“Oi Danu Do Ita Lao”

1, 2. (a) Iehova ia gwau iseda nega ai dahaka do ia vara? (b) Inai stadi ai edena henanadai do ita haerelaia? (Laulau ginigunana herevalaia.)

IEHOVA ese iseda nega ia herevalaia neganai, ia gwau: “Unai dinadia lalonai tau ibounai 10, gado idauidau ibounai besedia dekena amo, ese Iuda tauna ta dekenai do idia mai, iena dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.’” (Sek. 8:23) Unai tatau 10 hegeregerena, tanobada helarona idia abia taudia ese Iuda tauna ena “dabua do idia dogoatao.” Idia be mai moale ida horoa Keristani taudia, “Dirava ena Israela” unai, idia bamoa, badina idia diba Iehova ese iena horoa taudia ia hanamodia noho.—Gal. 6:16.

² Peroveta tauna Sekaraia hegeregerena, Iesu be Dirava ena taunimanima ese idia mamia lalotamona ia herevalaia danu. Ia gwau iena murinai idia raka taudia be orea rua, orea ta be “seri maragi” bona ma ta be “mamoe ma haida,” to ia gwau idia ibounai be “mamoe serina tamona” bona edia “mamoe naria tauna be tamona.” (Luka 12:32; Ioa. 10:16) To, unai orea rua edia hetura karana dainai inai henanadai idia vara: (1) Mamoe ma haida ese hari idia noho horoa taudia ibounai edia ladadia idia diba be namo, a? (2) Horoa taudia ese sibodia be edena bamona idia laloa be namo? (3) Bema Memorial negana ai ta be paraoa bona wain ia abia, edena bamona ia do oi kara henia? (4) Paraoa bona wain idia abia taudia edia namba ia bada karana do oi lalohekwarahilaia, a? Mani unai henanadai ta ta ita laloa.

HOROA TAUDIA IBOUNAI EDIA LADADIA ITA DIBA BE NAMO, A?

3. Dahaka dainai ita diba lasi daidia be guba helarona do idia abia taudia korikoridia?

³ Mamoe ma haida ese hari idia noho horoa taudia ibounai edia ladadia idia diba be namo, a? Lasi. Dahaka dainai? Badina ena be ta be Dirava ese guba maurina totona ia boiria, to unai ese ia hamomokania lasi ia be guba dekenai do ia daekau. Unai dainai Satani ena hahekau henunai “peroveta koikoi taudia do idia hedinarai, . . . bona bema mai dalana Dirava ese ia abia hidi taudia danu do idia hakaua kerere.” (Mat. 24:24) Horoa Keristani tauna ese ena guba ahuna do ia abia eiava lasi be ta ia diba lasi, to Iehova sibona ese do ia abia hidi daika be unai ahuna do ia abia. Oibe, bema horoa tauna ta be ena abidadama dekenai ia gini goada ela bona ia mase o “hisihisi badana” ia do vara lasi neganai, Iehova ese unai abia hidi do ia karaia bona ia dekenai maka ginigabena do ia henia. (Apok. 2:10; 7:3, 14) Unai dainai hari ita diba lasi daidia be guba helarona do idia abia taudia korikoridia.^[1]

4. Bema horoa taudia ibounai edia ladadia ita diba lasi, edena bamona idia danu do ita lao?

⁴ Bema tanobada ai idia do noho horoa Keristani taudia ibounai edia ladadia ita diba lasi, edena dala ai mamoe idaudia be idia danu do idia lao? Sekaraia bukana ese ia perovetalaia tatau 10 mani ita laloa. Unai taudia ese Iuda tauna ena “dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.’” Ena be unai siri ese Iuda tauna tamona ia gwauraia, to inai hereva “oi” ese taunimanima momo o orea ta ia herevalaia. Unai dainai horoa taudia ta ta edia ladana ita diba bena idia ta ta murinai ita lao be anina lasi. To, namona be orea ta bamona idia ita laloa bona ita durudia. Baibel ia gwau lasi ita be tau ta murinai do ita lao. Badina Iesu sibona be iseda Hakaua Tauna.—Mat. 23:10.

