“Emui Imadia Do Umui Ha-Aukaia, Do Umui Manoka Lasi”

1, 2. (a) Hari taunimanima be dahaka hekwakwanai idauidau idia davaria, bona unai ese dahaka ia havaraia? (b) Isaia 41:10, 13 ese dahaka helaro ia henia?

REGULA painia taihu ta, iena adavana be elda ta, ia gwau: “Ena be Dirava tomadiho henia karadia lau goadalaia, to lagani momo lalonai lau lalometau. Unai dainai lau mahuta namonamo diba lasi, lau gorere momo, ma haida lau kara auka henia bona nega haida lau hesiku bona lau ura sibona lau noho.”

² Unai taihu ena hemami oi lalopararalaia, a? Satani ena kara dika tanobada ai mauri be ia auka, unai dainai taunimanima idia lalometau. Unai be hegeregere, ta be ena doruna dekenai aniani baege metauna ia huaia bamona. (Aon. 12:25) Dahaka gaudia dainai oi lalometau diba? Reana emu lalokau tauna ta ia mase, oi gorere bada, ruma bese naria totona oi hekwarahi o dagedage oi davaria. Unai gaudia oi lalohisihisilaia dainai, nega haida oi mamia emu goada ia ore bamona. Bona reana emu moale oi haboioa diba. To namona be oi laloatao, Dirava be ia noho hegaegae oi ia durua totona.​—Isaia 41:10, 13 duahia.

3, 4. (a) Baibel ese edena dala ai inai hereva “imana” ia gaukaralaia? (b) Dahaka ese iseda imana ia hamanokaia diba?

³ Baibel lalonai, nega momo tauanina ena kahana idauidau idia gaukaralaia, taunimanima edia kara idia herevalaia totona. Hegeregere Baibel ai, imana be nega handred ia gaukaralaia. Ma ta ena imana oi ha-aukaia ena anina be, ta oi hagoadaia bona durua kara ta ia karaia totona. Hegeregere, toretore ginigunadia ai, 1 Samuela 23:16 bona Esera 1:6 dekenai inai hereva rua “hagoadaia” bona “durua” idia hahanaia neganai, idia gwau, “imana hagoadaia.” Unai hereva ese reana vaira nega ena helaro laloa karana ia herevalaia diba.

⁴ Baibel ese lalomanoka, lalohisihisi bona helaro lasi taudia ia herevalaia neganai, inai laulau herevana manoka imadia ia gaukaralaia. (2 Siv. 15:7; Heb. 12:12) Nega momo unai bamona taudia be idia manoka diba. Bema oi davaria hekwakwanai dainai, oi lalometau o emu tauanina ia goada lasi bona emu hetura karana Dirava ida be ia manoka, edeseni heduru oi abia diba? Edena dala ai do oi haheauka bona oi moale?

IEHOVA ENA IMANA BE IA KWADOGI LASI

5. (a) Hekwakwanai idia vara neganai, dahaka do ita karaia, to dahaka ita laloatao be namo? (b) Inai stadi ai dahaka do ita herevalaia?

⁵ Sepanaia 3:16, 17 duahia. Namo lasi oi gari bona lalomanoka, hegeregere emu imana ia manoka bamona, badina iseda Tamana Iehova be ita ia hamaoroa, iseda ‘lalohekwarahi ibounai be ia dekenai do ita negea.’ (1 Pet. 5:7) Dirava ese Babulonia ai idia noho Israela taudia dekenai ia gwauraia herevana ita laloa bada diba, ia ese idia ia hamaoroa iena imana goadana be ia kwadogi lasi, iena hesiai taudia ia hamauria totona. (Isa. 59:1) Baibel ai idia noho haheitalai namodia toi ese idia hahedinaraia, Iehova be ia ura bona ia hegeregere iena taunimanima ia hagoadaia totona, unai amo iena ura idia karaia diba, herevana hekwakwanai momo idia davaria. Inai stadi ai unai haheitalai toi ese ita idia durua dalana do ita herevalaia.

6, 7. Israela taudia ese Amaleka taudia idia halusia sivaraina amo dahaka ita dibaia?

