Oi Ura Oi Abia Dae Herevadia Be Baibel Ida Oi Hahegeregerea, A?

OI LALOA oi be Keristani tauna o hahinena, a? Bema oibe, vadaeni tanobada ai taunimanima bilioni rua huanai, oi be idia ta, badina idia danu idia gwau idia be Keriso murinai idia raka. Hari inai negai, dubu momo idia gwau idia be Keristani taudia, to edia hadibaia hereva bona lalohadai dekenai idia lalotamona lasi. Unai dainai, reana oi abia dae herevadia be Keristani taudia ma haida edia amo ia idau. To oi abia dae herevadia oi laloa bada be namo o lasi? Oibe, badina oi ura Baibel ese ia hadibaia Keristani mauri dalana oi badinaia.

Taunimanima ese Iesu Keriso murinai idia raka taudia ginigunadia edia ladana idia gwauraia “Keristani.” (Kara 11:26) Unai negai, idia sibona be Keriso idia badinaia dainai, edia ladana be unai bamona idia gwauraia. Idia ibounai be mai lalotamona ida Iesu Keriso, Keristani tomadihona ia Haginia Tauna, ena hadibaia herevadia idia badinaia. Emu dubu be edena bamona? Oi laloa emu dubu ese ia hadibaia herevadia be Keriso bona ena murinai idia raka taudia ginigunadia edia hegeregerena, a? Edena bamona unai oi diba? Dala tamona be Baibel ida unai oi hahegeregerea.

Inai oi laloa: Iesu Keriso be Baibel ia matauraia bada badina ia be Dirava ena Hereva. Haida be sene karadia idia atoa guna bona Baibel be anina lasi gauna ai idia halaoa dainai, Iesu ese idia ia dadaraia. (Mareko 7:9-13) So ita gwau diba, Iesu murinai idia raka taudia korikoridia be Baibel sibona do idia badinaia. Ita be Keristani taudia dainai, ita sibona ita nanadaia: ‘Egu dubu ia hadibaia herevadia be Baibel hegeregerena, a?’ Unai henanadai oi haerelaia totona, namona be emu dubu ia hadibaia herevadia be Baibel ida oi hahegeregerea, ani?

Iesu ia gwau, namona be momokani ai—Baibel ese ia gwauraia dala momokanina ai—ita ese Dirava ita tomadiho henia. (Ioane 4:24; 17:17) Bona aposetolo Paulo ia gwau, bema “hereva momokani ena diba maoromaoro” ita abia do ita mauri. (1 Timoteo 2:4) Unai dainai, gau badana be ita abiadae herevadia be Baibel hegeregerena. Oibe, unai amo do ita mauri.

EDENA DALA AI ITA ABIA DAE HEREVADIA BE BAIBEL IDA ITA HAHEGEREGEREA?

Oi ai noia ai torea henanadai siks oi duahia bona Baibel ena haere oi laloa. Baibel siri ibounai oi itaia, bona edia haere oi lalohadailaia. Bena oi sibona oi nanadaia: ‘Egu dubu ia hadibaia herevadia be Baibel hegeregerena, a?’

Inai henanadai bona haere karana ese oi do ia durua, oi abia dae herevadia be Baibel ida oi hahegeregerea totona. Oi ura emu dubu ia hadibaia herevadia be Baibel ida oi hahegeregerea, a? Iehova ena Witnes taudia be mai moale ida oi idia durua diba Baibel amo hereva momokani oi tahua totona. Oi ura idia ta ida Baibel umui stadilaia, davana lasi, a? Eiava oi lao emai websait, jw.org.

1 HENANADAI: Dirava be daika?

HAERE: Iehova, Iesu ena Tamana unai, be noho hanaihanai Diravana bona gau iboudiai ia Havaraia Tauna hereadaena.

BAIBEL BE DAHAKA IA GWAU?

“Umui dainai ai guriguri neganai, nega ibounai Dirava, iseda Lohiabada Iesu Keriso ena Tamana, ai tanikiu henia.”—Kolose 1:3.