HOROA TAUDIA ESE EDENA BAMONA SIBODIA IDIA LALOA?

5. Horoa taudia ese edena hakaua herevana idia laloa be namo, bona dahaka dainai?

⁵ Memorial negana ai paraoa bona wain idia abia taudia ese 1 Korinto 11:27-29 (duahia) ena hakaua hereva idia laloa namonamo be namo. Aposetolo Paulo ena hereva ena anina be dahaka? Bema horoa tauna ta be Iehova ia tura henia noho lasi, ia ese paraoa bona wain ia abia be kara maorona lasi. (Heb. 6:4-6; 10:26-29) Unai hakaua herevana dainai, horoa Keristani taudia idia diba idia be guba helarona ena ahuna idia do abia lasi. Unai dainai namona be idia ‘hekwarahi noho edia tahua gauna idia abia totona, unai davana be guba lao boiboina, Dirava ese Keriso Iesu amo ia henia gauna.’—Fili. 3:13-16.

6. Horoa taudia ese sibodia be edena bamona idia laloa be namo?

⁶ Paulo ese horoa Keristani taudia ia noia, ia gwau: “Umui abia boiboi herevana hegeregerena, mai maoromaoro ida do umui raka.” Edena dala ai unai do idia karaia? Paulo ma ia gwau: “Nega ibounai do umui manau, do umui lalomanada, bona do umui boga-auka, bona mai lalokau ida umui ta ta emui kara do umui haheaukalaia. Do umui gaukara goada lauma helaga ese ia henia lalotamona karana umui badinaia totona, bona maino ese umui do ia hatamonaia.” (Efe. 4:1-3) Iehova ena lauma ese ita ia durua ita lalomanau totona. (Kol. 3:12) Oibe, horoa taudia be idia manau dainai, idia gwau lasi idia be lauma helaga ena siahu bada idia abia. Eiava edia diba be bada; o edia kara amo idia hahedinaraia idia be ma haida idia hereaia. Bona idia ese paraoa bona wain do idia abia taudia idia abia hidi lasi, badina Iehova sibona ese unai abia hidi do ia karaia.

7, 8. Horoa taudia be dahaka idia ura lasi, bona dahaka dainai?

⁷ Ena be horoa taudia ese idia abia helarona be hahenamo namona, to idia ura lasi ma haida ese edia ladana idia abia isi. (Efe. 1:18, 19; Filipi 2:2, 3 duahia.) Iehova ena lauma helaga sibona ese idia ta ta ia abia hidi neganai, ta be unai ia diba lasi. Unai dainai ta be paraoa o wain ia abia matamaia neganai, ma haida be unai idia abia dae haraga lasi. Momokani, Baibel ia gwau, bema ta ia laloa ia be Dirava ese ia abia hidi, namona be edia kara ita tahua namonamo. (Apok. 2:2) Oibe, horoa taudia be ma haida idia hedavari henia neganai, namo lasi idia hahedinaraia idia be horoa taudia. Danu, namo lasi sibona idia laloa bada eiava edia vaira nega helarona idia heagilaia bona Dirava ese idia ia horoa dalana be ma haida dekenai idia gwauraia.—1 Kor. 1:28, 29; 1 Korinto 4:6-8 duahia.

⁸ Ma danu, horoa taudia idia laloa lasi idia be orea idauna ta. Danu, horoa taudia ma haida idia tahua lasi, idia moale hebou eiava sibona edia Baibel stadi idia karaia totona. (Gal. 1:15-17) Unai bamona kara ese kongrigeisen ia hapararaia diba bona lauma helaga ena gaukara ia hadikaia diba, unai amo maino bona lalotamona do ia noho lasi.—Roma 16:17, 18 duahia.

EDENA BAMONA DO OI KARA?

9. Paraoa bona wain ia abia tauna be edena bamona do ita kara henia? (Maua ladana “Lalokau be Dala Kererena ai Ia Kara Lasi” itaia.)

