RAU 1 AMO | GURIGURI BE MAI ENA NAMO, A
Dahaka Dainai Dirava Ia Ura Ia Ita Guriguri Henia?
Dirava ia ura iena turana ai ita lao.
Tura namodia edia hetura karana ia goada totona, herevahereva karana be mai anina bada. Unai hegeregerena Dirava ia ura ia ida do oi herevahereva, unai amo dala do ia kehoa ia oi tura henia totona. Ia gwau: ‘Oi ese lau dekenai do oi boiboi, ma lau dekenai do oi guriguri henia neganai, lau ese oi dekenai do lau kamonai henia.’ (Ieremia 29:12) Dirava oi guriguri henia neganai, ia ‘kahirakahira do oi lao bona ia be oi kahirakahira do ia mai.’ (Iamesi 4:8) Baibel ia gwau: “Lohiabada be ia dekenai idia boiboi taudia . . . kahirakahira ia noho.” (Salamo 145:18) Dirava oi guriguri henia hanaihanai neganai, oi be iena turana ai do oi lao.
“Lohiabada be ia dekenai idia boiboi taudia . . . kahirakahira ia noho.”—Salamo 145:18
Dirava ia ura oi ia durua.
Iesu ia gwau: “Umui ta ena natuna mero be paraoa totona ia noinoi, ia dekenai nadi do oi henia, a? Eiava bema gwarume totona ia noinoi, ia dekenai gaigai do oi henia, a? Unai dainai, bema umui . . . ese emui natudia dekenai harihari gaudia namodia umui henia diba, namona be umui diba momokani, emui Tamana, guba ai ia noho ese gau namodia be idia noinoi taudia dekenai do ia henia!” (Mataio 7:9-11) Momokani, Iehova ia ura ia dekenai oi guriguri, badina ‘ia be oi ia laloa bada’ bona ia ura oi ia durua. (1 Petero 5:7) Ia ura emu hekwakwanai be ia oi hamaoroa. Baibel ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.”—Filipi 4:6.
Taunimanima dekenai Dirava dibaia urana ia noho.
Diba bada taudia ese edia tahua gaukara amo idia davaria, taunimanima momo idia ura Dirava idia guriguri henia. Dirava be lasi lalohadaina bona Dirava ia noho idia daradaralaia taudia ese unai lalohadai idia abia danu.a Unai ese ia hahedinaraia Dirava ese taunimanima ia havaraia neganai, idia dekenai unai ura ia henia. Unai dainai Iesu ia gwau: “Dirava dibaia totona idia hitolo taudia be idia moale.” (Mataio 5:3) Dirava ita dibaia dalana ta be hanaihanai ia do ita hereva henia.
Bema Dirava ita guriguri henia, ita dekenai dahaka namo do ia havaraia?
a Lagani 2012 ai Pew Research Center ena tahua gaukarana ese ia hahedinaraia, United States ai, Dirava be lasi lalohadaina bona Dirava ia noho idia daradaralaia taudia 11 pesen be hua ta lalonai nega tamona sibona idia guriguri.