Painia Gaukara—Oi Karaia Diba, A?

¹ Reana umui momo be inai umui laloa: “Painia gaukara lau karaia diba, a?” Unai be namo, badina ia hahedinaraia umui ura hari umui karaia noho Basileia ena sivarai namona halasia gaukarana umui habadaia. Iseda gwauhamata Iehova dekenai ena anina ta be unai, ani?​—iseda Dirava Iehova tomadiho karana dekenai gwauhamata amo sibona ita henia mai iseda kudouna, lauma, lalona, bona goada ibounai ida. (Mar. 12:30) To, ita ibounai be painia gaukara ita karaia diba lasi, bona unai ita lalo-pararalaia. Ita haida be mai iseda maduna, ruma bese naria o ma maduna badana ta, bona ma haida be nega momo idia gorere eiava idia buruka vadaeni. To iseda Havaraia Tauna Badana idia tomadiho henia taudia ma haida ese edia moale idia habadaia diba painia gaukara amo. Ai ura unai bamona taudia hagoadaia totona, idia vara diba henanadai haida ai haerelaia. Henanadai ta be inai:

Henanadai 1 “LAU KAMONAI IBOUDIAI ESE PAINIA GAUKARA IDIA KARAIA DIBA LASI. EDENA BAMONA DO LAU DIBA BEMA LAU KARAIA DIBA, EIAVA?”

² Haere abia totona, oiemu Keristani maduna bona oiemu mauri daladia oi diba guna be gau badana. Tadikaka haida be mai edia maduna idauidau dainai, Basileia gaukara lalonai hua ta ta lalonai hora 90 idia gaukara diba lasi. Ita gwau lasi unai ena anina be idia be abidadama lasi. Ruma idia naria namonamo hahine momo be Keristani adavana namodia bona sina namodia; bona nega idia tahua hanaihanai sivarai namona idia harorolaia totona. Haida be nega bada idia haorea edia dekena taudia idia haroro henidia totona. Edia gaukara amo huahua namona idia abia, bona idia ia hamoalea hahenamo ta be kongregesen dekenai kamonai matamata taudia idia abia mai. Dala ia kehoa neganai, heduru painia gaukara idia karaia; unai gaukara amo moale idia davaria. (Gal. 6:9) Hari idia hegeregere lasi regula painia gaukara karaia totona. To, herevana, painia urana kongregesen lalonai idia habadaia. Idia ese matamata taudia bona pablisa matamata idia bamoa bona idia durudia edia hahediba dalana idia hanamoa totona, bona heduru o regula painia gaukara idia karaia diba taudia idia hagoadaia.

³ To, momo idia noho, ruma bese lalonai idia be mai edia maduna badana lasi, bona idia painia diba. Namona be, sibona eda kara ita tahua loulou bona sibona ita henanadai, Sivarai namona harorolaia karana lau habadaia diba, a? Dirava ena Hereva stadilaia karana amo, ita ibounai ita diba ‘nega dokona’ lalonai ita noho. Satani ena oromana dikana ese 2 Timoteo 3:1-5 ia herevalaia gaudia amo ita ia gegea. Iehova ena taunimanima ia inai henidia tauna ese lalokau lasi, kohu ura henia tanobadana amo idia ia ura guidia toho. To lasi! Ita be inai tanobada amo ita gini siri, bona “ita ese Dirava ita abidadama henia noho, bona inai abidadama dekena amo tanobada ena kara ita halusia noho.” (1 Ioa. 5:4) Unai abidadama dainai, namona be ita karaia diba hesiai gaukara idauidau iboudiai ita tahua goada. Bema ita hegeregere heduru painia, bona, reana gabeai, regula painia gaukara ita karaia, namona be ita karaia. Unai ese henanadai ta ia havaraia:

Henanadai 2 “EDENA BAMONA DO LAU DIBA BEMA PAINIA GAUKARA LAU KARAIA, EGU MONI DO IA HEGEREGERE?”