⁹ Memorial paraoa bona wain ia abia tauna be edena bamona do oi kara henia? Iesu ese ena hahediba taudia ia hamaoroa: “Umui ibounai be tadikaka.” Ma ia gwau: “Sibona ia abia isi tauna be do idia hamanaua, bona sibona ia hamanaua tauna be do idia abia isi.” (Mat. 23:8-12) Unai dainai ma ta abia isi karana be kerere, ena be idia be Keriso ena horoa tadikaka. Baibel ese ita ia hagoadaia ita idia hakaua taudia edia abidadama ita tohotohoa totona, to ia gwau lasi edia ladana do ita abia isi. (Heb. 13:7) Momokani, Baibel ia gwau haida ita “matauraia bada be namo.” To, idia be horoa taudia dainai ita matauraidia bada, a? Lasi. Idia ita matauraia bada badina idia ese “dala maorona ai naria gaukarana idia karaia” bona “mai edia goada ida Dirava ena hereva idia herevalaia bona idia hadibaia.” (1 Tim. 5:17) Unai dainai bema haida ese horoa taudia idia hanamoa bada, idia dekenai unai be hemarai karana. Danu, bema horoa Keristani taudia ita laloa bada, reana do ia auka idia manau totona. (Roma 12:3) Ita ura lasi Keriso ena tadikaka ita hahekwakwanaidia!—Luka 17:2.

10. Edena dala ai horoa Keristani taudia ita matauraia diba?

¹⁰ Edena dala ai Iehova ese ia horoa taudia ita matauraia diba? Namo lasi Dirava ese idia ia horoa dalana ita henanadailaia. Bona ma haida edia mauri ai idia vara gaudia lalonai ita vareai kava lasi. (1 Tes. 4:11; 2 Tes. 3:11) Danu, namo lasi ita laloa, horoa tauna ta be unai ahuna ia abia badina ena tama sina, adavana, o varavara ma ta danu be horoa tauna. Dirava be unai ia laloa dainai, abia hidi ia karaia lasi. (1 Tes. 2:12) Danu, namo lasi horoa taudia edia adavadia ita nanadaia, ita gwau: ‘Vaira nega ai emu adavana be oi ida tanobada Paradaisona ai do ia noho lasi dainai, emu hemami be edena bamona?’ Badina unai ese edia lalona ia hahisia diba. To, ita diba momokani Iehova ese ena imana do ia kehoa bona ‘mauri gaudia ibounai edia bogadia do ia hakunua.’—Sal. 145:16 BHḡ.

11. Edena dala ai sibona ita gimaia diba?

¹¹ Dala maorona ai, horoa Keristani taudia idia kara henia taudia be sibodia idia gimaia. Baibel ia gwau “tadikaka koikoidia” be hunia dalanai kongrigeisen lalonai idia vareai diba. (Gal. 2:4, 5; 1 Ioa. 2:19) Inai koikoi taudia be reana do idia gwau idia be horoa taudia. Ma danu, horoa Keristani taudia haida be edia abidadama idia rakatania diba. (Mat. 25:10-12; 2 Pet. 2:20, 21) Bema ma haida abia isi karana ena tarapu ita dadaraia, unai taudia ese hereva momokani amo ita do idia hakaua kerere lasi. Danu, bema nega daudau lalonai Dirava ia hesiai henia tauna ta ese ena abidadama ia rakatania, iseda abidadama be do ia manoka lasi.—Iuda 16.

PARAOA BONA WAIN IDIA ABIA TAUDIA EDIA NAMBA

12, 13. Dahaka dainai paraoa bona wain idia abia taudia edia namba ia bada daekau karana do ita lalohekwarahilaia lasi?

¹² Vanegai laganidia ai, Memorial hebouna ai momo be paraoa bona wain idia abia. To, idia hanaia lagani momo lalonai, ita itaia paraoa bona wain idia abia taudia edia namba be ia diho. Hari edia namba ia bada dainai do ita lalohekwarahi, a? Lasi. Mani inai badina haida ita laloa.