⁶ Dirava ese hoa dalanai Aigupito amo Israela taudia ia hamauria murinai, Amaleka taudia ese idia tuari henidia. Iosua be Mose ena hereva ia badinaia bona mai gari lasi ida tuari lalonai Israela taudia ia hakaua. Unai nega lalonai, Mose ese Arona bona Huru be ororo ta dekenai ia hakaua lao, unai amo tuari idia itaia diba. Unai tatau toi be idia gari dainai tuari amo idia heau, a? Lasi!

⁷ Mose be Iehova ena heduru amo palani ta ia karaia, unai dainai Israela taudia be tuari dekenai idia kwalimu. Mose ese ena imana ai Dirava momokanina ena itotohi ia dogoatao bona guba dekenai ia abia isi. Mose be unai ia karaia neganai, Iehova ese Israela taudia edia imana ia hagoadaia, bona idia ese tuari ai Amaleka taudia idia halusia. To, Mose ena imana ia mase bona ia atoa diho neganai, Amaleka taudia idia kwalimu matamaia. Arona bona Huru be karaharaga “nadi ta idia abia, [Mose ena] murina dekenai idia atoa, nadi latanai ia helai. Vadaeni idia ruaosi kahana kahana idia gini, iena imana ruaosi idia abia isi . . . ia lao bona dina ia diho.” Oibe, Dirava ena imana goadana dainai, Israela taudia be tuari ai idia kwalimu.​—Eso. 17:8-13.

8. (a) Etiopia taudia ese Iuda taudia idia hagaria neganai, Asa be dahaka ia karaia? (b) Edena dala ai Asa ita tohotohoa diba?

⁸ King Asa ena nega ai danu Iehova ese ia hahedinaraia iena imana be ia kwadogi lasi. Baibel ese ia sivarailaia tuari orea ibounai amo, Etiopia tauna Sera ena tuari orea be orea badana. Iena tuari taudia ibounai be 1,000,000. Etiopia taudia ese Asa ena tuari taudia edia namba ia hanaia. Asa be unai bamona tuari orea dainai do ia gari bona ia lalometau bona tuari lalonai ena imana ia atoa diho diba. To, Asa be heduru totona Iehova dekenai ia tabekau. Oibe, reana Asa ena tuari orea idia laloa idia be hegeregere lasi Etiopia taudia idia halusia totona, to “Dirava ese gau ibounai ia karaia diba.” (Mat. 19:26) Asa “ena mauri dinadia ibounai lalonai ia ese Lohiabada ia badinaia noho” dainai, Dirava ese ena siahu badana amo Asa ena vairanai “Etiopia taudia ia halusia.”​—2 Siv. 14:8-13; 1 Kin. 15:14.

9. (a) Dahaka ese Nehemia ia koua lasi Ierusalema ena magu ia haginia lou totona? (b) Edena dala ai Dirava ese Nehemia ena guriguri ia haerelaia?

⁹ Nehemia be Ierusalema dekenai ia lao neganai, ena hemami mani oi laloa. Unai taoni ena magu ia dika bona Iuda taudia be idia lalomanoka. Bese idaudia ese idia hagaridia dainai, Iuda taudia edia imana ia manoka bona Ierusalema ena magu haginia gaukarana idia hadokoa. Unai ia vara dainai Nehemia ena imana ia manoka o ia lalomanoka, a? Lasi! Mose, Asa, bona Iehova ena abidadama taudia ma haida bamona, Nehemia be nega ibounai guriguri amo Iehova dekenai ia tabekau. Unai nega ai danu unai ia karaia. Ena be Iuda taudia idia lalomanoka momokani, to Iehova ese Nehemia ena guriguri ia haerelaia. Dirava ese ena “siahu badana” bona “goada” amo Iuda taudia edia imana manokadia ia hagoadaia. (Nehemia 1:10; 2:17-20; 6:9 duahia.) Oi laloa hari Iehova ese ena “siahu badana” bona “goada” amo iena hesiai taudia ia durua, a?

IEHOVA ESE EMU IMANA DO IA HAGOADAIA

10, 11. (a) Edena dala ai Satani ese iseda imana ia hamanokaia diba? (b) Iehova ese edena dala ai ita ia hagoadaia? (c) Tiokratik hahediba dalana ese edena dala ai oi ia durua?