⁴ Unai be abidadama tohoa gauna. Herevana ita be kongregesen ena pablisa ta, eiava painia gaukara ita ura karaia, Iesu ena hereva Mataio 6:30-33 ai be ita ibounai totona: “Tano ena avadia, hari idia noho, bona kerukeru lahi dekenai do idia negea, to Dirava ese unai gaudia edia hairai ia henia. Be, ia ese umui dekenai danu dabua do ia henia namonamo lasi, a? Umui abidadama maragimaragi taudia e! Unai dainai, emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ Bese idauidau taudia ese unai gau ibounai idia tahua noho. To emui Tamana guba dekenai ia noho be ia diba, umui ura gaudia ibounai be unai. To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” Dirava ese iseda daradara ia kokia, mauri gaudia do ia henia bema mai abidadama ida iena ura ita karaia noho. Bema ita hegeregere painia gaukara karaia totona, bona ita karaia matamaia, Iehova ese ita do ia naria noho. Tanobada hegegemadai lalonai, abidadama painia tauna ta be taunimanima amo aniani ia noia do oi davaria lasi!​—Sal. 37:25, 26.

⁵ Oi ia durua gauna be, idia moale painia taudia oiemu kongregesen o emu sekit lalonai oi hereva henia​—idia haida be lagani rua, toi, o ma haida, eiava lagani 20 o 30 lalodiai hesiai gaukara lalonai moale idia davaria. Unai amo painia gaukara do oi diba eiava lasi do oi diba bona emu daradara do ia hamaoromaoroa. Painia gaukara idia abia hidi bona idia moalelaia noho taudia ida oi herevahereva. Edena bamona idia karaia do idia gwauraia diba. Matamanai idia davaria hekwakwanai hanaia daladia, bona edena bamona edia haroro, hebou, bona maduna idauidau idia karaia namonamo diba idia hahedinaraia danu. Oi painia matamaia neganai, unai “painia gunadia” ese sisiba namona do idia henia noho diba. Namona be Iehova oi abidadama henia noho, ororo bamona hekwakwanai oi davaridia neganai, ia ese hanaia daladia do ia henia​—Mat. 17:20.

⁶ Nega daudau painia gaukara idia karaia vadaeni taudia ese edia abidadama dainai idia kwalimu sivarai namodia momo idia herevalaia diba. Dala be lasi bamona negadia idia kikilaia diba; to idia haheauka, bona idia hoalaia dalana ta amo hekwakwanai ia ore bona edia dava bada painia gaukarana idia rakatania lasi. Ena be nega haida idia hesiku, to edia ura dadaraia karana dainai hahenamo namodia Iehova amo idia abia. Iehova ena gwauhamata idia haheitalaia namonamo, Iehova ese “Manoka bona hesiku taudia . . . ia hagoadaia noho, bona goada lasi taudia edia goada ia habadaia noho.”​—Isa. 40:29.

⁷ Inai kohu tahua goadagoada tanobadana ese taunimanima haida ia hamanokaia momokani bona haida be taina sibona. To, namona be iseda abidadama be, unai bamona gaudia ese painia gaukara hamatamaia dalana do ia koua lasi. Kohu idia tahua goadagoada tanodia haida lalonai, iseda Keristani tadikaka momo ese painia gaukara idia karaia. Dahaka dainai painia gaukara idia karaia diba?

⁸ Mai edia lalona ibounai ida Dirava ena hesiai idia lao henia taudia iboudiai hegeregerena, idia kwalimu painia taudia ese lauma gaudia idia tahua guna. Hegeregere, ita ibounai ita diba “dina gabediai” lalonai ita mauri noho. Iehova bona iena mauri hanaihanai gwauhamatana ita lalokau henia. Ita laloa lasi inai be tomadiho ma ta sibona. Ena be kohu idauidau ita itaia diba, to kohu ura henia dikadika karana ita dadaraia. Painia gaukara idia abia hidi taudia be edia mauri gaudia abia karana idia laloa lou. Idia be kohu bada lasi maurina ai idia noho, bona idia lahedo lasi. Edia mauri dalana idia laloa namonamo murinai, dala ta idia davaria painia gaukara karaia totona.

