“Lalokau be . . . mai Momokani ida Iseda Kara amo Ita Hahedinaraia”

1. Edena lalokau be hereadaena, bona dahaka dainai? (Laulau ginigunana herevalaia.)

IEHOVA be lalokau ena Badina. (1 Ioa. 4:7) Oibe, lalokau mai ena hakaua hereva maorodia (a·gaʹpe) be Iehova amo ia mai harihari gauna. Bona unai bamona lalokau be lalokau hereadaena. Unai lalokau be ma ta dekenai ita hahedinaraia diba, bona ma haida edia namo totona ita karaia gaudia amo unai ia hedinarai. Buka ta ia gwau, a·gaʹpe “be ta ese ia karaia karadia sibona amo ia hedinarai.” Lalokau ita hahedinaraia o ma ta ese ita dekenai lalokau ia hahedinaraia neganai, do ita moale bona mamia iseda mauri be mai anina.

2, 3. Iehova ese edena dala ai taunimanima dekenai ena lalokau ia hahedinaraia?

² Iehova ese Adamu bona Heva ia do havaraia lasi neganai, ia karaia gaudia amo iena lalokau taunimanima totona ia hahedinaraia. Hegeregere, ia ese tanobada ia karaia, unai amo taunimanima ese do idia noholaia hanaihanai, bona edia mauri do idia moalelaia. Iehova be iseda namo ia laloa dainai unai ia karaia, to sibona ena ladana abia isi totona lasi. Danu, lalokau ia hahedinaraia dalana ta be iena tanobada natudia ia hanamodia, unai amo ia hegaegaelaia Paradaisona ai do idia noho hanaihanai.

³ Adamu bona Heva idia gwau-edeede murinai, Iehova be lalokau hereadaena ia hahedinaraia. Ia ese dala ia karaia unai gwau-edeede taudia rua edia bese ia hoia lou totona, badina ia diba idia haida be Iena lalokau karana do idia mamia. (Gen. 3:15; 1 Ioa. 4:10) Iehova ese vaira nega ai taunimanima do ia Hamauria Tauna ia gwauhamatalaia neganai, unai be hegeregere ia ese unai boubou gauna ia henia vadaeni. Bena lagani 4,000 bamona murinai, Iehova ese ena Natuna korikorina be taunimanima ibounai totona ia bouboulaia. (Ioa. 3:16) Iehova ena lalokau kara hereadaena dainai ita moale!

4. Dahaka ese ia hahedinaraia goevadae lasi taudia be lalokau idia hahedinaraia diba?

⁴ Lalokau ita hahedinaraia diba, badina Dirava ese ena toana hegeregerena ita ia karaia. To ita be goevadae lasi dainai, nega haida ia auka lalokau ita hahedinaraia totona, to herevana dahaka, lalokau ita hahedinaraia diba. Abela ese ena mamoe namodia ia bouboulaia neganai, ia hahedinaraia ia be Dirava ia lalokau henia. (Gen. 4:3, 4) Noa ese ena bese taudia ia lalokau henia dainai, lagani momo lalonai idia ia haroro henia, herevana ia harorolaia sivaraina idia abia dae lasi. (2 Pet. 2:5) Dirava ese Aberahamo ia hamaoroa ena natuna Isako do ia bouboulaia neganai, Aberahamo be ena hemami ia laloa lasi, to ena lalokau Dirava dekenai ia laloa bada. (Iam. 2:21) Unai abidadama tatau hegeregerena, ita ura lalokau ita hahedinaraia, herevana dahaka hekwakwanai ita davaria.

LALOKAU KORIKORINA BONA KOIKOINA

5. Edena dala haida ai lalokau korikorina do ita hahedinaraia?

⁵ Baibel ia gwau lalokau korikorina be “hereva eiava uduna sibona amo lasi, to mai momokani ida iseda kara amo ita hahedinaraia.” (1 Ioa. 3:18) Unai ena anina be iseda hereva amo lalokau ita hahedinaraia diba lasi, a? Lasi! (1 Tes. 4:18) To ena anina be iseda lalokau be hereva sibona amo ita hahedinaraia lasi, to kara amo ita hahedinaraia danu. Hegeregere, bema iseda Keristani tadikaka ta be tauanina gaudia dekenai ia dabu, ia ita hagoadaia sibona be hegeregere lasi. (Iam. 2:15, 16) Unai hegeregerena, Iehova bona iseda dekena taudia ita lalokau henia dainai, Dirava ita noia “gaukara taudia do ia siaia” sibona lasi, to haroro gaukara ita durua danu.​—⁠Mat. 9:38.

