Lauma Dalanai Ita Goada Noho
Kahana 1
1 Iehova ena Witness taudia edia lagani 1991 ena tanobada ibounai ripotina ese ia hahedinaraia lagani 1991 ena Memorial heboudia dekenai idia mai taudia be 10,650,158, lagani gunana amo unai namba be 7 pesen amo ia bada daekau. Lagani gunana amo Bible stadi edia namba be 8.9 pesen amo idia bada daekau. Unai matamata taudia momo be iseda kongregesen heboudia bona hebouhebou badadia dekenai idia mai. To lauma dalanai idia goada totona, bona hari inai nega lalonai idia vara hekwakwanaidia idia hanaidia totona, bona hetoho idia haheaukalaidia totona, namona be heduru ma haida idia abia. Idia gwauhamata vadaeni Keristen taudia ese unai matamata taudia bona pablisa gaukara idia karaia to idia do manoka taudia do idia durudia totona, gau badana be lauma dalanai idia goada noho. (Roma 15:1, 2) Ena taunimanima iboudiai ia naridia namonamo totona, Iehova ese hadibaia bona diba abia dalana ia hegaegaelaia.—1 Pet. 5:8-11.
2 Vaira huadia lalodiai, Society ese ita sibona eda stadi bona ruma bese stadi ita karaia be gau badana do ia herevalaia momo. Pura ta ta iboudiai ita be hebou 5 ita abia, bona Society ese dala ia karaia sibona eda stadi lalonai unai hebou totona ita hegaegae. Namona be ita ibounai ita karaia gaudia be inai: Dina ena siri ita duahia bona ita kikilaia, Haroro School sediual hegeregerena Bible duahiduahi ita duahia, bona Kongregesen Buka Stadi bona Gima Kohorona Stadi totona ita hegaegae.
3 Keristen ruma bese iboudiai idia hagoadaia edia ruma bese stadi idia karaia hanaihanai, bona idia hagoadaia ruma bese durudia totona edia ura hegeregerena Society edia buka, magasin, o buklet idia gaukaralaia diba unai stadi idia karaia totona. Unai ese idia ia hagoadaia bona Iehova dekenai idia tabekau noho diba edia hesiai gaukara idia goadalaia noho totona, bona ena be hetoho haida idia abia to mai moale danu idia haheaukalaidia diba.—Iak. 1:2, 3; 1 Pet. 4:11.
Ita Goada Karaia Ita Goeva Noho bona Ita Kerere Lasi Totona
Kahana 2
1 Ita be dokona negana lalonai ita noho! Satana ia diba ena nega be ia kwadogi. Ia gaukara goadagoada taunimanima iboudiai be Iehova bona iena Basileia idia dadaraia totona. Lagani 1991 ena hesiai laganina lalonai, taunimanima momo herea be orea murimurinai idia atoa edia kara be ia dika dainai. Ena be kara kerere be ia bada eiava ia be maragi, to unai kara kerere lalonai ita vareai neganai, unai ese Basileia gaukarana do ia hadikaia.
2 Haida be mai edia ura dainai sibona edia stadi bona edia hebou hanaihanai karadia idia reaia. Unai bamona kara amo lauma dalanai do idia goada lasi haroro gaukara idia karaia noho totona, bona kara dikadia bona hedibagani karadia idia dadaraia totona, ani? (Luka 13:24; Ef. 6:13) Lauma dalanai, taunimanima tausen momo be Iehova ia henia heduru gaudia idia dadaraia, bona idia be hereva momokani dekena amo idia hure oho eiava idia rakatania bona tanobada ena kara idia karaia.—Heb. 2:1; 2 Pet. 2:20-22.
3 Tanobada ena kara be ia dika ia lao noho, to ia ese Iehova ena taunimanima ia hamiroa lasi totona, gau badana be edia tauanina dekenai, lalohadai dekenai, lauma dalana dekenai, bona mauri ena kara iboudiai dekenai do idia goeva noho. (2 Kor. 7:1) Hesiai gaukara idia gunalaia taudia idia diba edia kara toana ia namo be gau badana badina idia ura taunimanima ese edia kara do idia tohotohoa dainai.—1 Tim. 4:12; 1 Pet. 5:2, 3.
4 Nega momo naria taudia idia itaia kongregesen dekenai haida be idia gwau-edeede bamona, edia kara be namo momokani lasi, eiava idia be tanobada ena kara idia karaia. Kerere ia do bada lasi neganai, namona be naria tauna ese unai bamona taudia ia hamaorodia idia naria namonamo, bona idia dekenai sisiba bona aonega herevadia ia henia. (Her. 19:20; 1 Tes. 5:4) Momokani, bema haida idia kara kerere, Galatia 6:1 ena sisiba hegeregerena do idia kara henidia. Kongregesen iboudiai dekenai hekwakwanai idia vara neganai, kongregesen edia gunalaia taudia ese idia gurigurilaia bona idia gari lasi, to mai hebogahisi danu sisiba do idia henia tadikaka eiava taihu idia kerere bada garina.—Isa. 32:2.
[Questions for Part 1]
1. Satana be dahaka ia karaia sivarai namona harorolaia gaukarana ia hadikaia totona?
2. Taunimanima momo be hereva momokanina amo idia hure oho eiava idia rakatania ena badina be dahaka?
3. (a) Korinto Iharuana 7:1 dekenai dahaka sisiba ia henia? (b) Hesiai gaukara idia gunalaia taudia ese dahaka idia laloa bada be namo?
4. Edena negai idia ese sisiba bona heduru herevadia idia henia be namo?
[Questions for Part 2]
1. (a) Edena bamona ita diba tanobada ibounai dekenai iseda hebou dekenai idia mai matamata taudia be momo? (b) Dahaka dainai unai matamata taudia be heduru ma haida idia abia be gau badana? (c) Roma 15:1, 2 duahia. Gwauhamata Keristen taudia edia maduna be dahaka? (d) Petero Ginigunana 5:8-11 duahia. Iehova ia gwauhamatalaia helaro namona be dahaka?
2, 3. (a) Society dekena amo Iehova ese ita edena bamona ia durua sibona eda stadi ita karaia totona? (b) Dahaka dainai Keristen ruma bese iboudiai be edia ruma bese stadi idia karaia be gau badana? (c) Ena be nega haida reana unai heduru hereva iboudiai idia badinaia be ia auka, to Iakobo 1:2, 3 ena hereva ese ruma bese edena bamona ia hagoadaia?