Gau Ibounai Lau Karaia Taunimanima Idauidau Ibounai Durua Totona

TO LAU ura Baibel ena hereva momokani dekenai egu diba lau habadaia. Unai ia vara badina egu sinana be nega momo Baibel bukadia ia abia, bona lau ese unai buka ai idia noho laulau lau moalelaia. Lauegu tamana ia ura lasi egu sinana ese ia dibaia gaudia be lau dekenai ia herevalaia. To lau henanadai momo dainai, egu tamana ia noho lasi neganai, egu sinana ese lau ia stadi henia. Gabeai, egu lalona lau hadaia Iehova dekenai egu mauri lau gwauhamatalaia totona. Lagani 1943 ai, egu mauri lagani be 10 neganai, Blackpool, England ai, bapatiso lau abia.

IEHOVA LAU HESIAI HENIA MATAMAIA

Unai nega amo, lau bona egu sinana be ai haroro hanaihanai. Haroro gaukara lalonai ai ese rekodi masini ai gaukaralaia. Unai masini ena metau be kilogram 4 bamona. Mani oi laloa, ena be lau be mero matamata, to unai metau gauna lau huaia!

Lauegu mauri lagani be 14 neganai, lau ura painia gaukara lau karaia. Lauegu sinana ese lau ia hamaoroa orea ena hesiai tauna, (hari idia gwauraia sekit naria tauna) lau hereva henia guna be namo. Tadikaka ese lau ia hadibaia namona be gaukara ta lau dibaia, unai amo lau painia neganai, unai ese lau ia durua diba. Vadaeni unai lau karaia. Lagani rua moni gaukara lau karaia murinai, painia gaukara totona sekit tauna ma ta lau nanadaia. Ia gwau, “Oi ura karaia gauna oi karaia!”

April 1949 ai, lau bona egu sinana ese emai renta ruma ai idia noho sea bona teibolo gaudia be ma haida dekenai ai henia bona haida ai hoihoilaia bona Middleton dekenai ai lao, unai be Manchester kahirakahira, bona unuseniai painia gaukara ai karaia matamaia. Hua 4 murinai, tadikaka ta lau abia hidi egu painia turana ai ia lao totona. Bena brens ofesi ese Irlam ai ia noho kongrigeisen matamata dekenai ai ia siaia. To, egu sinana be taihu ta ida kongrigeisen ma ta dekenai ia painia.

Ena be egu mauri lagani be 17 sibona, to lau bona egu painia turana dekenai maoro idia henia hebou ai hakaudia totona, badina unai kongrigeisen matamata ai tadikaka be momo lasi. Gabeai, Buxton Kongrigeisen dekenai lau idia siaia lao, unuseniai pablisa be momo lasi bona heduru idia noia. Momokani, unai negai lau karaia hesiai gaukaradia ese lau idia hegaegaelaia vaira nega ena hesiai gaukara totona.

Lagani 1951 ai, Gilead Sikuli totona fom ta lau hahonua. To December 1952 ai, ami gaukara totona lau idia boiria. Lau hamaorodia lau be Dirava lau hesiai henia ful-taim dainai, ami gaukara do lau durua lasi, to kota be unai ia abia dae lasi bona hua 6 dibura ruma dekenai lau noho. Unuseniai lau noho lalonai, Gilead ena klas namba 22 dekenai lau idia boiria. Unai dainai July 1953 ai, sisima ladana Georgic dekenai lau guia bona New York dekenai lau lao.

Lau ginidae neganai, lagani 1953 ena New World Society Hebouhebouna dekenai lau lao. Bena trein amo South Lansing, New York, dekenai lau lao, unuseniai sikuli ai abia. Lau be dibura ruma amo lau raka-lasi dainai, egu moni be bada lasi. Trein amo lau diho neganai, basi ta amo South Lansin dekenai do lau lao, unai dainai pasendia ta amo 25-cent (hari unai be 79 toea bamona) lau abitorehai.

