‘Hariharibada Karana Hahedinaraia’

GUNA negana amo, tomadiho momokani lalonai boubou karadia be mai anina bada. Israela taudia be animal idia bouboulaia, to Keristani taudia be hanaihanai “Dirava idia hanamoa.” Dirava be boubou gaudia ma haida ia moalelaia danu. (Heb. 13:15, 16) Unai boubou gaudia ese ta ia hamoalea bona hanamoa diba, henunai idia noho haheitalai ese unai do idia hahedinaraia.

Abidadama hahinena, Hana, be ia ura dikadika natuna ta ia havaraia, to ia be gabani. Guriguri amo Iehova dekenai ia gwauhamata, bema natuna ta ia havaraia, “Lohiabada dekenai do [ia] henia lou, . . . iena mauri dinadia ibounai lalonai.” (1 Sam. 1:10, 11) Nega sisina murinai, Hana ia rogorogo bona natuna ta ia havaraia, iena ladana ia hatoa Samuela. Samuela ia bada neganai, Hana ese ena gwauhamata hegeregerena dubu helaga dekenai ia abia lao. Hana be sibona ena ura ia dadaraia dainai, Iehova ese ia hanamoa. Natudia ma 5 ia havaraia bona Samuela be peroveta tauna ai ia lao bona Baibel ia torea danu.—⁠1 Sam. 2:21.

Hana bona Samuela bamona, hari Keristani taudia be edia mauri idia gaukaralaia edia Havaraia Tauna idia hesiai henia totona. Danu, Iesu ia gwauhamata Iehova tomadiho henia totona ita karaia boubou gaudia ibounai dainai, hahenamo bada do ita abia.—Mar. 10:28-30.

Aposetolo edia negai, Keristani hahinena ladana Doreka be “kara namodia momo ia karaia,” bona momo be unai idia diba. To madi, “ia gorere bona ia mase” dainai, kongrigeisen taudia idia lalohisihisi bada. Hahediba taudia idia kamonai Petero be unuseni ia noho neganai, maoromaoro ia dekenai hereva idia siaia. Petero ia mai bona Doreka ia hamauria lou neganai, edia moale mani oi laloa—⁠Petero be aposetolo ginigunana ta ia hamauria totona! (Kara 9:36-41) Dirava be Doreka ena kara namodia ia laloaboio lasi. (Heb. 6:10) Ia hahedinaraia kara namodia be Baibel ai idia torea, unai amo iena kara ita tohotohoa diba.

Aposetolo Paulo danu be haheitalai namona, ia ese ena nega ia gaukaralaia ma haida ia durua totona. Iena Keristani tadikaka Korinto dekenai ia tore henidia neganai, ia gwau: “Lau be mai moale ida umui totona gau ibounai do lau henia bona lau sibona do lau henia momokani.” (2 Kor. 12:15) Paulo ia laloparara ma haida totona iena nega ia gaukaralaia neganai, do ia moale sibona lasi, to Iehova ena lalonamo bona hanamoa do ia abia danu.—⁠Kara 20:24, 35.

Oibe, Iehova ia moale bema iseda nega bona goada ita gaukaralaia Basileia ena gaukara bona ma haida ita durua totona. To Basileia harorolaia gaukarana ita durua daladia ma haida idia noho, a? Oibe! Iseda lalokau do ita hahedinaraia dalana ma ta be iseda kontribusen amo Dirava ita hanamoa. Ita henia kontribusen idia gaukaralaia tanobada ibounai gaukarana idia durua totona, misinari bona ful-taim hesiai taudia danu. Ma danu, buka, magasin, bona vidio hahanaia gaukarana, disasta gabudia dekenai heduru idia henia, bona Kingdom matamatadia idia haginia. Ita abia dae momokani “hariharibada karana [idia] hahedinaraia” taudia be hahenamo idia abia. Danu, Iehova dekenai iseda dava bada kohudia ita henia neganai, ia moale.—Aon. 3:9; 22:9, NWT.

Tanobada Ibounai Gaukarana durua Totona Kontribusen henia Daladia

Aposetolo Paulo ena negai bamona, hari momo be edia “moni sisina idia haboua” bona kongrigeisen ena kontribusen maua ladana “Tanobada Ibounai Gaukarana” dekenai idia udaia. (1 Kor. 16:2) Bena hua ta ta ai, kongrigeisen ese unai moni be edia tano ai ia noho Iehova ena Witnes taudia edia brens ofesi dekenai idia siaia. Danu, emu tano ai Iehova ena Witnes taudia ese idia gaukaralaia ofesi ta dekenai emu moni oi siaia diba. Unai ofesi ena ladana oi diba totona, mani emu tano ena Iehova ena Witnes taudia edia brens ofesi oi tore henia. Ena adres be www.jw.org/ho dekenai oi davaria diba. Inai harihari gaudia oi siaia diba:

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona. To bema nega ta, henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ataiai ia noho adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens ofesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai diba ma haida oi abia, jw. org ai inai link ladana, “Make a Donation to Our Worldwide Work” oi sekea, eiava IBSA dekenai revareva oi siaia diba. Adres be International Bible Students Association of Papua New Guinea Inc., P.O. Box 636, Boroko, NCD 111. Telefon 3020100.