“Iehova, aiemai Dirava e, oi be hegeregere momokani, hairai, hemataurai, bona siahu oi abia totona, badina oi ese gau ibounai oi havaraia.”—Apokalupo 4:11.

Roma 10:13; 1 Timoteo 1:17 itaia danu.

2 HENANADAI: Iesu Keriso be daika?

HAERE: Iesu be Dirava ena Natuna ginigunana. Iesu be Dirava ese ia havaraia dainai, ia be mai ena matamana. Iesu be Dirava ia badinaia bona Dirava ena ura ia karaia.

BAIBEL BE DAHAKA IA GWAU?

“Tamana ese lau ia hereaia.”—Ioane 14:28.

“[Iesu] be ita itaia diba lasi Diravana ena toana hegeregerena, bona Dirava ia havaraia gaudia ibounai amo ia be ginigunana.”—Kolose 1:15.

Mataio 26:39; 1 Korinto 15:28 itaia danu.

3 HENANADAI: Lauma helaga be dahaka?

HAERE: Lauma helaga be gaukara siahuna ta, Dirava ese ia gaukaralaia ena ura ia hagugurua totona. Lauma helaga be dirava ta lasi. Taunimanima be lauma helaga amo idia honu diba bona lauma helaga ese ia hasiahudia diba.

BAIBEL BE DAHAKA IA GWAU?

“Elisabeta be Maria ena hanamoa herevana ia kamonai neganai, ena bogana lalonai ia noho natuna ia marere. Bona Elisabeta be lauma helaga amo ia honu.”—Luka 1:41.

“Lauma helaga be umui latanai ia diho neganai, siahu do umui abia.”—Kara 1:8.

Genese 1:2; Kara 2:1-4; 10:38 itaia danu.

4 HENANADAI: Dirava ena Basileia (Kingdom) be dahaka?

HAERE: Dirava ena Basileia be guba ai ia noho gavamani ta. Iesu be Dirava ena Basileia ena King. Daudau lasi, inai Basileia ese Dirava ena ura gauna be tanobada ibounai dekenai do ia havaraia.

BAIBEL BE DAHAKA IA GWAU?

“Vadaeni aneru namba 7 ese iena kibi ia hiriria. Bona gado badadia guba dekenai idia hereva, idia gwau: ‘Tanobada ena basileia be iseda Lohiabada bona iena Keriso edia basileia ai ia lao, bona Ia be do ia lohia ela bona hanaihanai.’”—Apokalupo 11:15.

Daniela 2:44; Mataio 6:9, 10 itaia danu.

5 HENANADAI: Taunimanima namodia ibounai be guba idia lao, a?

HAERE: Lasi. Dirava ese ia abia hidi abidadama taudia haida—Baibel ese edia ladana ia gwauraia “seri maragi”—sibona be guba do idia lao. Idia be Iesu ida king gaukara do idia karaia bona taunimanima do idia naria.

BAIBEL BE DAHAKA IA GWAU?

“Seri maragi e, umui gari lasi, emui Tamana be umui dekenai ia moale dainai, umui dekenai Basileia do ia henia.”—Luka 12:32.

“Idia be Dirava bona Keriso edia hahelaga taudia bona lagani 1,000 lalonai Keriso ida do idia lohia.”—Apokalupo 20:6.

Apokalupo 14:1, 3 itaia danu.

6 HENANADAI: Dirava ena ura tanobada bona taunimanima totona be dahaka?

HAERE: Dirava ena Basileia henunai, tanobada be paradaiso ai do ia lao bona abidadama taudia be do idia gorere lasi, edia maino do ia ore lasi, bona do idia mase lasi.

BAIBEL BE DAHAKA IA GWAU?

“Manau taudia ese noho gabuna tano do idia abia, do idia helai namonamo, mai moale bona mai maino danu”—Salamo 37:10, 11.

“Ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni”—Apokalupo 21:3, 4.

Salamo 37:29; 2 Petero 3:13 itaia danu.