ASAINMEN IDAUNA

Gilead Sikuli amo treinini namona ai abia, ai ia durua emai misinari gaukara ai, ‘gau ibounai do ai karaia taunimanima idauidau ibounai ai durua totona.’ (1 Kor. 9:22) Ai toi​—lau, Paul Bruun, bona Raymond Leach​—be Philippines dekenai idia siaia. Hua momo ai naria emai visa ai abia totona. Bena sisima ta amo dina 47 ai laolao​—Rotterdam amo ai lao Meditereinien Davara, Suez Canal, India Davarana, Malaysia, bona Hong Kong! November 19, 1954 ai, Manila dekenai ai ginidae.

Bena unai tano taudia, edia tano, bona edia gado ai dibaia matamaia. To Quezon Siti ena kongrigeisen ta dekenai ai toi idia siaia, unuseniai momo be English gado idia gaukaralaia. Hua 6 murinai, Tagalog gado ena hereva ta ta sibona ai dibaia. Emai asainmen matamata ese unai hekwakwanai do ia hamaoromaoroa.

May 1955 ena dina ta ai, haroro gaukara amo ai lou mai neganai, lau bona Tadikaka Leach ese emai daiutu ai revareva haida ai itaia. Unai revareva amo ai idia hadibaia ai be sekit gaukara do ai karaia. Unai nega ai egu mauri lagani be 25 sibona, to unai asainmen ese dala ia kehoa ‘gau ibounai do lau karaia taunimanima idauidau ibounai lau durua totona.’

Hegeregere, sekit gaukara lau matamaia neganai, egu pablik tok ginigunana be hanua lalonai ia noho stoa ta vairanai lau henia. Gabeai lau diba unai negadiai, Philippines dekenai vaia pablik tok be pablik gabudiai idia henia! Kongrigeisen ta ta lau vadivadi henia neganai, nega momo lai abia totona idia karaia ruma maragidia, maketi gabudia, ruma badadia vairanai, basketbol gabudia, loaloa gabudia, bona raka daladia edia kona ta dekenai pablik tok lau henia. Nega ta San Pablo Siti ai, medu bada ia diho dainai, maketi ai pablik tok lau henia diba lasi, unai dainai elda taudia lau noia Kingdom Hall ai tok lau henia totona. Unai murinai, tadikaka ese lau idia nanadaia bema hebou badana ta bamona unai do idia ripotilaia, badina unai hebou be pablik gabuna ta dekenai ai karaia lasi!

Nega momo tadikaka edia ruma dekenai lau noho. Ena be ruma be namo momokani lasi, to nega ibounai ia goeva. Nega momo lau be foloa ai idia atoa geda dekenai lau mahuta. Digudigu rumadia be lasi dainai, digudigu dabua namona lau hahedokilaia bona murimuri dekenai lau digu. Laolao totona jeepney bona basi lau gaukaralaia, bona nega haida bouti amo motumotu haida dekenai lau lao. Hesiai gaukara lau karaia lagani ibounai lalonai, sibona totona motuka ta lau hoia lasi.

Haroro gaukara bona kongrigeisen ta ta vadivadi henia karana ese lau ia durua Tagalog gado lau dibaia totona. Unai gado dibaia totona sikuli ta lau abia lasi, to haroro gaukara ai bona hebou ai tadikaka idia herevahereva neganai, lau kamonai namonamo. Tadikaka idia ura unai gado lau dibaia, unai dainai idia haheauka bona mai momokani ida edia lalohadai idia gwauraia, unai ese lau ia durua bada.