¹⁰ Ita diba Diabolo danu ena imana do ia manoka lasi, iseda Keristani karadia ia koua totona. Ia ese gavamani, dubu gunalaia taudia, bona aposteit taudia edia koikoi bona hagaria karadia ia gaukaralaia. Ena ura be dahaka? Ia ura iseda imana do ia manoka, unai amo Basileia sivarai namona harorolaia gaukarana do ita goadalaia lasi. To, Iehova ese ena lauma helaga amo ita ia hagoadaia diba. (1 Siv. 29:12) Namona be Dirava ena lauma helaga dekenai ita tabekau, unai amo Satani bona inai tanobada dikana amo ita davaria hedibagani ita hanaidia diba. (Sal. 18:39; 1 Kor. 10:13) Danu, ita moale badina lauma helaga ena siahu amo idia torea bukana​—Baibel​—be ita dekenai ia noho. Danu, hua ta ta ai ita abia Baibel bukadia bona magasin mani ita laloa. Ierusalema ena dubu helaga idia haginia lou neganai, Sekaraia 8:9, 13 (duahia) ai ia noho herevana idia gwauraia bona ita dekenai unai hereva be mai anina bada.

¹¹ Iseda Keristani heboudia, sekit hebouhebou, rijinol hebouhebou, bona tiokratik sikuli ai, Iehova amo ita abia dibana ese ita ia hagoadaia. Unai hahediba dalana ese ita ia durua tahua gaudia ita atoa bona iseda Keristani maduna ita hagugurudia totona. (Sal. 119:32) Oi ura unai hahediba dalana amo goada oi abia, a?

12. Iseda abidadama ia goada totona, dahaka ita karaia be namo?

¹² Iehova ese Israela taudia ia durua dainai, Amaleka bona Etiopia taudia idia halusia, bona Nehemia bona ena tatau ia hagoadaia dainai, magu idia haginia lou. Unai hegeregerena, Dirava ese ita do ia hagoadaia dagedage bona lalometau negadiai ita gini goada totona, unai amo iseda haroro gaukara ita karaia noho diba. (1 Pet. 5:10) Iehova be hoa dalanai ita do ia durua lasi. To, dina ta ta ai Baibel ita duahia, wiki ena hebou totona ita hegaegae bona hebou ita lao henidia, sibona iseda stadi bona ruma bese tomadihona amo iseda lalona bona kudouna ita hagoadaia, bona guriguri amo Iehova dekenai ita tabekau. Namo lasi anina lasi gaudia dainai, Dirava ena heduru bona hagoadaia daladia ita laloa maragi. Bema oi mamia emu imana be idia manoka idia lao noho, Dirava ena heduru oi noia. Bona ia ese iena lauma helaga amo ‘emui ura do ia hagoadaia, ia ura henia gaudia ibounai oi karaia totona.’ (Fili. 2:13) To, edena dala ai ma haida edia imana oi hagoadaia diba?

IDIA MANOKA IMADIA HAGOADAIA

13, 14. (a) Tadikaka ta ena adavana ia mase murinai, edena dala ai heduru ia abia? (b) Edena dala ai ma haida ita hagoadaia diba?

¹³ Iehova ese ita dekenai Keristani tadikaka taihu ia henia, bona idia amo goada ita abia diba. Aposetolo Paulo ia gwau: “Idia manoka imadia bona idia goada lasi tuidia do umui hagoadaia, bona emui aena edia raka daladia do umui hamaoromaoroa noho.” (Heb. 12:12, 13) Aposetolo edia negai, momo be unai dala ai goada idia abia. Hari danu be unai bamona. Tadikaka ta ena adavana ia mase bona hekwakwanai badadia ma haida ia davaria murinai, ia gwau: “Lau dibaia gauna be inai, ita davaria hahetoho, idia vara negana, bona ena daudau be ita sibona ese ita abia hidi lasi. To, guriguri bona sibona egu stadi karana be life jacket bamona, lau idia durua lau maloa lasi totona. Bona egu tadikaka taihu edia heduru ese lau ia hagoadaia bada. Unai dainai hekwakwanai idia do vara lasi neganai, gau badana be iseda hetura karana Iehova ida ita hagoadaia.”

