Emui Lalohekwarahi Ibounai be Iehova Dekenai Umui Negea

1, 2. (a) Ita lalohekwarahi neganai, dahaka dainai ita hoa lasi be namo? (Laulau ginigunana herevalaia.) (b) Inai stadi ai dahaka do ita herevalaia?

ITA be lalohekwarahi negana ai ita noho. Satani Diabolo be ia badu dikadika bona “ia boiboi bada laiona bamona ia raka loaloa, do ia ania ore tauna ia tahua noho.” (1 Pet. 5:8; Apok. 12:17) Unai dainai ita hoa lasi, badina nega haida ita, Dirava ena hesiai taudia, be ita lalohekwarahi danu. Idaunegai Dirava ena hesiai taudia, hegeregere King Davida be nega haida ia “laloa hekwarahi bada.” (Sal. 13:2) Mani oi laloa, aposetolo Paulo danu be “dina ta ta ai kongrigeisen iboudiai dainai [ia] lalohekwarahi.” (2 Kor. 11:28) To, ita lalohekwarahi bada neganai, dahaka ita karaia be namo?

² Idaunegai, iseda lalokau guba Tamana ese ena hesiai taudia ia durua, bona hari danu ia ese ita do ia durua ita lalohekwarahi momo lasi totona. Baibel ia gwau: “Emui lalohekwarahi ibounai be ia dekenai umui negea, badina ia be umui ia laloa bada.” (1 Pet. 5:7) To, edena bamona unai oi karaia diba? Dala 4 mani ita herevalaia: (1) Guriguri, (2) Baibel duahiduahi bona laloa dobu, (3) Iehova ena lauma helaga ena heduru, bona (4) emui hemami be oi abidadama henia tauna ida oi herevalaia. Unai dala 4 ita herevalaia neganai, oi ura badinaia dalana oi laloa.

“OIEMU LALOA HEKWARAHI BE LOHIABADA DEKENAI DO OI HENIA”

3. Edena dala ai guriguri amo “oiemu laloa hekwarahi be Lohiabada dekenai do oi henia”?

³ Ita karaia kara ginigunana be Iehova ita guriguri henia. Bema oi dekenai ia vara gauna ta dainai oi lalohekwarahi, namona be emui kudouna ai ia noho gauna be iseda lalokau guba Tamana dekenai oi gwauraia. Davida be Iehova dekenai ia noinoi, ia gwau: “Dirava e, egu guriguri do oi kamonai.” Bena ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” (Sal. 55:1, 22) Hekwakwanai ta hamaoromaoroa totona gau ibounai oi karaia murinai, guriguri amo Iehova ena imana dekenai oi rakatania bona oi laloa momo lasi. To oi lalohekwarahi momokani neganai, edena dala ai guriguri karana ese oi ia durua diba?​—Sal. 94:18, 19.

4. Ita lalohekwarahi neganai, dahaka dainai guriguri be mai anina bada?

⁴ Filipi 4:6, 7 duahia. Mai kudouna ibounai ida ita gwauraia guriguridia be Iehova ese ia kamonai bona ita ia durua diba. Edena dala ai? Ita dekenai lalomaino do ia henia, bona unai ese iseda lalona bona kudouna ai idia noho lalohekwarahi do ia kokia. Momo be unai idia mamia. Ena be idia lalohekwarahi bada, idia laloa gau dikana ta do ia vara, to Dirava ese idia dekenai maino bona lalonamo ia henia, taunimanima edia laloparara ia hereaia gauna unai. Oi dekenai unai ia vara diba danu. “Dirava ena maino” ese oi do ia durua oi davaria hekwakwanai ibounai oi haheaukalaia totona. Iehova ena gwauhamata oi abidadama henia diba, ia gwau: “Namo lasi umui lalohekwarahi, badina lau be emui Dirava. Lau ese umui do lau hagoadaia, oibe, umui do lau durua.”​—Isa. 41:10, NWT.

BAIBEL AMO LALOMAINO ITA ABIA

5. Baibel ese edena dala ai ita dekenai lalomaino ia henia?

⁵ Lalomaino ita abia dalana iharuana be Baibel ita duahia bona laloa dobu. Dahaka dainai unai be mai anina bada? Baibel lalonai idia noho herevadia ese ita do idia durua lalohekwarahi karana ita dadaraia, hamaragia, eiava haheaukalaia totona. Laloatao, Baibel ese ita ia durua bona hagoadaia diba, badina ia lalonai iseda Havaraia Tauna ena aonega herevadia idia noho. Bema dina bona hanuaboi ai Dirava ena hereva oi laloa dobu, bona Baibel ai idia noho heduru herevadia badinaia daladia oi laloa, goada do oi abia. Danu, Iehova ia gwau bema iena Hereva ita duahia, ‘do ita goada bona do ita boga auka’ bona ‘do ita gari lasi, bona iseda lalona do ia manoka lasi.’​—Ios. 1:7-9.

