Edena Dala ai Iehova ese Ita Dekenai Lalokau Ia Hahedinaraia?

1. Ioane be ita ia hagoadaia dahaka ita karaia totona, bona dahaka dainai?

APOSETOLO IOANE ese 1 Ioane 3:1 ai ita ia hagoadaia Iehova ena lalokau bada ita laloa totona. Ioane ia gwau: “Tamana ena lalokau ita dekenai be bada herea.” Bema Iehova ese ita ia lalokau henia daladia ita laloa dobu, unai ese ita do ia durua ia ita lalokau henia bona iseda hetura karana ia ida do ia goada.

2. Dahaka dainai haida idia laloa Dirava be idia ia lalokau henia lasi?

² To, haida idia laloa Dirava ese idia ia lalokau henia lasi. Idia laloa Dirava ita gari henia bona ita badinaia sibona be hegeregere. Eiava hahediba hereva koikoidia dainai idia laloa Dirava be idia ia lalokau henia lasi, bona unai dainai idia ura lasi Dirava idia lalokau henia. To, haida idia laloa Dirava be ita dekenai lalokau bada ia hahedinaraia, herevana ia ita badinaia o ita badinaia lasi. Baibel oi stadilaia dainai, oi diba Iehova ena kara badana be lalokau, bona unai lalokau dainai ena Natuna ia henia mauri davalaia boubouna karaia totona. (Ioa. 3:16; 1 Ioa. 4:8) To, reana emu mauri lalonai idia vara gaudia haida dainai, do oi laloa Dirava ese oi ia lalokau henia lasi.

3. Dahaka ese ita ia durua diba Dirava ena lalokau ita lalopararalaia totona?

³ Vadaeni, edena dala ai Iehova ese ita dekenai ena lalokau ia hahedinaraia? Haere ita diba totona, namona be iseda hetura karana Iehova ida ita lalopararalaia guna. Badina Iehova be ita ia Havaraia Tauna. (Salamo 100:3-5 duahia.) Unai dainai Baibel ia gwau Adamu be “Dirava ena natuna.” Bona Iesu ese ena hahediba taudia ia hadibaia, Dirava dekenai idia gwau diba edia guba Tamana. (Luka 3:38; Mat. 6:9) Oibe, Iehova be ita dekenai mauri ia henia dainai, ia be iseda Tamana. Iehova be ita ia lalokau henia, tamana ta be ena natuna ia lalokau henia bamona.

4. (a) Edena dala ai Iehova ena kara be iseda tamadia edia kara amo ia idau? (b) Inai stadi bona stadi gabena ai dahaka do ita herevalaia?

⁴ Iseda tamadia be goevadae lasi taudia. Unai dainai idia hahedinaraia lalokau be Iehova ese ia hahedinaraia lalokauna bamona lasi. Tama haida be ruma bese namodia dekenai idia tubu daekau lasi dainai, edia mauri lalonai lalohisihisi bona dika momo idia davaria. To, Iehova be unai bamona lasi. (Sal. 27:10) Iehova ese ita ia lalokau henia bona naria daladia ita diba neganai, unai ese ita do ia durua ia kahirakahira ita lao totona. (Iam. 4:8) Inai stadi lalonai, Iehova ese lalokau ia hahedinaraia daladia foa do ita herevalaia. Bena stadi gabena ai, Iehova dekenai eda lalokau ita hahedinaraia daladia foa do ita herevalaia.

IEHOVA BE HARIHARI GAUDIA IA HENIA

5. Aposetolo Paulo be Atena taudia ia hereva henia neganai, dahaka ia gwau?

⁵ Aposetolo Paulo be Greece, Atena dekenai ia noho neganai, ia itaia unai hanua ai dirava idauidau edia kaivakuku idia noho, bona unuseniai taunimanima idia laloa unai diravadia ese idia dekenai mauri bona gau idauidau idia henia. Unai dainai Paulo ia gwau: “Dirava ese tanobada bona ia lalonai idia noho gaudia ibounai ia karaia. . . . Ia ese taunimanima ibounai dekenai mauri, laga bona gau ibounai ia henia. . . . Ia dainai ita mauri, ita loaloa bona ita noho.” (Kara 17:24, 25, 28) Iehova be ita ia lalokau henia dainai “gau ibounai ia henia,” unai amo mauri ita moalelaia diba. Unai hereva ese ia hahedinaraia gauna mani oi laloa.