¹⁴ Tuari lalonai Arona bona Huru ese Mose ena imana idia hagoadaia. Unai hegeregerena, dala ita tahua be namo ma haida ita hagoadaia totona. Daidia do ita hagoadaia? Buruka taudia, gorere taudia, ruma bese taudia ese idia dagedage henia taudia, sibona idia noho o edia lalokau taudia idia mase dainai idia lalometau taudia. Matamata taudia ita hagoadaia danu be namo, badina idia momo be edia turadia ese idia veria kara kereredia idia karaia totona, eiava inai nega oromana ai sikuli bada, o davana namona moni gaukarana idia tahua totona. (1 Tes. 3:1-3; 5:11, 14) Oibe, Kingdom Hall ai, haroro gaukara ai, ita aniani hebou lalonai, o telefon amo ma ta ita hereva henia neganai, idia ita hagoadaia be namo.

15. Emu hereva namodia ese edena dala ai tadikaka taihu ia hagoadaia diba?

¹⁵ Asa be tuari ai ia kwalimu murinai, peroveta tauna Asaraia ese ia bona ena taunimanima ia hagoadaia, ia gwau: “Do umui gini goada, bona do umui laloa manoka lasi [o, “emui imadia do idia manoka lasi,” NWT, ftn.], badina davana namona do umui davaria Dirava dekena amo.” (2 Siv. 15:7) Unai ese Asa ia hagoadaia tomadiho goevana ia haginia lou totona. Unai hegeregerena, emu hereva namodia ese ta ena mauri o kara ia haidaua diba. Bona idia oi durua diba edia hesiai gaukara Iehova dekenai idia habadaia totona. (Aon. 15:23) Hebou ai, emu imana oi abia isi bona oi haere neganai, unai ese ma haida do ia hagoadaia.

16. Nehemia hegeregerena, edena dala ai elda taudia ese kongrigeisen taudia idia hagoadaia diba? Mani tadikaka taihu ese oi idia hagoadaia daladia haida oi gwauraia.

¹⁶ Iehova ese Nehemia bona ia idia bamoa taudia ia durua dainai, Ierusalema ena magu idia haginia lou. Bona dina 52 lalonai idia haorea! (Neh. 2:18; 5:15, 16) Nehemia be unai gaukara ia biagua sibona lasi. To ia danu ese unai magu haginia gaukarana ia karaia. (Neh. 5:16) Nehemia hegeregerena, elda taudia momo be tiokratik konstraksen gaukara eiava Kingdom Hall hagoevaia bona hanamoa gaukarana idia durua. Danu, haroro gaukara ai pablisa haida idia bamoa bona mamoe vadivadi idia karaia, unai amo idia lalomanoka taudia edia imana manokadia idia hagoadaia diba.​—Isaia 35:3, 4 duahia.

“EMUI IMADIA DO UMUI HA-AUKAIA”

17, 18. Hekwakwanai ita davaria o ita lalometau neganai, dahaka ita diba?

¹⁷ Iseda tadikaka taihu ida ita gaukara hebou karana ese lalotamona ia havaraia. Danu, iseda hetura karana ia hagoadaia bona ita ia durua Dirava ena Basileia ese do ia mailaia hahenamo ita abidadama henidia totona. Ma haida edia imadia ita hagoadaia neganai, idia ita durua lalomanoka idia havaraia gaudia idia dadaraia bona vaira nega ena moale idia laloa totona. Danu, unai ese ita ia durua iseda hesiai gaukara ita laloa bada bona Dirava ese ia gwauhamatalaia gaudia ita laloa noho totona. Oibe, unai ese iseda imana ia hagoadaia diba.

¹⁸ Iehova ese nega idauidau ai iena abidadama hesiai taudia ia durua bona gimaia sivaraidia ese iseda abidadama ia hagoadaia. Unai dainai hekwakwanai bona hahetoho oi davaria neganai, ‘emu imadia do oi ha-aukaia, do oi manoka lasi’! To guriguri amo Iehova ena heduru oi noia, bona ia ese ena imana goadana amo oi do ia durua, bona Basileia ena hahenamo idauidau dekenai oi do ia hakaua lao.​—Sal. 73:23, 24.