⁹ Painia taudia be momo gabudia ai, matamata taudia be sikuli idia haorea murinai, maoromaoro painia gaukara idia karaia, nega momo tama sina ese, idia maragi negana amo, idia hagoadaia dainai. Baibel stadi idia abia taudia, idia do bapatiso lasi neganai, reana idia tahua gauna be painia gaukara. Ruma idia naria painia hahine ese gau momo idia atoa lasi edia ruma ai. Natudia be ruma idia rakatania bona idia lao sikuli neganai, painia taihu ese ruma idia hagoevaia haraga bena idia lao haroro. Ruma bese kwarana taudia haida ese pat-taim gaukara idia abia, taunimanima momo idia ura lasi gaukarana​—daba momokani idia hamatamaia gaukarana o gaukara dikana​—bena idia painia diba. Nega momo, gaukara idauna ta idia tahua dainai idia ese painia gaukara amo Iehova ena hesiai lao henia karana idia habadaia diba. Mai abidadama ida, tadikaka bona taihu haida ese painia gaukara idia tahua bona idia be hahenamo bona moale idia abia. Oi danu ese painia gaukara oi karaia diba, bena unai bamona moale do oi davaria, a? Oi sibona ese emu mauri, bona Iehova ia henia daladia, oi sikelia namonamo, bena dala ta oi abia hidi. To, ma ta ia gwau:

Henanadai 3 “LAGANI 20 LAU DO ABIA LASI BONA VAIRA HUA 6 LALONAI LAU DIBA LASI DAHAKA DO LAU KARAIA; PAINIA GAUKARA ABIA HIDI EGU MAURI IBOUNAI LALONAI KARAIA TOTONA BE IA AUKA.”

¹⁰ Matamata taudia momo be sikuli idia haorea murinai dahaka idia ura karaia be idia diba lasi. Ema bona hari, sediual ia noho bona oiemu mauri lalonai abia hidi badadia oi do karaia lasi. Unai dainai, namona be dahaka do oi karaia oi laloa namonamo, abia hidi namona oi karaia totona.

¹¹ Hari oi abia hidi gaudia be mai anina bada nega vaira ai oiemu mauri ena heau dalana dekenai. Ena be oiemu ura gaudia oi do diba namonamo lasi, to abia hidi negana lalonai namona be oiemu mauri idia hanamoa bona hamoalea gaudia oi laloa bada. Vaia, momo edia kara be maoromaoro ful-taim moni gaukara idia hamatamaia, to hua haida lalodiai heduru painia gaukara oi karaia diba, a? Bema oi ia hamoalea, reana regula painia gaukara do oi ura karaia.

¹² Hua haida, eiava lagani ta o rua lalonai unai bamona hesiai gaukara oi karaia murinai, reana do oi itaia diba goevagoeva emu mauri lalonai dahaka oi ura karaia. Ena be oiemu abia hidi be gabeai do oi headava, headava matamata taudia momo idia painia hebou bona idia ia hamoalea bada​—nega momo ta o idia ruaosi idia painia noho diba.

¹³ Herevana oi headava o oi headava lasi, painia gaukara ese oi do ia hadibaia bona oiemu mauri do ia hanamoa; sikuli ta eiava moni gaukara ese unai bamona ia karaia diba lasi. Taunimanima idauidau dekenai hereva henia, hekwakwanai hanaia, sediual karaia, bona sibona emu ura biagua namonamo karadia ese ahuna namona oiemu mauri gabena lalonai do idia havaraia. Laloaboio lasi​—bema oi tohoa lasi do oi diba lasi.

¹⁴ Ita ta ta eda mauri dalana ia idau diba. Kerukeru dahaka do ia vara ita diba lasi. Iseda mauri lalonai gau haida sibona do idia idau lasi. Unai dainai namona be oiemu mauri oi itaia namonamo bema painia gaukara oi lalohadailaia. Bema koua gaudia idia noho lasi, to oi lalo-rua sibona dainai oi karaia lasi, namona be Iehova ena ura iseda nega lalonai oi badinaia. Reana oi dekenai unai gaukara do ia namo herea.