6. Edena dala ai tanobada ese Dirava ena lalokau ita dekenai ia hahedinaraia? (Laulau ginigunana herevalaia.)

⁶ Tanobada be Iehova ese ia karaia bona “taunimanima dekenai ia henia.” (Sal. 115:15, 16) Saiens taudia ese moni momo idia negea guba ai idia noho gaudia idia stadilaia totona, badina idia ura tanobada bamona planeti ta do idia davaria. Ena be planeti 100 bamona idia davaria vadaeni, to saiens taudia idia moale lasi badina unai planeti ta be tanobada bamona lasi. Dirava ese tanobada ia havaraia dalana be iunives ai idia noho gaudia amo ia idau momokani. Mani oi laloa, iseda galaksi ladana Milky Way ai planeti momo herea idia noho. To, Iehova be tanobada ia karaia bona ia ura taunimanima ese idia noholaia bona do idia moale. Tanobada ia karaia namo herea. (Isa. 45:18) Unai ese ia hahedinaraia Iehova be ita ia lalokau henia bada.—Iobu 38:4, 7; Salamo 8:3-5 duahia.

7. Iehova ese ita ia havaraia dalana amo edena bamona ia hahedinaraia ita ia lalokau henia?

⁷ Iehova ese tanobada ia karaia ita noholaia totona, bona mauri durua gaudia ia henia. To, ia diba ita moale bona iseda mauri ia namo totona, gau ma haida ia karaia danu be namo. Tama sina ese edia natuna idia lalokau henia bona laloa bada neganai, natuna be unai do ia mamia. Iehova ese taunimanima be ena toana hegeregerena ia karaia dainai, idia ura Dirava ese idia do ia lalokau henia bona naria. (Gen. 1:27) Danu Iesu ia gwau: “Dirava dibaia totona idia hitolo taudia be idia moale, badina guba Basileia be idia edia.” (Mat. 5:3) Iehova be lalokau Tamana dainai, tauanina dalanai bona iseda hetura karana ia ida ita hagoadaia totona, “ita dekenai gau momo herea ia henia ita moalelaia totona.”—1 Tim. 6:17; Sal. 145:16.

IEHOVA BE ITA DEKENAI HEREVA MOMOKANI IA HADIBAIA

8. Dahaka dainai ita ura “kara momokani ena Dirava” ese ita ia lalokau henia?

⁸ Tamadia be edia natudia idia lalokau henia bona idia ura dika amo do idia gimaia. To, tama sina momo be Baibel ai idia noho hakaua herevadia idia badinaia lasi dainai, edia natudia idia naria namonamo lasi. Unai dainai nega momo edia mauri lalonai daradara bona lalohisihisi ia vara. (Aon. 14:12) To, Iehova be “kara momokani ena Dirava.” (Sal. 31:5) Iena natudia ia lalokau henia bona iena hereva momokani ena diari be idia dekenai ia henia, unai amo edia mauri bona tomadiho karadia lalonai do ia hakaua. (Salamo 43:3 duahia.) Iehova ese dahaka hereva momokani ia hahedinaraia, bona edena dala ai unai ese ia hahedinaraia ita ia lalokau henia?

9, 10. (a) Edena dala ai Iehova be ena ladana bona kara be ita dekenai ia hadibaia amo ena lalokau ia hahedinaraia? (b) Edena dala ai Iehova be ita dekenai ena ura ia hadibaia amo ena lalokau ia hahedinaraia?

⁹ Ginigunana be, Iehova ese hereva momokani be ita dekenai ia hadibaia. Iena ladana ia gwauraia hedinarai, bona unai be Baibel ai ia hedinarai momo. Unai amo Iehova be ita kahirakahira ia noho bona ia ura ia ita dibaia. (Iam. 4:8) Iehova be ita dekenai ena kara ia hadibaia, unai amo ita diba ia be edena bamona Dirava. Iunives ese ena siahu bona aonega ia hahedinaraia. Danu Baibel amo ia hahedinaraia ia be kara maoromaoro bona lalokau bada Diravana. (Roma 1:20) Iehova be tama ta bamona, mai ena goada, aonega, kara maoromaoro, bona lalokau ia hahedinaraia, unai amo iena natudia be ia idia tura henia diba.

