Tama Sina E, Emui Natudia Edia Abidadama Umui Hagoadaia

1, 2. (a) Tama sina ese dahaka hekwakwanai idia davaria bona edena dala ai unai idia hanaia diba? (b) Edena dala foa do ita herevalaia?

FRANCE ai tau ta bona ena adavana idia gwau: “Iehova ai abidadama henia, to unai ese ia hahedinaraia lasi emai natudia danu be Iehova do idia abidadama henia.” Ma idia gwau: “Abidadama be oi vara negana amo oi abia karana ta lasi. Emai natudia be metairametaira abidadama idia hahedinaraia.” Australia ai ia noho tadikaka ta ia gwau: “Emu natuna oi durua Dirava ia abidadama henia totona be mai ena hekwarahi. Namona be dala idauidau oi gaukaralaia ia oi durua totona. Reana oi laloa emu natuna ena henanadai ta oi haerelaia vadaeni bona ia moale. To gabeai unai henanadai tamona do ia henia lou! Reana badina emu haere ginigunana ia laloparara lasi. Gau haida umui herevalaia loulou be namo idia laloparara totona.”

² Bema oi be tama o sina ta, nega haida oi mamia ia auka emu natudia oi hadibaia bona durua, unai amo idia be abidadama taudia ai idia lao diba, a? Momokani, ita sibona eda aonega amo unai ita karaia diba lasi! (Ier. 10:23) To, ita kwalimu diba, bema Dirava ena heduru ita abia. Inai dala foa ese oi do ia durua emu natuna ena abidadama oi hagoadaia totona: (1) Idia oi diba namonamo. (2) Mai kudouna ibounai ida idia oi hadibaia. (3) Haheitalai namodia gaukaralaia. (4) Oi haheauka bona guriguri.

EMU NATUDIA OI DIBA NAMONAMO

3. Hahediba karana dekenai, tama sina ese edena dala ai Iesu ena kara idia tohotohoa diba?

³ Iesu be mai gari lasi ida ena hahediba taudia dekenai idia abia dae gaudia ia henanadailaia. (Mat. 16:13-15) Iena haheitalai oi tohotohoa. Emui laga-ani negadiai, emui natudia umui hagoadaia edia lalohadai idia gwauraia hedinarai totona. Reana idia lalohekwarahilaia gaudia o laloparara lasi gaudia umui herevalaia diba. Australia ai ia noho tadikaka ta ena mauri lagani be 15, ia gwau: “Nega momo egu tamana be lau ida Baibel amo lau dibaia gaudia ia herevalaia bona unai lau abia dae ena badina ai herevalaia danu. Lau ia nanadaia: ‘Baibel be dahaka ia gwau?’ ‘Baibel ese ia gwauraia gaudia oi abia dae, a?’ ‘Dahaka dainai unai oi abia dae?’ Ia ura sibona egu hereva amo unai henanadai lau haerelaidia, to ia eiava egu sinana ena hereva do lau badinaia lasi. Lau bada neganai, egu lalohadai amo haere henia karana lau manadalaia.”

4. Dahaka dainai emu natuna ena henanadai oi laloa bada be namo? Haheitalai gwauraia.

⁴ Bema emu natuna be oi hadibaia herevana ta ia lalopararalaia lasi, namo lasi oi kara auka o mai badu ida oi hereva. To, mai haheauka ida ia oi durua. Tama ta ia gwau: “Emu natuna ena henanadai oi laloa bada. Namo lasi ena henanadai oi laloa maragi, bona bema gau ta dainai ia henanadai, namo lasi hemarai dainai iena henanadai oi dadaraia.” Namona be emu natuna ena henanadai oi haerelaidia, unai amo oi hahedinaraia iena henanadai oi laloa bada bona oi ura diba ia abia. Iesu ena mauri lagani be 12 neganai, mai anina bada henanadai ia henia danu. (Luka 2:46 duahia.) Denmark ai, mero matamata ta ena mauri lagani be 15, ia gwau: “Lauegu tama sina lau hadibaia lau ese iseda orea lau daradaralaia neganai, idia be mai manau ida lau idia durua, ena be lau dainai idia lalohekwarahi sisina. Baibel amo egu henanadai ibounai idia haerelaia.”