6, 7. (a) “Lalokau koikoina lasi” ena anina be dahaka? (b) Lalokau koikoina ena haheitalai haida be dahaka?

⁶ Aposetolo Ioane ia gwau, namona be “mai momokani ida iseda kara” amo lalokau ita hahedinaraia. Bona namona be iseda lalokau be “lalokau koikoina lasi.” (Roma 12:9; 2 Kor. 6:6) Anina be lalokau korikorina ita hahedinaraia diba lasi, bema mai kudouna ibounai ida unai ita karaia lasi. Reana ita laloa, ‘Mai koikoi ida lalokau ita hahedinaraia diba, a?’ Lasi! Unai be lalokau karana lasi.

⁷ Lalokau koikoina idia hahedinaraia taudia haida mani ita laloa. Eden umana ai, Satani be koikoi dalanai ia ura hahedinaraia ia be Heva ena namo ia laloa, to momokani ia be sibona ena namo ia laloa. (Gen. 3:4, 5) Davida ena nega ai, Ahitopela ena kara amo ia hahedinaraia ia be king ena tura korikorina lasi. Ia be sibona ena namo ia laloa dainai, king ia gwau-edeede henia. (2 Sam. 15:31) Hari danu, aposteit bona kongrigeisen idia hapararaia taudia be “hereva digaradia bona hanamoa hereva koikoidia” amo edia lalokau idia hahedinaraia, to momokani idia be sibodia edia namo idia laloa.​—⁠Roma 16:17, 18.

8. Ita sibona dekenai dahaka henanadai do ita henia?

⁸ Lalokau koikoina be hemarai karana, badina unai kara amo ita be taunimanima ita koia. Ena be taunimanima ita koia diba, to Iehova ita koia diba lasi. Iesu ia gwau koikoi taudia be “panisi dikana momokani do ia henia.” (Mat. 24:51) To, Iehova ena hesiai taudia be lalokau koikoina idia hahedinaraia lasi. Sibona ita nanadaia, ‘Lau be lalokau korikorina lau hahedinaraia, eiava sibona egu namo lau laloa dainai lau koikoi?’ Mani “lalokau koikoina lasi” ita hahedinaraia dala 9 ita herevalaia.

“LALOKAU BE . . . MAI MOMOKANI IDA ISEDA KARA AMO ITA HAHEDINARAIA”

9. Iseda tadikaka ita lalokau henia dainai dahaka do ita karaia?

⁹ Mai moale ida Iehova hesiai henia, herevana ta be oi karaia gauna ia itaia lasi. Bema dala ia kehoa, “hehuni dekenai” iseda tadikaka dekenai lalokau ita hahedinaraia diba. (Mataio 6:1-4 duahia.) Anania bona Sapira be unai idia karaia lasi. Idia be hehuni dalanai edia kontribusen idia henia lasi, to taunimanima vairanai idia gwauraia hedinarai, bona edia koikoi karana dainai dika idia davaria. (Kara 5:1-10) To bema iseda tadikaka ita lalokau henidia momokani, mai moale ida idia do ita durua, bona namo lasi ita karaia gauna ita herevalaia loaloa. Hegeregere, tadikaka haida be Hakaua Oreana idia durua Baibel buka bona magasin idia hegaegaelaia totona, to idia be sibodia idia laloa bada lasi eiava idia karaia gauna be ma haida dekenai idia kikilaia lasi.