Henanadai 4 “PAINIA GWAUHAMATA HORADIA ABIA IA AUKA, GORERE O HEKWAKWANAI BADADIA DAINAI NEGANAI, LAU KAMONAI HAIDA DEKENAI PAINIA MADUNA ESE IDIA IA HAMETAUA.”

¹⁵ Momokani, regula painia gaukara oi vareai neganai, hua ta ta ai hora 90, eiava lagani ta ta ai hora 1,000, emu hesiai gaukara totona do oi atoa. Hekwakwanai be lasi neganai, painia taudia ese unai tahua gauna idia davaria haraga. Ena anina be hora toi dina ta ta ai edia hesiai gaukara idia karaia. To, bema emu sediual oi badinaia lasi, eiava oiemu ura gaudia oi tahua guna, reana oi ia hametaua diba.

¹⁶ To, gorere dikana eiava hekwakwanai badadia ma haida ese oiemu Basileia gaukara negana ia hamaragia diba. Unai oi hanamoa totona, reana hua haida lalonai, dina ta ta ai hora 5 o 6 ia hanaia do oi haroro. Reana painia ta be hesiai lagani ena hamatamaia negana lalonai hekwakwanai ta ia vara dainai, hora 100 ia haboioa. Unai lagani ai, dahaka do ia vara, ma hekwakwanai badana ta ia vara, bona momokani iena hora 1,000 do ia abia diba lasi? Unai bona ena pat-taim gaukara ese ia do idia hametaua, bema painia namona do ia lalo-hekwarahi. Momo be painia gaukara idia karaia lasi badina unai bamona hekwakwanai, reana do idia davaria lasi gauna, idia gari henia dainai. Hanamoa dalana ia noho, a?

¹⁷ Oibe. Ai ura oi diba bema gorere dikana ta oi abia to ia ore, eiava nega sisina lalonai hekwakwanai badana ia vara bona hua haida lalonai oiemu hora oi abia lasi, elda taudia ida unai oi kikilaia. Elda taudia, mai lalokau ida, ese oiemu hekwakwanai do idia laloa guna. Murinai, bema idia diba hekwakwanai ia vara oiemu kerere dainai lasi, reana do idia gwau oi painia noho diba, bona oi haboioa hora oi laloa lasi.

¹⁸ Momokani, lagani ta ta ai hora 1,000 sibona be painia taudia edia tahua gauna korikorina dainai, anina bada lasi gaudia do idia karaia momo lasi bema unai ese edia painia gaukara horadia do ia hadikaia. Bema nega momo idia haroro lasi badina edia sediual idia badinaia namonamo lasi, o edia ura gaudia idia karaia guna, namona be hua gabena ai edia haroro gaukara idia habadaia bona idia haboioa hora idia karaia. To, bema ta be gorere badana, aksiden, ruma bese hekwakwanai badana ia davaria, namona be oi lalo-hekwarahi lasi, tadikaka ese oi do idia durua. Ai laloa inai dala ese badina maorona dainai edia hora idia abia lasi painia taudia edia lalo-hekwarahi do ai hamaragia.

¹⁹ Painia taudia momo be lagani momo lalonai, mai lalona ibounai ida, Iehova idia hesiai henia bona idia ura idia karaia noho. Ai ura idia ai durua. To bema nega daudau lalonai, ta ia davaria painia ena maduna ia karaia namonamo diba lasi, dahaka ia karaia? Aonega abia hidi namona do ia karaia, pablisa ai do ia lao bona ia hegeregere negadia ai, heduru painia gaukara ia karaia.

²⁰ To, ai ura unai hekwakwanai herevalaidia amo, painia taudia ai hagoadaia edia hesiai gaukara helagana idia karaia noho totona. Danu, ai ura inai hereva ese painia gaukara idia ura karaia taudia edia abia hidi koua gauna ia kokia.