¹⁰ Danu, Iehova be ita dekenai ena ura ia hadibaia. Bona ia hahedinaraia ita be ena ruma bese badana ta lalonai ita noho. Danu, ita ia hadibaia dahaka ita karaia be namo, unai amo ita ibounai be lalotamona bona maino ai do ita noho. Baibel ia hahedinaraia Dirava ese maoro ia henia lasi taunimanima be sibona idia naria bona sibona edia dala idia badinaia totona. Badina bema unai bamona idia karaia, dika do idia davaria. (Ier. 10:23) Iehova ia diba ita dekenai dahaka be namo. Bona ena lohia siahuna ita abia dae bona badinaia neganai, maino do ita abia bona mauri do ita moalelaia. Iehova ena lalokau bada dainai, ita dekenai unai hereva momokani ia hadibaia.

11. Iseda lalokau Tamana Iehova ese dahaka gwauhamata ia henia?

¹¹ Lalokau tamana be ena natudia edia vaira negana ia laloa bada, badina ia ura edia mauri ia namo bona idia moale. To madi, taunimanima momo be vaira negana idia diba lasi, eiava edia mauri lalonai anina lasi gaudia idia tahua. (Sal. 90:10) Ita be Iehova ena natudia bona ita ia lalokau henia dainai, ia gwauhamata vaira negana ai mauri namona do ia henia. Unai dainai iseda mauri be mai anina.

IEHOVA BE SISIBA BONA MATAHAKANI IA HENIA

12. Iehova ese Kaino bona Baruku ia sisiba henia karana ese edena bamona ia hahedinaraia idia ia lalokau henia bona ia laloa bada?

¹² “Badina be dahaka oi badu noho? Badina dahaka oiemu vairana ia metau noho? Bema kara namo oi karaia vadaeni, be oiemu boubou do lau abia dae. . . . Kara dika be ia ura biagua oi, to oi ese do oi halusia be namo.” (Gen. 4:6, 7) Iehova be nega korikori ai unai sisiba ia henia. Danu, ia hadibaia dahaka ia karaia be namo dika ia davaria lasi totona. Iehova ese Kaino ia hadibaia be maoro, badina ena kara ese dika bada ia havaraia diba. To madi, Kaino be Dirava ena hereva ia kamonai lasi, unai dainai ia karaia kerere ena ahuna ia abia. (Gen. 4:11-13) Ieremia ena seketere, Baruku, ia lalomanoka bona lalohisihisi neganai, Iehova ese sisiba ia henia, unai amo ia do ia durua ena hekwakwanai ia lalopararalaia totona. To, Baruku be Kaino bamona lasi, badina Iehova ena sisiba ia abia dae bona ia mauri.—Ier. 45:2-5.

13. Dahaka dainai Iehova be ena hesiai taudia ese idia davaria hahetoho ia koua lasi?

¹³ Paulo ia gwau: “Iehova ese ia lalokau henia tauna ia matahakani henia, momokani, ia ese iena natuna ai ia halaoa taudia ibounai ia panisia.” (Heb. 12:6) To, matahakani be panisia karana sibona lasi. Dala idauidau ai matahakani ita abia diba. Baibel ai haheitalai momo idia noho, unai ese ia hahedinaraia Dirava ena hesiai taudia be hahetoho badadia idia davaria, bona matahakani idia abia be namo bona unai ese idia ia durua. Mani Iosepa, Mose bona Davida ita laloa. Idia davaria hahetoho lalonai Iehova ese ia durua bona Ia gaukaralaia ena ura ia hagugurua totona. Edia sivarai be Baibel ai ita duahia neganai, ita itaia Iehova be ena hesiai taudia ia naria bona lalokau henia.—Aonega Herevadia 3:11, 12 duahia.

14. Edena dala ai Iehova ena matahakani ese ia hahedinaraia ita ia lalokau henia?

¹⁴ Iehova ena matahakani ese gau ma ta ia hahedinaraia. Bema kerere idia karaia taudia be Iehova ena matahakani idia abia dae bona idia helalo-kerehai, edia “dika do ia gwauatao momokani.” (Isa. 55:7) Unai hereva ena anina be dahaka? Davida be Iehova ese kara dika ia gwauatao karana ia herevalaia, ia gwau: “Ia ese egu kara dika ibounai ia gwauatao noho. Ia ese egu gorere ibounai dekena amo lau ia hamauria noho. Lauegu mauri be mase ena guri dekena amo, Lohiabada ese ia hamauria noho. Ia ese lalokau bona bogahisihisi lau dekenai ia henia noho. Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni.” (Sal. 103:3, 4, 12) Namona be hanaihanai Iehova ese sisiba ia henia neganai, ita badinaia haraga bona ita abia dae. Unai bamona ia karaia badina ita ia lalokau henia bada.—Sal. 30:5.

