Paradaiso Tanobada Dekenai​​—⁠Lalohadai Ta Sibona Eiava Do ia Vara Momokani?

Paradaiso! Holidei buklet momo ese gabu mai hairaidia, edia toana be paradaiso bamona idia hahedinaraia, bona idia gwau laga-ani totona unuseni ita lao bona eda lalometau bona lalohekwarahi ibounai ita laloaboio diba. To ita diba, holidei amo ita giroa lou neganai, gau ibounai be idia hegeregere, guna ita rakatania bamona.

To momokani, paradaiso be taunimanima ese idia laloa momo gauna ta. Reana ita laloa, ‘Paradaiso be lalohadai namona ta sibona, eiava? Bema oibe, vadaeni dahaka dainai paradaiso ita laloa? Do ia vara momokani, a?’

PARADAISO ENA LALOHADAI

Lagani handred momo lalonai, taunimanima idia ura paradaiso idia diba. Unai bamona lalohadai idia abia, badina Baibel ese ‘uma ta dina ia daekau kahana dekenai ia noho, ladana Eden,’ ia gwauraia. Dahaka dainai unai uma be mai ena hairai bada? Baibel ia gwau: “Lohiabada Dirava ese tano dekena amo toana namo au ibounai ia havaraia, bona aniani idia atoa audia danu.” Unai uma be mai ena hairai bona ia be gabu namona ta. To lalona ia veria gauna badana ta be inai, “uma ena huana dekenai mauri ena au” ta ia noho danu.​—⁠Genese 2:8, 9.

Danu, Genese bukana ese sinavai foa ia gwauraia, idia be uma gabuna amo idia aru lao. Unai sinavai rua be hari idia noho, idia be Taigarisi (eiava Hiddekel) bona Euperate sinavaidia. (Genese 2:10-14) Unai sinavai rua be Persian Gulf davarana dekenai idia aru lao, unai gabu be hari Iraq, guna ia be Parasa ena kahana ta.

Unai dainai Parasa taudia edia kastom lalonai, tanobada paradaisona idia herevalaia momo. Lagani 1500 lalonai Parasa taudia ese idia gaukaralaia kapet ta ena laulau ese magu ta lalonai ia noho uma ta ia hahedinaraia, unai uma be mai ena au bona flaoaflaoa momo, bona unai kapet be Philadelphia Museum of Art lalonai idia atoa, Pennsylvania, U.S.A. ai. Parasa gado ai, inai hereva “magu lalonai ia noho uma” ena anina ma ta be paradaiso, bona unai kapet dekenai ia noho laulau be Baibel ese ia gwauraia Eden umana mai hairaina ena toana ia hahedinaraia.

Momokani, tanobada hegegemadai paradaiso ena sivarai be gado momo dekenai idia gwauraia loulou. Tanobada besedia be tanobada ena kahana idauidau dekenai idia lao neganai, paradaiso ena sivarai danu idia abia lao, to lagani handred momo lalonai, unai sivarai be sene herevadia bona gori sivaraidia ida idia hakapua. Hari inai negai danu, taunimanima momo be gabu mai hairaina idia itaia neganai, idia gwau unai be paradaiso.

PARADAISO IDIA TAHUA

Gabu matamata idia tahua taudia haida idia gwau ia boio paradaisona idia davaria. Hegeregere Britain ena ami jeneral ta, Charles Gordon, be lagani 1881 ai Seychelles ia vadivadi henia neganai, Vallée de Mai ena gabu hairaina dainai ia hoa bada bona unai gabu ia gwauraia Eden umana, hari unai gabu be World Heritage ena lista ai ia noho. Lagani 1500 lalonai, Italy tauna Christopher Columbus be Hispaniola motumotuna, hari idia gwauraia Dominican Republic bona Haiti, dekenai ia ginidae neganai, ia laloa Eden Umana ia davaria lou.