6. Iesu ena hereva ese edena dala ai ita ia durua?

⁶ Baibel lalonai Iesu ena hereva namodia idia noho. Ia gwauraia herevadia ese iena kamonai taudia edia lalona ia hagoadaia. Oibe, taunimanima hutuma be ia dekenai idia mai, badina ia ese idia lalohekwarahi taudia, manoka taudia, bona idia lalometau taudia ia hagoadaia. (Mataio 11:28-30 duahia.) Ia ese ma haida ia lalokau henia dainai, idia dekenai sivarai namona ia gwauraia, bona hemami bona tauanina dalanai ia durudia. (Mar. 6:30-32) Hari danu Iesu ena hereva ese ita ia durua diba. Iesu idia bamoa aposetolo taudia ese idia mamia hegeregerena, ita danu unai do ita mamia. Oibe, guba ena King, Iesu, be ma haida edia hemami ia laloa. Unai dainai oi lalohekwarahi neganai, ia be mai hebogahisi ida oi do ia “durua” bona “heduru be nega maorona ai do [oi] abia.” Momokani, Iesu ese oi ia durua diba emu lalometau oi haheaukalaia totona, unai amo emu helaro do oi laloa noho bona do oi gari lasi.​—Heb. 2:17, 18; 4:16.

LAUMA HELAGA ENA HUAHUA

7. Lauma helaga totona oi noinoi neganai, Dirava ena heduru amo dahaka namo do oi davaria?

⁷ Iesu ia gwauhamata iseda Tamana guba ai ese lauma helaga be idia noinoi taudia dekenai do ia henia. (Luka 11:10-13) Emu lalohekwarahi hamaragia dalana ihatoina be lauma helaga ena huahua. Oibe, Dirava ena gaukara siahuna ese ia havaraia kara namodia ese siahu ibounai Diravana ena kara idia hahedinaraia. (Galatia 5:22, 23 duahia; Kol. 3:10) Lauma helaga ena huahua oi hahedinaraia neganai, emu hetura karana ma haida ida be do ia namo. Bona lalohekwarahi idia havaraia diba karadia be do idia vara lasi. Mani lauma helaga ena huahua ese oi ia durua dalana ita herevalaia.

8-12. Edena dala ai Dirava ena lauma helaga ena huahua ese oi ia durua diba?

⁸ “Lalokau, moale, maino.” Bema mai hemataurai ida taunimanima oi kara henia, sibona emu lalohadai kereredia oi hamaoromaoroa diba. Edena dala ai? Iseda tadikaka dekenai lalokau, hebogahisi, bona hemataurai oi hahedinaraia neganai, lalohekwarahi idia havaraia gaudia oi dadaraia diba.​—Roma 12:10.

⁹ “Boga-auka, hebogahisi, kara namo.” Ma haida ida maino ai do oi noho bema inai hahegani oi badinaia: “Do umui kara namo heheni bona hebogahisi heheni, bona mai kudouna ibounai ida do umui gwauatao heheni.” (Efe. 4:32) Unai oi karaia neganai, lalohekwarahi idia havaraia gaudia do oi koua diba. Danu, ita be goevadae lasi dainai, hekwakwanai idia vara neganai, do oi diba edena bamona unai do oi hamaoromaoroa.

¹⁰ “Abidadama.” Hari inai negai, moni bona kohu dainai nega momo ita lalohekwarahi. (Aon. 18:11) To, Iehova ena heduru karana oi abia dae momokani neganai, unai bamona lalohekwarahi karana oi dadaraia diba. Edena dala ai? Bema aposetolo Paulo ena sisiba oi badinaia, ia gwau oi “dekenai idia noho gaudia be hegeregere.” Ma ia gwau: “Badina Dirava ia gwau: ‘Lau ese umui do lau negea lasi, bona umui do lau rakatania lasi momokani.’ Unai dainai mai lalogoada ida do ita gwau: ‘Iehova be egu durua tauna, lau be do lau gari lasi. Taunimanima be lau dekenai dahaka idia karaia diba?’”​—Heb. 13:5, 6.