IEHOVA ESE ITA IA GIMAIA

15. Dahaka ese ia hahedinaraia Iehova ena matanai ena hesiai taudia be dava bada gauna bamona?

¹⁵ Lalokau tamana ta ia ura ena ruma bese be dika amo do ia gimaia. Iseda guba Tamana Iehova danu be unai bamona ia karaia. Salamo torea tauna be Iehova dekenai ia gwau: “Ia ese iena bese taudia, ia idia abidadama henia taudia, edia mauri ia gimaia noho, bona kara dika taudia edia siahu dekena amo, ia ese iena taudia ia hamauria noho.” (Sal. 97:10) Oi dekenai emu matana be mai anina bada hegeregerena, Iehova dekenai ena taunimanima be mai anina bada. (Sekaraia 2:8 duahia.) Iehova matanai ena hesiai taudia be dava bada gauna bamona!

16, 17. Edena dala ai idaunegai bona hari Iehova ese ena taunimanima ia gimaia?

¹⁶ Dala ta be Iehova ese ena aneru ia gaukaralaia ena hesiai taudia ia gimaia totona. (Sal. 91:11) Asuria ena tuari taudia idia ura Ierusalema idia hadikaia neganai, aneru ta ese hanuaboi tamona lalonai unai tuari taudia 185,000 ia hamasea. (2 Kin. 19:35) Aneru ta ese aposetolo Petero bona Paulo be dibura ruma amo ia ruhadia. (Kara 5:18-20; 12:6-11) Iseda negai danu, Iehova ese ita ia gimaia noho. Hedikwota ese idia siaia tauna ese Africa ena brens ofesi ta ia vadivadi henia murinai, ena ripoti ai ia gwau unai tano ai politikol bona tomadiho ena hepapahuahu idia vara momo bona dika bada ia vara. Tuari, ruma bona stoa idia hadikaia, hahine idia reipia, bona ala-ala be bada bona unai tano ai dika momo idia vara. Tadikaka bona taihu momo be edia ruma bona kohu idia haboioa, to idia ta ia mase lasi. Idia henanadai edia mauri be edena bamona neganai, mai kiri ida idia gwau: “Gau ibounai be namo. Iehova ai tanikiu henia!” Iehova ena lalokau idia mamia.

¹⁷ Nega haida Iehova ena hesiai taudia haida idia hamasea, Stefano dekenai ia vara bamona. To, Ia ese iena taunimanima ibounai dekenai sisiba ia henia Satani ena koikoi karadia dekenai idia naria namonamo totona, unai amo idia ia gimaia. (Efe. 6:10-12) Iehova be ena Hereva bona ena orea amo idia mai buka bona magasin amo ita ia durua, unai amo ita diba taga, matabodaga karadia bona dagedage karadia, Intanet gaukaralaia kerere, bona unai bamona gaudia ese dika idia havaraia diba. Momokani, Iehova be lalokau tamana ta bamona, ena taunimanima edia mauri bona namo ia laloa bada.

HAHENAMO BADANA TA

18. Iehova ena lalokau be edena bamona oi laloa?

¹⁸ Iehova ese ita dekenai lalokau ia hahedinaraia daladia haida sibona ita herevalaia, to Mose bamona ita laloa diba. Mose be ena mauri ibounai lalonai Iehova ena hesiai gaukara ia karaia dalana ia laloa neganai, ia gwau: “Daba daba ibounai oiemu lalokau badana dekena amo, ai do oi hahonua, vadaeni aiemai mauri dinadia ibounai lalonai, mai moale danu do ai noho.” (Sal. 90:14) Iehova ese ita ia lalokau henia dainai, unai be hahenamo badana. Aposetolo Ioane bamona, do ita gwau: “Tamana ena lalokau ita dekenai be bada herea.”—1 Ioa. 3:1.