Hosi Guia Taudia Foa Bona Oi

Idia heau neganai, edia aena ese regerege bada herea ia karaia! Baibel amo hosi goadadia foa bona edia guia taudia edia sivarai oi duahia neganai, unai laulau herevana be emu lalona ena matana amo oi itaia diba. Hosi ginigunana be kurokuro, ia latanai ia guia tauna be ia diaridiari, ia be idia abia hidi King matamatana. Ia murinai ia mai hosi be kakakaka, bona ia latanai ia guia tauna ese tanobada ibounai amo maino ia kokia. Ia murinai ia mai hosi be korema, dibura bamona, hosi ia guia tauna be sikele ia dogoatao bona aniani ia ore sivaraina ia gwauraia. Hosi namba foa be laboralabora, ia ese gorere bona metau badadia ia laulaulaia, ia latanai ia guia tauna be Mase. Bona Gara, taunimanima guria gabuna, be ia murinai ia mai bona taunimanima momo herea ia hamasea.​—Apokalupo 6:1-8.

“Nega ginigunana hosi guia taudia foa edia sivarai lau duahia neganai, lau gari. Lau laloa Hahemaoro Dinana ia mai bona toana be lau hegaegae lasi dainai, do lau roho mauri lasi.”​—Crystal.

“Hosi guia taudia idauidau bona edia hosi ena kala idauidau dainai lau hoa bada. Matahanai ena anina lau diba neganai, unai sivarai ibounai lau lalopararalaia.”​—Ed.

Crystal ese Hahemaoro Dinana ai idia heau hosi guia taudia foa edia sivarai ia duahia neganai ia gari, oiemu hemami be ia hegeregerena, a? Eiava emu hemami be Ed ena hemami hegeregerena? Unai sivarai amo ita itaia, Apokalupo bukana, Baibel ena buka ginigabena unai, ese hosi guia taudia foa edia sivarai ia gwauraia namo herea. Unai matahanai lalopararalaia karana amo namo bada do oi abia. Edena dala ai? Bema unai peroveta bukana lalonai idia torea herevadia ita duahia, diba ita abia, bona ena hereva ita badinaia, Dirava ia gwauhamata ita ese moale korikorina do ita davaria.​—Apokalupo 1:1-3.

Haida ese hosi guia taudia foa edia sivarai idia duahia neganai idia gari, to inai sivarai be oi hagaria totona idia torea lasi. Badina unai sivarai ese taunimanima milioni momo edia abidadama ia hagoadaia bona idia dekenai vaira nega namona ia hahedinaraia. Oi dekenai unai bamona ia karaia diba danu. Mani murina atikol danu oi duahia.