Henanadai 5 “LAU URA EGU HEMAMI BE, LAU KARAIA GAUNA DEKENAI LAU BE GAU TA LAU KARAIA GUGURU BONA LAU KARAIA DAINAI LAU MOALE. PAINIA GAUKARA ESE UNAI BAMONA MAMINA DO IA HENIA DIBA, A?”

²¹ Dahaka ese oi do ia hamoalea diba? Iesu ena haroro hereva hereadaena lalonai moale daladia 9 ia kikilaia. (Mat. 5:​3-12) Reana oi dekenai, ia ese ia gwauraia gaudia haida edia toana be moale havaraia gaudia lasi. To, unai “moale daladia” ita laloa neganai, edia badina korikori ita itaia, a? Idia hahedinaraia hari inai nega ai ta ena mauri dalana nega idauidau ai bona gabeai idia vara gaudia dainai, eiava hebogahisi karadia sibona ese moale do ia havaraia lasi.

²² Iesu ia gwau, moale korikori be Iehova tomadiho henia karadia, bona iena gwauhamata idia guguru amo do ia vara. Iseda lalona ese ita ia hadibaia karana maorona ita karaia amo ita davaria. Momokani, iseda mauri lalonai, moale sisina ia havaraia gaudia be momo, to bema lauma gaudia ita tahua ena badina ita laloa danu, moale korikori do ita davaria. Bona Iesu ese ia hahedinaraia henia karana ena moale be bada to ita sibona ese gau idauidau ita moalelaia ena namo be unai bamona lasi. Momokani, iseda dekena taudia dekenai ita henia diba harihari gauna hereadaena be mauri hanaihanai ena helaro.​—Kara 20:35.

²³ To, reana do oi henanadai, Edena dala ai painia gaukara amo do lau mamia lau be gau ta lau hagugurua, badina lau diba pablisa haida be taunimanima dekenai hereva momokani hadibaia gaukarana ai idia kwalimu to painia haida be unai bamona lasi?

²⁴ Namona be ita ese “hagugurua” ena anina ita laloa maoromaoro guna. Hanaihanai ita gwau diba lasi idia hedinarai huahuadia be kwalimu ena toana. Taunimanima haida be vaia edia kara eiava idia karaia diba karadia dainai, idia kwalimu bona ma haida idia durua Iehova ena lohia siahuna idia abia dae totona, bona edia gaukara dainai hahenamo idia abia. To Iehova be namba ia laloa bada lasi. Ia laloa bada gauna be, mai eda lalona ibounai ida iena ladana hahedinaraia bona hanamoa totona ita karaia gauna.

²⁵ Bona nega haida huahua be maoromaoro do idia hedinarai lasi. Iseda gaukara ese haida do ia hagoadaia momokani diba, ena be ena toana be haida idia havaraia huahua bamona ita havaraia lasi. Unai lalohadai be aonega tauna ese Hadibaia Tauna 11:6 ai ia gwauraia: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.”

²⁶ Bema oiemu moale be noho hanaihanai, bona mai anina bada gaudia amo, to hari ia dika noho tanobadana amo lasi, bona oi abia dae vaitani kahirakahira Iehova ena Basileia ese Iena hesiai idia lao henia taudia dekenai mauri do ia henia bona oi be mai emu dala ma haida dekenai unai oi gwauraia hedinarai badabada totona​—vadaeni, oibe, painia gaukara be oi dekenai gau ta hagugurua ena mamina do ia henia, unai amo moale korikori do oi abia.

Henanadai 6 “DO ITA MAURI HANAIHANAI BE PAINIA GAUKARANA DAINAI LASI, UNAI DAINAI PAINIA GAUKARA LAU KARAIA EIAVA LASI BE LAU SIBONA EGU URA, ANI?”

²⁷ Momokani, painia gaukara be mauri hanaihanai abia ena kara badana ta lasi. To mai emu lalona bona mauri ibounai ida Iehova ena hesiai oi karaia be kara badana. Bona bema ta ese painia gaukara ia karaia, 2 Korinto 9:7 ena hakaua hereva be mai anina bada: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” Unai dainai bema painia gaukara do oi karaia be haida ese idia abia hidi toho, unai anina be oiemu noho bona oiemu lalona idia tahua danu, to taunimanima dekenai maoro be lasi unai idia karaia totona.