5. Edena dala ai tama sina ese idia hahedinaraia edia natudia edia abidadama idia laloa bada?

⁵ Namona be emu natudia edia lalohadai, edia hemami, bona idia lalohekwarahilaia gaudia umui diba namonamo. Namo lasi oi laloa, idia be oi ida Keristani heboudia dekenai idia lao bona idia haroro dainai idia be mai edia abidadama. Emu dina ta ta herevahereva lalonai, Baibel umui herevalaia danu. Emu natudia ida bona idia totona umui guriguri. Edia abidadama ia tohoa gaudia umui dibaia bona idia umui durua unai hahetoho idia hanaia totona.

MAI KUDOUNA IBOUNAI IDA OI HADIBADIA

6. Bema tama sina ese Baibel ena hereva momokani idia laloa bada, unai ese edena dala ai idia ia durua?

⁶ Iesu ese Iehova, Baibel, bona taunimanima ia lalokau henia dainai, iena hahediba karana amo taunimanima edia kudouna ia hamarerea. (Luka 24:32; Ioa. 7:46) Unai hegeregerena, lalokau dainai tama sina idia ura edia natudia edia kudouna idia hamarerea. (Deuteronomi 6:5-8; Luka 6:45 duahia.) Unai dainai namona be tama sina ese Baibel bona stadi bukadia idia stadilaia namonamo. Dirava ese ia havaraia gaudia bona unai idia herevalaia buka bona magasin umui duahia. (Mat. 6:26, 28) Unai ese emui diba bona emui lalokau Iehova dekenai do ia habadaia, bena do umui hegeregere emui natudia umui hadibaia totona.​—Luka 6:40.

7, 8. Bema tama o sina ese ena kudouna be Baibel ena hereva momokani amo ia hadibaia namonamo, dahaka ia vara diba? Ekspiriens gwauraia.

⁷ Bema emu kudouna be Baibel ena hereva momokani amo oi hadibaia namonamo, do oi ura emu ruma bese ida unai oi herevalaia. Keristani heboudia totona ita hegaegae negana ai o ruma bese tomadiho negana ai sibona lasi, to nega idauidau ai unai oi herevalaia diba. Ma danu, unai bamona herevahereva karana be emu mauri ena kahana ta ai oi halaoa be namo. United States ai, tadikaka ta bona ena adavana be edia ruma bese ida Dirava ia havaraia gauna ta o aniani idia moalelaia neganai, Iehova idia laloa. Idia gwau: “Emai natudia ai hadibaia loulou, Iehova ese ita dekenai ia henia gaudia be mai aonega bona lalokau ida ia havaraia.” South Africa ai, tadikaka ta bona ena adavana be edia natuna kekeni rua ida uma ai idia gaukara neganai, uhe ia tubu bona huahua ia havaraia dalana idia herevalaia. Idia gwau: “Ai ura bada emai natuna kekenidia ai durua mauri bona mauri ia matamaia dalana idia laloa bada totona.”

⁸ Australia ai, tama ta ena natuna mero ena mauri lagani be 10 neganai, miusiam dekenai ia abia lao, badina ia ura ena natuna ena abidadama Dirava bona Dirava ese ia havaraia gaudia dekenai ia hagoadaia. Ia gwau: “Miusiam lalonai, ai ese davara ai idia noho idaunega animal edia ladana ammonoid bona trilobite ai itaia. Unai animal edia hairai, edia kahana idauidau bona toana dainai, ai hoa bada​—idia be hari idia noho animal bamona. Unai dainai bema mauri gauna be gau maragina ta amo ia matamaia, dahaka dainai unai idaunega animal be idau momokani? Unai ese egu lalona ia hamarerea momokani dainai, egu natuna ida unai lau herevalaia.”

HAHEITALAI GAUKARALAIDIA

9. Dahaka dainai haheitalai ese natudia ia durua diba, bona sina ta ese edena dala ai unai ia hahedinaraia?

⁹ Iesu be nega momo haheitalai ia gaukaralaia, unai ese ta ena lalohadai, hemami, bona laloatao karana ia durua. (Mat. 13:34, 35) Natudia be gau momo idia lalohadailaia diba. Unai dainai emui natudia umui hadibaia neganai, haheitalai umui gaukaralaia. Japan ai, sina ta be unai ia karaia. Ena natuna memero rua edia mauri lagani be 8 bona 10 neganai, idia dekenai tanobada ia hagegea hodahoda (atmosphere) bona Iehova ese unai ia havaraia dalana ia herevalaia. Unai ia hahedinaraia totona, idia dekenai milika, suga, bona kofi ia henia. Bena idia rua ia noia ena kofi idia karaia totona. Ia gwau: “Egu kofi idia karaia namo herea. Idia lau nanadaia, dahaka dainai egu kofi idia karaia namo herea neganai, idia gwau, idia ura lau ese unai kofi do lau moalelaia. Bena lau hahedinaraia Dirava ese tanobada ena hodahoda be unai dala ai ia karaia danu​—ita moalelaia totona.” Edia sinana ese ia gwauraia haheitalai idia lalopararalaia bona idia ia durua. Unai dainai nega daudau lalonai unai haheitalai idia laloatao!