10. Edena bamona ma haida dekenai hemataurai ita hahedinaraia diba?

¹⁰ Ma haida dekenai hemataurai hahedinaraia. (Roma 12:10 duahia.) Iesu ese ena hahediba taudia edia aena ia huria neganai, ia hahedinaraia ia be idia ia matauraia. (Roma 12:10) Namona be ita gaukara goada manau ita hahedinaraia totona, unai amo ma haida dekenai hemataurai ita hahedinaraia diba. Aposetolo taudia be Iesu ena kara idia lalopararalaia lasi ela bona lauma helaga idia abia. (Ioa. 13:7) Bema iseda edukeisen, kohu, eiava Iehova ena orea lalonai ita abia hahenamo dainai ita heagi lasi, ita hahedinaraia ita be ma haida ita matauraia. Bona bema ta be hanamoa ia abia, ita mama lasi, to ia ida ita moale, ena be ita laloa ita karaia gaukarana dainai ita danu be hanamoa ita abia be namo.

11. Dahaka dainai mai kudouna ibounai ida ta ita hanamoa be namo?

¹¹ Mai kudouna ibounai ida emui tadikaka umui hanamoa. Dala ia kehoa neganai, ta ta ita hanamoa be namo, badina unai dala amo ‘ita hagoadaia’ heheni diba. (Efe. 4:29) To mai kudouna ibounai ida unai ita karaia be namo. Ita ura lasi ta ita hanamoa koikoi eiava ita hahedinaraia ita ura lasi heduru herevana ita henia. (Aon. 29:5) Bema ta ita hanamoa, to gabeai ma haida dekenai ia hadikaia herevadia ita gwauraia, ita be ita koikoi. Aposetolo Paulo be unai bamona kara ia dadaraia bona ma haida hanamoa karana amo lalokau ia hahedinaraia. Hegeregere, mai kudouna ibounai ida Korinto ai idia noho Keristani taudia edia kara dainai idia ia hanamoa. (1 Kor. 11:2) To idia ia hanamoa lasi neganai, unai ia karaia ena badina be mai manau ida ia gwauraia hedinarai.​—⁠1 Kor. 11:20-22.

12. Heabidae karana dekenai edena dala ai lalokau korikorina ita hahedinaraia diba?

¹² Heabidae karana hahedinaraia. Iehova ese ita ia hagania iseda tadikaka taihu dekenai hariharibada karana do ita hahedinaraia. (1 Ioane 3:17 duahia.) To namona be mai laloa maorona ida unai ita karaia, bona sibona laloa bada karana ita dadaraia. Bona sibona ita nanadaia diba: ‘Heabidae karana be egu tura namodia, ladana bada taudia, o egu kara namo do idia haloua taudia sibona dekenai lau hahedinaraia, a? Eiava lau diba namonamo lasi tadikaka taihu o egu kara namo do idia haloua diba lasi taudia dekenai hariharibada karana lau hahedinaraia, a?’ (Luka 14:12-14) Eiava bema iseda Keristani tadikaka ta be ia palani namonamo lasi dainai, ia dabu o iseda heabidae karana dainai ita ia tanikiu henia lasi be edena bamona? Unai bamona negadiai, inai hakaua herevana do ita badinaia: “Namona be ta ta dekenai heabidae karana umui hahedinaraia, bona umui maumau lasi.” (1 Pet. 4:9) Bema mai laloa maorona ida henia karana ita hahedinaraia, do ita moale.​—⁠Kara 20:35.

13. (a) Edena bamona negana ai ita haheauka be namo? (b) Manoka taudia durua totona dahaka ita karaia diba?

¹³ Manoka taudia durua. Baibel ese ita ia hagania, ‘manoka taudia do ita durua bona taunimanima ibounai dekenai do ita haheauka.’ Unai hahegani ese iseda lalokau karana ia tohoa diba. (1 Tes. 5:14) Ena be idia manoka taudia momo be gabeai idia goada, to ma haida be mai haheauka ida ita durua noho be namo. Idia ida hahegoada Baibel siridia ita kikilaia diba, ita boiridia ita ida idia haroro totona, eiava nega ita atoa edia lalohekwarahi ita kamonai totona. Ma danu, namo lasi ita laloa tadikaka o taihu ta be ia “goada” o ia “manoka,” to namona be ita laloatao ita ibounai be mai iseda namo bona manoka gaudia. Aposetolo Paulo danu be sibona ena manoka gaudia ia gwauraia. (2 Kor. 12:9, 10) Oibe, ita ibounai be iseda Keristani tadikaka taihu amo heduru ita abia diba.