²⁸ Ta ta sibona ese, ena lalona ena ura bona iena noho hegeregerena ai, dahaka do ia karaia ia abia hidi be vaia maoro. Paulo be inai bamona ia toretore: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.”​—Gal. 6:4

²⁹ Unai dainai, do oi painia eiava lasi be oi sibona ese oi haerelaia diba. To ai ura iniseniai idia noho herevadia ese oi do idia durua bena inai mai anina bada gaukarana do oi laloa maoromaoro. Gau haida ese oi do idia hadibaia dala maorona oi abia hidi totona.

³⁰ Haheitalai ta be, bema oi be “mauri namona” oi ura henia bona oi ura kohu momo oi haboua, reana painia gaukara do oi ura lasi tohoa. Hua ta ta lalonai hora 90 oi haorea taunimanima be hadibaia taudia ai halaoa gaukarana dekenai bona hari inai nega lalonai maduna ma haida oi lalodia danu ena anina be sibona emu ura dadaraia karana do oi hahedinaraia. Ita gwau lasi unai ena anina be painia taudia be edia ura haheaukalaia karana amo idia ura Dirava idia hamoalea. Idia laloa namonamo painia taudia be edia goada idia henia kava lasi ela bona do idia hesiku. To danu, idia diba unai goada idia henia be hesiku gauna lasi.

³¹ Do oi laloa namonamo gauna ma ta be, namona be badina maorona, lauma gaudia dainai, oi ura painia gaukara do oi karaia. Lauma gaudia dainai idia karaia lasi taudia ese gabeai unai hesiai gaukara karaia urana idia haboioa. Ia be mai ena hekwarahi dainai idia hesiku haraga. Hegeregere, bema ta be painia gaukara ia karaia badina ena turana namodia ese idia karaia dainai, reana ia be badina aukana ta ia haginia lasi, unai gaukara ia karaia noho totona.

³² To danu, namo lasi painia gaukara idia karaia taudia idia laloa idia ese idia karaia lasi taudia idia hereaia. Unai bamona lalohadai ia abia tauna do ia laloa ia be mai ena lalona ibounai ida Dirava ena hesiai ia lao henia to ma haida be lasi. Unai be dika do ia havaraia lalohadaina, bona Paulo danu ia gwau: “Oi be daika, tau ta ena hesiai tauna do oi gwauraia kerere? Iena Biaguna sibona ese do ia gwauraia ia be maoro o kerere.”​—Roma 14:4.

³³ To, bema oiemu ura badana be taunimanima do oi durudia, Dirava bona ena ura idia dibaia totona, vadaeni painia gaukara oi lalohadailaia namonamo be namo. Momokani, namona be oi dekenai dala ia hegeregere emu ura haida oi dadaraia bona gau haida oi haidaua totona, unai amo do oi karaia gaudia oi hagugurua diba.

³⁴ Bema oi lalohadailaia lasi ena badina be, oi sibona emu goada bona gabeai dahaka do ia vara oi daradaralaia, ai ura Iehova ena sisiba, edia kahana idia karaia amo idia ura hahedinaraia ia idia abidadama henia taudia dekenai, do oi laloa: “Lau do umui tohoa karaia. . . . vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.”​—Mal. 3:10.

³⁵ Vadaeni, painia gaukara oi karaia diba, a? Oi ida ai moale bema inai hereva ese oi ia durua dainai oi gwau​—“Oibe, lau karaia diba!” Reana maoromaoro regula painia gaukara do oi karaia diba lasi, to mai guriguri danu heduru painia gaukara oi lalohadailaia diba, a? Bema oiemu lalona oi hadaia inai vaira hua lalodiai heduru painia gaukara oi karaia totona, elda taudia ida do oi gaukara hebou diba bona oi do idia durua. Heduru painia gaukara idia karaia taudia haida be mai moale ida do idia gwau, “Painia Gaukara​—Lau karaia diba!”