10, 11. (a) Emu natuna ena abidadama hagoadaia totona, edena haheitalai oi gaukaralaia diba? (Laulau ginigunana herevalaia.) (b) Oi ese edena haheitalai ma ta oi gaukaralaia vadaeni?

¹⁰ Reana aniani ta nadua dalana oi haheitalaia diba emu natuna ena abidadama oi hagoadaia totona. Edena dala ai? Keke eiava bisikesi maragidia oi gabua murinai, unai oi karaia dalana hahedinaraia. Bena emu natuna dekenai apolo ta oi henia, bona oi nanadaia: “Oi diba inai apolo be mai ena vara dalana?” Bena apolo be huana dekenai oi utua bona ia dekenai uhe oi henia. Bena oi hahedinaraia, unai apolo ena tubu dalana be unai uhe amo ia matamaia. Ia be aniani ta nadua dalana amo ia idau momokani. Reana oi henanadai: “Bema keke nadua dalana be ta ese ia torea, daika ese inai apolo ena vara dalana ia torea?” Bema iena mauri lagani be bada, oi hahedinaraia apolo ia vara dalana​—apolo auna ia tubu dalana unai​—be DNA taravatuna ia badinaia. Bena buklet ladana The Origin of Life​—Five Questions Worth Asking ena rau 10 ia lao 20 ai idia noho haheitalai haida umui herevalaia diba.

¹¹ Tama sina momo be edia natudia ida Awake! ena kahana ladana “Was It Designed?” idia herevalaia. Eiava auka lasi dalana ai unai kahana idia gaukaralaia edia natudia maragidia idia hadibadia totona. Hegeregere Denmark ai, tau ta bona ena adavana ese manu be peleini ida idia hahegeregerea. Idia gwau: “Peleini edia toana be manu bamona. To, peleini be gatoi idia atoa bona peleini maragidia idia havaraia diba, a? Manu be mai edia airport, a? Bona peleini ena regena bona manu ena ane regena be edena bamona oi hahegeregerea diba? Vadaeni daika ena aonega be bada​—peleini ia karaia tauna o manu ia Havaraia Tauna?” Unai bamona haheitalai bona henanadai ese natuna ia durua diba, ia laloa namonamo bona Dirava ia abidadama henia totona.​—Aon. 2:10-12.

12. Edena dala ai haheitalai ese emu natuna ia durua diba?

¹² Haheitalai namodia ese natuna ia durua diba Baibel ena hereva ia abidadama henia totona. Hegeregere, Iobu 26:7 mani ita itaia. (Duahia.) Edena dala ai do oi hahedinaraia unai siri be Dirava ena hahekau henunai idia torea? Reana hamomokania gaudia oi gwauraia diba. To, namona be emu natuna oi durua ena lalona ena matana amo unai ia itaia totona. Oi hahedinaraia Iobu ena nega ai teleskoup bona roketi be lasi. Bena emu natuna ese do ia hahedinaraia, dahaka dainai tanobada be gau ta latanai ia helai lasi lalohadaina be taunimanima haida ese idia abia dae lasi. Ia ese bolo o nadi ta amo ia hahedinaraia diba, metau gaudia be gau ta latanai idia helai be namo. Unai amo emu natuna do ia laloparara, Iehova ese Baibel ai ia torea herevadia be momokani, bona unai gaudia be gabeai taunimanima ese idia hamomokania.​—Neh. 9:6.

BAIBEL ENA HAKAUA HEREVADIA EDIA NAMO HAHEDINARAIA

13, 14. Edena dala ai tama sina ese edia natudia dekenai Baibel ena hakaua herevadia edia namo idia hahedinaraia diba?

¹³ Gau badana be emu natuna dekenai Baibel ena hakaua herevadia edia namo oi hahedinaraia. (Salamo 1:1-3 duahia.) Unai oi karaia daladia be momo. Hegeregere, emu natudia oi hamaoroa edia lalona ena matana amo do idia itaia, idia be motumotu ta dekenai idia noho bona idia ese taunimanima haida idia abia hidi idia ida idia noho totona. Bena idia oi nanadaia, “Unai motumotu ai taunimanima ibounai be maino ai idia noho totona, edena bamona kara idia hahedinaraia be namo?” Bena idia ida Galatia 5:19-23 oi herevalaia diba.