Nega ia hanaia lalonai, asainmen matamatadia lau abia dainai, gau haida lau haidaua. Lagani 1956 ai, Tadikaka Nathan Knorr ia vadivadi neganai, ai karaia nesenel hebouhebouna ai lau be taunimanima naria gaukarana lau karaia. Unai gaukara lau diba namonamo lasi, unai dainai ma haida amo diba lau abia. Lagani ta ia do abia lasi neganai, nesenel hebouhebou ma ta ai karaia bona hedikwota amo Tadikaka Frederick Franz ia vadivadi. Unai nega ai lau be hebouhebou lau naria, bona lau itaia Tadikaka Franz be unai gabu taudia ia laloa bada bona unai amo gau ta lau dibaia. Tadikaka taihu idia moale badina Tadikaka Franz be pablik tok ia henia neganai, ia ese Filipino tatau edia siedi, barong Tagalog, ia hahedokilaia.

Distrik naria gaukarana lau karaia matamaia neganai, gau ma haida lau haidaua be namo. Unai nega ai, vidio ladana The Happiness of the New World Society, be pablik gabudia dekenai ai hahedinaraia. Nega haida manumanu maragidia ese emai hakala karana idia hadikaia. Projector ena diari dainai, unai manumanu idia haboua bona projector ena lens dekenai idia kamokau. Gabeai gaukara badana ai karaia unai projector ai hagoevaia totona! Gabu idauidau ai unai vidio ai hahedinaraia be mai ena hekwarahi, to ai moale badina unai dala amo taunimanima idia diba Iehova ena orea be tanobada ibounai tadikaka oreana.

Katolik pris taudia ese gavamani ena gaukara taudia edia lalona idia veria, unai amo maoro do idia henia lasi hebouhebou ai karaia totona. Eiava edia dubu kahirakahira tok ai henia negadiai, idia ese dubu ena gaba idia botaia, unai amo taunimanima be tok ena hereva do idia kamonai lasi. Ena be unai idia karaia, to ai gaukara noho, bona unai gabu ai idia noho taudia momo be hari Iehova idia tomadiho henia.

MAURI IA IDAU

Lagani 1959 ai, revareva ta lau abia, bona unai revareva amo lau idia boiria brens ofesi ai lau gaukara totona. Unai dainai gau ma haida lau dibaia be namo. Daudau lasi, lau idia noia tano ma haida lau vadivadi henia totona. Unai laolao ta ai, Thailand ai misinari gaukara ia karaia taihu, Janet Dumond, lau hedavari henia. Nega daudau lalonai revareva amo ai tore heheni bona gabeai ai headava. Ai ruaosi be lagani 51 lalonai mai moale ida hesiai gaukara ai karaia hebou.

Lau moale badina tano 33 dekenai idia noho Iehova ena taunimanima lau vadivadi henia. Oibe, lau moale badina matamanai lau abia asainmen ese lau idia durua dala maorona ai taunimanima idauidau lau kara henia totona! Unai tano idauidau taudia vadivadi henia karana amo lau dibaia gauna be inai, Iehova be bese ibounai taudia ia lalokau henia.​—Kara 10:34, 35.

GAU MA HAIDA IDIA IDAU

Philippines ai, iseda tadikaka taihu ida gaukara hebou karana lau moalelaia bada! Hari edia pablisa namba ese lau mai matamata negana ena pablisa namba be nega 10 amo ia hanaia. Lau bona Janet be Quezon Siti ai ia noho Philippines brens ofesi dekenai ai do noho. Ena be lagani 60 mai kahanai unuseni ai noho, to lau noho hegaegae Iehova ena noinoi hegeregerena gau haida do lau haidaua. Orea lalonai senisi momo idia vara dainai, namona be iseda hesiai gaukara Dirava bona iseda tadikaka taihu dekenai ita laloa maoromaoro.

Namona be nega ibounai ita noho hegaegae Iehova ena ura ita karaia totona, bona unai be mauri dalana namona. Danu, gau haida ai haidaua toho, unai amo iseda tadikaka taihu ai hesiai henia namonamo diba. Oibe, emai lalona ai hadaia, Iehova ena ura hegeregerena, ‘gau ibounai do ai karaia taunimanima idauidau ibounai ai durua totona.’