Dirava Ena Ladana Be Daika?

Ta oi ura dibaia neganai, do oi gwauraia henanadai ginigunana be, “Emu ladana be daika?” To, bema Dirava dekenai unai henanadai oi henia, dahaka do ia gwau?

“Lau be Iehova. Unai be egu ladana.”​—Isaia 42:8, NWT.

Oi dekenai unai be ladana matamatana, a? Oibe, badina Baibel idia trensleit taudia momo ese Dirava ena ladana idia gaukaralaia lasi. Nega momo ena ladana idia kokia bona dagi ladana “LOHIABADA” idia atoa. To, Dirava ena ladana be Grik gado Baibel lalonai nega 7,000 bamona ia hedinarai. Unai ladana be Heberu leta 4, YHWH amo idia abia bona Hiri Motu gado ai idia trensleit be “Iehova.”

Dirava ena ladana be Heberu revarevadia momo ai ia hedinarai bona Baibel momo lalonai idia davaria

DAHAKA DAINAI DIRAVA ENA LADANA BE MAI ANINA BADA?

Dirava dekenai iena ladana be mai anina bada. Ta ese Dirava ena ladana ia henia lasi, ia sibona ese ia abia hidi. Iehova ia gwau: “Lau egu ladana be inai, ia lao hanaihanai, gabeai ia mai nega ibounai lalonai inai bamona lauegu ladana dohore umui gwauraia.” (Esodo 3:15) Baibel lalonai, Dirava ena ladana Iehova be ia hedinarai momo, to ena dagi ladadia hegeregere, Siahu Ibounai Dirava, Tamana, Lohiabada, eiava Dirava be idia hedinarai momo lasi; Bona ladana ma haida hegeregere Aberahamo, Mose, Davida, eiava Iesu be idia hedinarai momo lasi. Danu, Iehova ia ura ena ladana do ita diba. Baibel ia gwau: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”​—Salamo 83:18.

Iesu dekenai unai ladana be mai anina bada. Inai guriguri Aiemai Tamana eiava Lohiabada Ena Guriguri ai, Iesu ese ena murinai idia raka taudia ia hamaoroa Dirava dekenai inai bamona do idia guriguri: “Aiemai Tamana e, guba dekenai oi noho, oiemu ladana do ai hahelagaia.” (Mataio 6:9) Iesu danu be Dirava dekenai ia guriguri: “Tamagu e, emu ladana oi hanamoa.” (Ioane 12:28) Iesu ena mauri lalonai Dirava ena ladana hanamoa karana be mai anina bada, unai dainai ena guriguri lalonai ia gwau: “Lau ese emu ladana be idia dekenai lau gwauraia hedinarai vadaeni, bona do lau gwauraia hedinarai.”​—Ioane 17:26.

Dirava idia diba taudia dekenai unai ladana be mai anina bada. Idaunegai Dirava ena taunimanima idia laloparara iena ladana dainai idia ia gimaia bona hamauria. “[Iehova] be kohoro goadana hegeregerena. Kara maoromaoro taudia be unuseni do idia heau vareai, bona do idia mauri noho.” (Aonega Herevadia 18:10) “Durua totona [Iehova] idia noia taudia ibounai, ese mauri do idia davaria.” (Ioela 2:32) Baibel ese ia hahedinaraia Dirava ena ladana amo ena hesiai taudia do idia dibaia. “Bese ta ta ibounai ese sibodia edia dirava, edia dirava idia tomadiho henia bona kamonai henia. To ita ese [Iehova], iseda Dirava do ita tomadiho henia, bona kamonai henia, ela bona hanaihanai.”​—Mika 4:5; Kara 15:14.

UNAI LADANA ENA ANINA

Unai ladana ese Dirava be dala idauna ai ia herevalaia. Diba bada taudia momo idia gwau inai ladana Iehova ena anina be “Ia ese Ia Halaoa.” Iehova Dirava ese ena ladana ena anina be Mose dekenai ia gwauraia herevana ese ia hahedinaraia, ia gwau: “Dahaka ai Lau Ura Sibona Lau Halaoa be Do Lau Halaoa.” (Esodo 3:14, NWT) Oibe, Dirava ena ladana ese ia hahedinaraia ia be gau ibounai ia Havaraia Tauna. Danu iena ladana amo ita diba, ia sibona bona ia havaraia gaudia ese iena ura idia hagugurua diba. Dagi ladadia ese Dirava ena dagi, eiava ena siahu ia herevalaia, to ena ladana, Iehova, ese ena kara bona ia ura karaia gauna ia hahedinaraia.

Unai ladana ese ia hahedinaraia Dirava be ita ia laloa bada. Dirava ena ladana ena anina ese ia hahedinaraia, Ia be nega ibounai ena havaraia gaudia​—ita danu ia laloa bada. Danu, Dirava ese ena ladana ia hadibaia karana amo ia hahedinaraia ia ura ia ita dibaia. Oibe, Ia diba ena ladana totona do ita henanadai dainai mai ura bada ida ita dekenai ia hadibaia. Momokani, Dirava ia ura lasi ia be kaivakuku ta eiava ita amo ia daudau tauna bamona ia ita laloa, to taunimanima korikorina ta bamona, bona ia kahirakahira ita lao diba.​—Salamo 73:28.

Dirava ena ladana ita gaukaralaia karana amo ita hahedinaraia Ia ita laloa bada. Haheitalai, reana oi ura emu turana ai do ia lao tauna ese emu ladana korikori ai oi do ia boiria. Edena bamona do oi mamia bema unai tauna ia ura lasi emu ladana ia boiria? Reana do oi laloa unai tauna be momokani ia ura egu turana ai ia lao eiava lasi. Dirava danu be unai bamona. Iehova ese taunimanima dekenai ena ladana ia hadibaia, bona ita ia hagoadaia ita gaukaralaia totona. Unai bamona ita karaia neganai, Iehova dekenai ita hahedinaraia ita ura ia kahirakahira ita lao. Iehova ese ena ladana idia “matauraia” eiava idia laloatao taudia ia laloa bada!​—Malaki 3:16.

Dirava ena ladana dibaia karana be mai anina bada bona unai be dala ginigunana ia ita dibaia totona. To unai sibona be hegeregere lasi, namona be unai Tauna ena kara bona ia be edena bamona tauna ita diba be namo.