¹⁴ Unai hadibaia dalana amo mai anina bada gaudia rua ita dibaia. Gau ginigunana be, Dirava ena kara maoromaoro taravatudia ese maino bona lalotamona ia hagoadaia. Iharuana be, Iehova ese ena hahediba karana amo tanobada matamata totona ita ia hahegaegaea. (Isa. 54:13; Ioa. 17:3) Bena iseda pablikeisen ai ia noho ekspiriens ta oi herevalaia diba. Reana Gima Kohorona ai ia noho kahana ladana “Baibel ese Mauri Ia Haidaua” amo oi abia diba. Eiava bema emu kongrigeisen ai ta be Iehova hamoalea totona ena mauri gunana ia rakatania, emu ruma dekenai ia oi boiria bona ena ekspiriens ia gwauraia diba. Unai bamona ekspiriens ese Baibel ena hakaua herevana ia hamauria bamona!​—Heb. 4:12.

15. Emu natudia oi hadibaia neganai, emu tahua gauna badana be dahaka?

¹⁵ Point badana be inai: Emu natudia oi hadibaia neganai, oi hereva momo lasi. Emu lalona ena matana oi gaukaralaia. Edia mauri lagani hegeregerena, edia lalohadai oi tahua. Namona be emu hahediba dalana idia moalelaia, bona unai ese edia abidadama ia hagoadaia. Tama ta ia gwau: “Oi hesiku lasi, to dala idauidau oi gaukaralaia idia diba vadaeni gaudia oi hadibaia lou totona.”

HAHEAUKA BONA GURIGURI NOHO

16. Emu natudia oi hadibaia neganai, dahaka dainai oi haheauka be gau badana? Haheitalai gwauraia.

¹⁶ Dirava ena lauma helaga ese abidadama goadana ia havaraia. (Gal. 5:22, 23) Oibe, abidadama be huahua ta bamona, metairametaira do ia tubu. Unai dainai mai haheauka ida emui natudia oi hadibaia noho. Japan ai, tama ta mai ena natudia rua ia gwau: “Lau bona egu adavana emai nega bada be emai natudia dekenai ai henia. Idia maragi negana amo, hebou negadiai lasi, to dina ma haida ai miniti 15 lalonai idia lau stadi henia. Idia bona ai dekenai miniti 15 be daudau lasi.” Sekit naria tauna ta ia gwau: “Lau matamata neganai, lau daradaralaia gaudia o henanadai be momo. Nega ia hanaia lalonai, unai henanadai momo edia haere be hebou ai o ruma bese tomadiho neganai o sibona egu stadi lau karaia neganai lau abia. Unai dainai tama sina ese edia natudia idia hadibaia noho be mai anina bada.”

17. Dahaka dainai tama sina ese haheitalai namona idia hahedinaraia be namo, bona tau ta bona ena adavana be dahaka idia karaia?

¹⁷ Mai anina bada gauna be, emu abidadama karana. Emu natudia ese emu haheitalai do idia itaia bona unai ese idia do ia durua bada. Unai dainai, emu abidadama oi hagoadaia noho. Namona be emu natudia idia itaia oi dekenai Iehova be ia noho momokani. Bermuda ai, tau ta bona ena adavana idia lalometau neganai, edia natudia ida idia guriguri bona Iehova idia noia idia ia durua totona. Danu, edia natudia idia hagoadaia idia sibona idia guriguri totona. Idia gwau: “Emai natuna kekeni badana ai hamaoroa, ‘Iehova oi abidadama henia, Basileia ena hesiai gaukara lalonai oi bisi, bona oi lalohekwarahi lasi.’ Ai davaria hahenamo ia itaia neganai, ia diba Iehova be ai ia durua noho. Unai ese ena abidadama Dirava bona Baibel dekenai ia hagoadaia.”

18. Tama sina ese dahaka mai anina bada gaudia idia laloa be namo?

¹⁸ Momokani, natudia ese sibodia edia abidadama idia hagoadaia be namo. Umui tama sina ese uhe umui hadoa bona dairia diba. To Dirava sibona ese do ia hatubua. (1 Kor. 3:6) Unai dainai, iena lauma helaga totona umui guriguri, bona umui gaukara goada emu natudia umui hadibaia totona, bema unai umui karaia, Iehova ese umui do ia hanamoa.​—Efe. 6:4.