14. Iseda tadikaka ida maino ai ita noho totona, dahaka ita karaia be namo?

¹⁴ Maino karaia. Namona be ita hekwarahi iseda tadikaka taihu ida maino ai ita noho totona, herevana ita dekenai lalohadai kererena idia abia eiava ita idia kara namo henia lasi. (Roma 12:17, 18 duahia.) Sori herevana ese badu ia koua diba, to mai kudouna ibounai ida unai ita karaia be namo. Hegeregere, namo lasi oi gwau, “Lau sori unai bamona oi mamia,” to oi karaia kererena dainai oi gwau diba, “Emu hemami lau hadikaia dainai lau sori.” Headava lalonai maino ia noho be mai anina bada. Namo lasi tau bona hahine be taunimanima vairanai idia hahedinaraia idia be ta ta idia lalokau henia, to sibona idia noho neganai, idia herevahereva lasi, ma ta hahisia herevadia idia gwauraia, eiava idia dagedage.

15. Edena dala ai ita hahedinaraia ita be ma ta ena dika ita gwauatao?

¹⁵ Dika gwauatao. Bema ta be ita ia hahisia, iena dika do ita gwauatao bona ita badu noho lasi. Do ita gwauatao heheni bona ‘mai lalokau ida ta ta edia kara do ita haheaukalaia. Do ita gaukara goada lauma helaga ese ia henia lalotamona karana ita badinaia totona, bona maino ese ita do ia hatamonaia.’ (Efe. 4:2, 3) Mai kudouna ibounai ida ta ena dika ita gwauatao ena anina be iseda lalohadai ita biagua bona “ta ena kerere [ita] laloatao noho lasi.” (1 Kor. 13:4, 5) Bema ta ita do badu henia noho, iseda hetura karana Iehova bona iseda tadikaka taihu ida ita hadikaia diba. (Mat. 6:14, 15) Bona bema ita idia kara dika henia taudia dainai ita guriguri, ita hahedinaraia edia dika ita gwauatao.​—⁠Luka 6:27, 28.

16. Iehova ena orea lalonai ita abia hahenamo be edena bamona do ita laloa?

¹⁶ Ta ena namo atoa guna. Bema Iehova ena orea lalonai hahenamo haida ita abia, ‘namo lasi ita be sibona iseda namo ita tahua, to namona be ma ta ena namo ita tahua,’ unai amo lalokau ita hahedinaraia diba. (1 Kor. 10:24) Hegeregere, hebouhebou maragidia bona badadia ai, atendan taudia be nega momo idia ginidae guna dainai, reana do idia laloa idia bona edia ruma bese totona helai gabudia namodia do idia abia hidi. To, idia momo be unai bamona idia karaia lasi. Unai amo idia hahedinaraia edia tadikaka taihu idia lalokau henidia. Edia haheitalai namona be edena bamona oi tohotohoa diba?

17. Bema ta be kara dika badana ta ia karaia, lalokau karana be dahaka?

¹⁷ Emu kara dika oi gwauraia hedinarai. Keristani taudia haida be edia kara dika idia hunia, badina idia ura lasi sibona idia hahemaraia eiava ma haida idia hahisia. (Aon. 28:13) To unai be lalokau karana lasi, badina unai ese kerere ia karaia tauna bona ma haida ia hadikaia. Danu, Dirava ena lauma helaga ia koua bona kongrigeisen ena maino ia hadikaia diba. (Efe. 4:30) Lalokau korikorina ese ia kara dika Keristani tauna do ia doria elda taudia ia hereva henia totona, bena elda taudia edia heduru do ia abia.​—⁠Iam. 5:14, 15.

18. Dahaka dainai lalokau ita hahedinaraia be gau badana?

¹⁸ Lalokau be kara hereadaena. (1 Kor. 13:13) Lalokau ese ia hamomokania ita be Iesu ena hahediba taudia bona lalokau ena Badina, Iehova, ita tohotohoa. (Efe. 5:1, 2) Paulo ia gwau: “Bema . . . lau dekenai lalokau be lasi, lau be anina lasi.” (1 Kor. 13:2) Namona be hanaihanai lalokau ita hahedinaraia, ‘hereva sibona amo lasi’ to “kara amo ita hahedinaraia” danu.