Baibel Lalopararalaia Totona Heduru Tahua

Mani oi laloa, oi be nega ginigunana idau tano ta oi vadivadi henia. Oi ese unai tano taudia, bona edia kastom idauidau bona aniani dekenai oi manada lasi, bona idia gaukaralaia moni oi diba lasi. Momokani do oi hesiku, ani?

Nega ginigunana Baibel oi duahia neganai, reana unai bamona hemami oi abia danu. Idaunegai tanona dekenai idia karaia gaudia oi laloa, bona sibona oi laloa oi be unai idau tano ai oi noho bamona. Unuseniai oi ese Pilistia taudia oi hedavari henia, bona oi itaia edia kastom karadia, hegeregere ‘dabua idia darea’ karana eiava edia aniani ladana mana bona idia gaukaralaia koini ladana drekma oi dibaia danu. (Esodo 16:31; Iosua 13:2; 2 Samuela 3:31; Luka 15:9) Unai gaudia ibounai ese oi dekenai daradara ia havaraia diba. Unai hegeregerena, idau tano ta oi vadivadi henia neganai, ta ese unai gaudia ia gwauraia hedinarai karana do oi moalelaia, ani?

IDAUNEGAI HEDURU IDIA ABIA DALANA

Lagani 1,500 gunanai toretore helagadia idia torea negana amo, heduru dalana ia noho, unai amo taunimanima ese Baibel idia lalopararalaia diba. Hegeregere, Israela besena ia gunalaia tauna ginigunana, Mose, be Iehova ese ia henia Taravatu ia gwauraia hedinarai namonamo.​—Deuteronomi 1:5.

Lagani 1,000 murinai, Baibel idia hadibaia namonamo taudia haida idia noho. Bena lagani 455 B.C.E. ai, Iuda taudia momo bona natudia danu be Ierusalema taoni ena aria dekenai idia haboua. Unuseniai Baibel idia hadibaia taudia ese buka helaga idia duahia badabada. Bona taunimanima idia durua, idia duahia gauna ena anina idia lalopararalaia totona.​—Nehemia 8:1-8; NWT.

Lagani 400 murinai, Iesu Keriso be unai bamona hadibaia gaukarana ia karaia danu. Oibe, taunimanima idia diba ia be hadibaia tauna. (Ioane 13:13) Ia ese taunimanima ta ta bona hutuma ia hadibaia danu. Nega ta, ia ese taunimanima hutuma ia hereva henidia, bona idia dekenai Ororo Harorona ia gwauraia, bona “hutuma be ena hadibaia dalana dekenai idia hoa bada.” (Mataio 5:1, 2; 7:28) Lagani 33 C.E. ai, Iesu ese ena hahediba taudia rua ida Ierusalema kahirakahira ia noho hanua ta dekenai idia raka lao noho lalonai, idia dekenai “Toretore Helagadia edia anina ia herevalaia goevagoeva.”​—Luka 24:13-15, 27, 32.

Iesu ena hahediba taudia danu be Dirava ena Hereva idia hadibaia taudia. Nega ta, Etiopia tauna ta be Toretore Helagadia ena kahana ta ia duahia noho. Hahediba tauna Filipo ese Etiopia tauna ia itaia bona ia nanadaia: “Oi duahia gaudia oi lalopararalaia, a?” Bena Etiopia tauna ia haere: “Edena bamona do lau laloparara bema ta ese lau ia hadibaia lasi?” Bena Filipo be ia dekenai Toretore Helagadia ena kahana ena anina ia hahedinaraia namonamo.​—Kara 8:27-35.

HARI INAI NEGAI HEDURU IA NOHO

Idaunegai idia noho Baibel hadibaia taudia bamona, hari inai negai Iehova ena Witnes taudia ese tanobada hegegemadai tano 239 ai hadibaia gaukarana idia karaia noho. (Mataio 28:19, 20) Wiki ta ta ai, idia ese taunimanima 9 milioni mai kahana idia durua Baibel idia lalopararalaia totona. Idia durua taudia momo be Keristani lasi ruma besedia amo idia mai. Idia ese edia ruma eiava idia dekenai ia hegeregere gabuna ta ai davana lasi Baibel stadi idia abia. Idia haida be Intanet amo mobael fon, eiava kompiuta idia gaukaralaia Baibel stadi idia abia totona.

Bema oi ura Baibel stadilaia dalana dekenai hereva ma haida oi diba, Iehova ena Witnes tauna ta amo heduru oi tahua. Momokani, do oi itaia Baibel be buka ta sibona lasi, to ia be mai ena namo “hadibaia totona, sisiba henia totona, gau idauidau hamaoromaoroa totona, bona kara maoromaoro ai matahakani henia totona.” Unai amo oi be Dirava ena hesiai tauna ai do oi lao, danu do oi ‘hegeregere momokani, bona do oi noho hegaegae gaukara namodia ibounai oi karaia totona.’​—2 Timoteo 3:16, 17.