¹¹ “Manau, bona sibona biagua karana.” Bema unai kara rua oi hahedinaraia, namo bada ia vara diba. Reana lalohekwarahi idia havaraia karadia haida do oi dadaraia, hegeregere “inai heheni karana, badu, badu dikadika, boiboi badabada, hadikaia herevadia.” Bema unai karadia oi dadaraia, heduru bada do oi abia.​—Efe. 4:31.

¹² Momokani, namona be ‘Dirava ena imana goadana henunai oi sibona oi hamanaua’ bona emu “lalohekwarahi ibounai be ia dekenai [oi] negea.” (1 Pet. 5:6, 7) To manau oi hahedinaraia neganai, Dirava ese oi do ia lalonamo henia bona durua. (Mika 6:8) Bema sibona emu goada, lalohadai, bona hemami oi diba, do oi lalohekwarahi momo lasi, badina oi be Dirava dekenai do oi tabekau noho.

“UMUI LALOHEKWARAHI LASI”

13. Iesu ese inai hereva, “umui lalohekwarahi lasi” ia gwauraia neganai, ena hereva ena anina be dahaka?

¹³ Mataio 6:34 ai, (duahia) Iesu ena sisiba ia noho, ia gwau: “Umui lalohekwarahi lasi.” Reana do ia auka unai sisiba ita abia dae totona. To Iesu ena hereva ena anina be dahaka? Iesu ia gwau lasi Dirava ena hesiai tauna ta be do ia lalohekwarahi lasi, badina Davida bona Paulo edia hereva amo ita diba, Dirava ena hesiai taudia be idia lalohekwarahi diba danu. To iena hereva amo ia ese ena hahediba taudia ia hadibaia lalohekwarahi bada karana ese hekwakwanai ia hamaoromaoroa diba lasi. Dina ta ta be mai edia lalohekwarahi, unai dainai namo lasi Keristani taudia ese idaunega o vaira nega ena lalohekwarahi be hari dina ena lalohekwarahi ida idia atoa hebou. Lalohekwarahi ese oi ia hamanokaia lasi totona, edena dala ai Iesu ena sisiba ese oi ia durua diba?

14. Kerere gunadia lalohekwarahilaia karana be edena bamona oi hanaia diba?

¹⁴ Nega haida ta be iena kerere gunadia dainai ia lalohekwarahi diba. Reana unai kerere be lagani momo gunanai ia karaia, to unai ia do lalohisihisilaia noho. King Davida be nega haida ia mamia iena “kerere bada ese, [iena] kwarana idia koua.” Ia gwau: “Egu kudouna ia hisihisi noho, bona hisihisi dainai lau tai noho.” (Sal. 38:3, 4, 8, 18) Unai nega ai, Davida be dahaka ia karaia be namo? Ia karaia gauna be ia abia dae momokani Iehova be hebogahisi Diravana bona iena dika do ia gwauatao. Unai dainai ia gwau: “Dirava ese tau ta ena kara dika ia gwauatao neganai, unai tau be ia namo.”​—Salamo 32:1-3, 5 duahia.

15. (a) Dahaka dainai hari idia vara gaudia ita lalohekwarahilaia lasi be namo? (b) Lalohekwarahi hamaragia totona dahaka oi karaia diba? (Maua ladana, “Laloa Momo Karana Koua Daladia” itaia.)

¹⁵ Nega ma haida ai, reana hari idia vara gaudia dainai oi lalohekwarahi diba. Hegeregere, Davida be Salamo karoa 55 ia torea neganai, ia gari dika ia idia hamasea. (Sal. 55:2-5) To, ia ura lasi lalohekwarahi karana ese iena abidadama karana Iehova dekenai ia hadikaia. Unai dainai Davida ese unai ia gurigurilaia, to danu ia laloparara ia ese gau haida ia karaia diba iena lalohekwarahi ia hamaoromaoroa totona. (2 Sam. 15:30-34) Davida amo gau ta ita dibaia. Namo lasi lalohekwarahi ese ita ia hamanokaia, to namona be gau haida ita karaia iseda lalohekwarahi ita hamaoromaoroa totona, bona iseda lalohekwarahi be Iehova ena imana dekenai ita rakatania.

