoada tauna lasi, bona ena hetura karana Iehova ida ia hadikaia. Salamo torea tauna Davida be goada bona gari lasi tauna, ia gwau: “Emui badu ia toreisi neganai, do umui kara dika lasi. Emui mahuta gabunai umui noho neganai, emui lalona do umui tahua, bona badu ena laloa do umui koua.”—Sal. 4:4.

“LALOKAU BE DABUA BAMONA DO UMUI HAHEDOKILAIA”

18. Dahaka dainai lalokau ita hahedinaraia noho be mai anina bada?

¹⁸ 1 Korinto 13:4-7 duahia. Headava lalonai lalokau be mai anina bada. “Inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka. Bona unai gaudia sibona lasi, to lalokau be dabua bamona do umui hahedokilaia danu, badina ia be taunimanima ia hatamonaia gauna hereadaena.” (Kol. 3:12, 14) Tau bona hahine be Keriso idia tohotohoa bona sibona ena namo tahua lasi lalokauna idia hahedinaraia, unai ese headava ia hagoadaia. Ena be kerere maragidia, gorere badadia, moni ena hekwakwanai, bona ravana dainai idia vara hekwakwanai idia vara, to headava ia goada noho diba.

19, 20. (a) Edena dala ai tau bona hahine ese headava namona bona goadana idia haginia diba? (b) Stadi gabena ai dahaka do ita herevalaia?

¹⁹ Momokani, headava ia namo totona, ta ta ita badinaia, lalokau ita hahedinaraia bona ita gaukara goada be namo. Tau bona hahine huanai hekwakwanai idia vara neganai, namo lasi headava idia hadokoa, to namona be idia gaukara goada edia headava idia hagoadaia totona. Keristani headava taudia be Iehova bona ta ta idia lalokau henia dainai, idia hekwarahi edia hekwakwanai idia hamaoromaoroa totona. Badina “lalokau be ia ore diba lasi.”—1 Kor. 13:8; Mat. 19:5, 6; Heb. 13:4.

²⁰ Inai “dina gabediai,” headava namona bona goadana haginia totona be mai ena hekwarahi. (2 Tim. 3:1) To Iehova ena heduru amo ita kwalimu diba. Namona be headava taudia ese tanobada ena matabodaga karadia dekenai idia naria namonamo. Headava taudia ese edia headava idia hadikaia diba gaudia idia dadaraia dalana be stadi gabena ai do ita herevalaia.