Histori bukana ta (Mapping Paradise) lalonai idaunega mapu 190 idia noho, idia momo ese Eden umana lalonai Adamu bona Heva edia laulau idia hahedinaraia. Unai mapu ibounai amo idia ta be idau, badina unai mapu ese lagani 1300 ai ia noho tauna Beatus, ia be Liébana amo ena maniuskrip ena kopi ta ia hahedinaraia. Unai mapu ena ataiai maua maragina ta ia noho, bona iena huanai paradaiso ena laulau ia noho. Unuseni amo sinavai foa idia aru, edia ladadia be “Taigarisi,” “Euperate,” “Indus,” bona “Ioridane,” idia be mapu ena kona foa dekenai idia noho, unai ese Keristani tomadihona be tanobada ena kona foa dekenai idia lao karana ia laulaulaia. Unai ese ia hahedinaraia, ena be Paradaiso ginigunana ia noho gabuna be ta ia diba lasi, to taunimanima ese unai gabu idia laloa neganai, gabu hairaina ta idia laloa.

Lagani 1700 ai ia noho poem torea tauna, John Milton, be Paradise Lost ia torea, unai poem ena hereva be Genese bukana amo ia abia, Adamu be ia kara dika bona Dirava ese Eden Umana amo ia lulua murinai. Gabeai Milton ese buka ma ta ia torea, ena hereva kwarana be Paradise Regained. Unai buka lalonai, ia ese taunimanima be tanobada ai mauri hanaihanai do idia abia ena gwauhamata ia gwauraia, ia gwau: “Gabeai tanobada ibounai be paradaiso ai do ia lao.” Unai murinai, Milton ese buka ta ia torea, ena hereva kwarana be, Paradise Regained.

PARADAISO TAHUA KARANA IDIA HADOKOA

Ia hedinarai goevagoeva, tanobada ai paradaiso ia boio herevana be edia histori lalonai idia gwauraia loulou. To dahaka dainai hari taunimanima ese unai idia herevalaia momo lasi? Badina unai buka (Mapping Paradise) ia gwau, “tomadiho idia stadilaia taudia . . . ese tanobada ai paradaiso ia noho gabuna tahua karana idia hadokoa.”

Dubu taudia momo idia hadibaia idia be guba dekenai mauri do idia abia, to tanobada paradaisona ai lasi. To Baibel be Salamo 37:29 dekenai ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” Hari iseda tanobada be paradaiso lasi, unai dainai dahaka ese ia hamomokania inai gwauhamata be do ia vara momokani?a

TANOBADA PARADAISO BE DO IA VARA MOMOKANI

Matamana ai Paradaiso ia havaraia tauna, Iehova Dirava, ia gwauhamata, ia ese ia boio paradaisona do ia havaraia lou. Edena dala ai? Iesu ese ita dekenai guriguri dalana ia hadibaia, ia gwau: “Oiemu Basileia do ia mai. Oiemu ura gauna tanobada dekenai do ia vara, guba dekenai ia vara bamona.” (Mataio 6:10) Unai Basileia be Iesu Keriso ese do ia lohiaia gavamani ta, ia ese tanobada taudia edia lohia ibounai do ia kokia. (Daniela 2:44) Unai Basileia ena lohia henunai, Dirava ena ura tanobada paradaisona totona be “do ia vara.”

Lauma helaga ese peroveta tauna Isaia ia hasiahua, bena ia ese Dirava ia gwauhamatalaia Paradaisona ia herevalaia, unuseniai hari ita mamia hekwakwanai ibounai do idia ore momokani. (Isaia 11:6-9; 35:5-7; 65:21-23) Oi ai hagoadaia, mani miniti haida lalonai emu Baibel amo unai siri oi duahia totona. Bema unai bamona oi karaia, Dirava ese vaira nega ai taunimanima totona ia karaia gaudia do oi dibaia. Idia mauri taudia ese paradaiso bona Dirava ena lalonamo do idia moalelaia, unai gaudia rua be Adamu ese ia haboioa.​—⁠Apokalupo 21:3.

Dahaka dainai ita diba momokani Paradaiso helarona tanobada ai be lalohadai ta sibona lasi to do ia vara momokani? Badina Baibel ia gwau: “Guba be Lohiabada sibona ese ia biagua noho, to tanobada be Lohiabada ese taunimanima dekenai ia henia.” Tanobada Paradaiso helarona be “Dirava ese ia gwauhamatalaia, bona Dirava be [Ia] koikoi diba lasi.” (Salamo 115:16; Tito 1:2.) Baibel ese helaro namo hereana ia gwauraia, Paradaiso ai do ita noho ela bona hanaihanai!