16. Edena dala ai Dirava ena ladana ena anina ese emui abidadama ia hagoadaia diba?

¹⁶ Nega haida Keristani tauna be vaira nega ena hekwakwanai ia lalohekwarahilaia kava diba. To namo lasi oi diba lasi gauna ta dainai oi lalohekwarahi kava. Dahaka dainai? Badina nega haida gau ta be ita lalohadailaia hegeregerena do ia vara lasi. Unai dainai, namona be gau ibounai ia biagua Diravana dekenai iseda lalohekwarahi ita negea. Iena ladana ena anina be “Dahaka ai Lau Ura Sibona Lau Halaoa be Do Lau Halaoa.” (Eso. 3:14, NWT) Iena ladana ena anina ese ia hahedinaraia, Dirava ese iena ura iena hesiai taudia totona be do ia hagugurua. Namona be inai oi abia dae momokani, Iehova ese iena abidadama hesiai taudia dekenai ahuna do ia henia bona idia do ia durua, guna, hari, bona vaira nega ena lalohekwarahi idia haheaukalaia totona.

HEREVAHEREVA HEBOU

17, 18. Edena dala ai herevahereva namonamo karana ese oi ia durua diba?

¹⁷ Emui lalohekwarahi haheaukalaia dalana namba 4 be herevahereva hebou karana amo, anina be emu hemami be oi abidadama henia tauna ida oi herevalaia diba. Reana ia be emui adavana, tura namona ta, o kongrigeisen ena elda ta, idia ese oi idia durua diba oi lalohekwarahilaia gauna oi laloa namonamo totona. “Laloa metau ese oiemu moale do ia koua, to hereva namodia ese oi idia hamoalea diba.” (Aon. 12:25) Mai momokani ida emui hemami oi gwauraia hedinarai neganai, unai ese oi do ia durua oi lalohekwarahilaia gauna oi lalopararalaia bona haheaukalaia totona. Baibel ia gwau: “Sisiba momo do oi tahua noho, bona do oi kwalimu, to sisiba do oi abia lasi neganai, do oi moru.”​—Aon. 15:22.

¹⁸ Iehova ese danu kongrigeisen heboudia amo Keristani taudia ia durua edia lalohekwarahi gaudia idia haheaukalaia totona. Unuseniai emu tadikaka taihu oi bamoa diba, idia be oi idia laloa bona idia ura oi idia hagoadaia. (Heb. 10:24, 25) Unai bamona “hagoadaia heheni” karana ese oi do ia durua emui abidadama hagoadaia gaudia oi karaia noho bona emu lalohekwarahi oi haheaukalaia totona.​—Roma 1:12.

EMUI HETURA KARANA DIRAVA IDA ​—GOADA ABIA DALANA BADANA

19. Dahaka dainai oi abia dae momokani emui hetura karana Dirava ida ese oi ia hagoadaia diba?

¹⁹ Canada ai ia noho elda ta ese Iehova dekenai ena lalohekwarahi ia negea karana ena namo ia herevalaia. Ia be sikuli tisa ta bona danu ia be mai ena kwara gorerena (anxiety disorder). Tadikaka be edena bamona unai ia haheaukalaia? Ia gwau: “Lau gaukara goada egu hetura karana Iehova ida do lau hagoadaia, unai ese lau ia durua bada egu lalometau lau haheaukalaia totona. Lalometau negadiai, tura namodia bona tadikaka taihu edia heduru be mai anina bada. Lauegu adavana dekenai egu hemami lau gwauraia hedinarai, lau hunia lasi. Elda taudia bona sekit taudia edia heduru ese lau ia durua lau laloa namonamo totona. Danu, medikol heduruna lau tahua, egu nega lau haria namonamo, bona nega lau atoa lau laga-ani bona eksasais totona. Metairametaira, lau sibona ese egu hemami lau biagua diba. Bema gau haida lau karaia diba lasi, Iehova ena imana dekenai unai lau rakatania.”

20. (a) Edena dala ai iseda lalohekwarahi be Dirava dekenai do ita negea? (b) Stadi gabena ai dahaka do ita herevalaia?

²⁰ Inai stadi amo ita dibaia gauna be inai, namona be guriguri bona Baibel duahia bona laloa dobu karana amo iseda lalohekwarahi be Dirava dekenai ita negea. Danu, iseda lalohekwarahi ita haheaukalaia totona, namona be lauma helaga ena huahua ita hahedinaraia, iseda hemami be ita abidadama henia tauna ida ita herevalaia, bona iseda tadikaka taihu bamoa karana amo goada do ita abia. Stadi gabena ai, Iehova ese ita ia durua dalana ma ta do ita herevalaia​—do ita abia davana namona unai.​—Heb. 11:6.