¹³ “Iehova be ena taunimanima ia diba.” (2 Tim. 2:19) Memorial negana ai, paraoa bona wain idia abia taudia edia namba idia duahia taudia be idia diba lasi daidia be guba dekenai do idia daekau. Badina idia haida be idia laloa namonamo lasi bona paraoa bona wain idia abia kava. Ma haida be guna paraoa bona wain idia abia taudia, to hari idia abia lasi. Haida be kwara gorere idia abia dainai, idia laloa idia be Keriso ida guba dekenai do idia lohia. Unai dainai, paraoa bona wain idia abia taudia edia namba ese tanobada ai idia do noho horoa taudia edia namba korikorina ia hahedinaraia lasi.

14. Hisihisi badana ia matamaia neganai, horoa taudia hida be tanobada ai do idia noho?

¹⁴ Iesu be horoa taudia abia totona ia mai neganai, idia momo be tanobada ena kahana momo dekenai do idia noho. Baibel ese unai nega ia herevalaia neganai, ia gwau: “[Iesu] be kibi regena bada ida ena aneru do ia siaia, bona idia ese not, saut, ist, bona west amo Dirava ena abia hidi taudia do idia haboua, guba ena kahana ta amo ela bona ena kahana ma ta dekenai.” (Mat. 24:31) Baibel ia gwau dina gabediai, horoa taudia edia orea maragina sibona be tanobada ai do ia noho. (Apok. 12:17) To, hisihisi badana ia matamaia neganai, horoa taudia hida be tanobada ai do idia noho be Baibel ese ia gwauraia lasi.

15, 16. Iehova ese horoa taudia ia abia hidi dalana be edena bamona ita laloa be namo?

¹⁵ Iehova sibona ese horoa taudia do ia boiria negana do ia abia hidi. (Roma 8:28-30) Iesu ia mase bona toreisi lou murinai, Iehova ese horoa taudia ia abia hidi matamaia, anina be aposetolo edia negai idia noho Keristani taudia ibounai be horoa taudia. To aposetolo edia nega amo ema bona dina gabedia ia matamaia negana ai, idia gwau Keriso idia badinaia taudia momo be Keristani taudia koikoidia, bona Iesu ese idia be “ava dikadia” ida ia hahegeregerea. To unai negai danu, Iehova ese abidadama taudia haida ia horoa, bona Iesu ese idia ia gwauraia “witi.” (Mat. 13:24-30) Dina gabediai, Iehova ese horoa taudia ia do abia hidi noho.^[2] Bema ia naria ela bona dina gabedia edia dokonai bena horoa taudia haida ia abia hidi, ita be daika, ena aonega ita henanadailaia totona? (Isa. 45:9; Dan. 4:35; Roma 9:11, 16 duahia.)^[3] Namo lasi ita be idia moale lasi gaukara taudia bamona, edia biaguna ese adorahi 5 oklok amo idia gaukara taudia ia kara henia dalana dainai idia maumau.—Mataio 20:8-15 duahia.

¹⁶ Horoa taudia ibounai be “igui hesiai tauna mai ena kamonai bona mai ena kara maoromaoro” oreana taudia lasi. (Mat. 24:45-47) Aposetolo edia nega bamona, hari Iehova bona Iesu be haida sibona amo hutuma idia ubua. Aposetolo edia negai, horoa Keristani taudia haida sibona ese Keristani Grik Toretoredia idia torea. Hari inai negai danu, horoa Keristani taudia haida sibona ia abia hidi “nega korikori ai . . . aniani” idia henia totona.

17. Inai stadi ai dahaka oi dibaia?

¹⁷ Inai stadi amo dahaka ita dibaia? Iehova ese abidadama taudia dekenai ahuna rua do ia henia—horoa taudia dekenai guba maurina bona mamoe ma haida dekenai tanobada maurina. Unai orea rua taudia ese unai ahuna idia abia totona, namona be edia abidadama dekenai idia gini goada bona idia manau. Danu, namona be mai lalotamona ida idia noho, bona kongrigeisen lalonai maino idia havaraia be namo. Inai dina gabedia edia dokona ia kahirakahira lalonai, namona be iseda lalona ita hadaia Keriso ena hahekau henunai ita noho totona.