Hesiai Gaukara Namona Ta
1 Gima Kohorona bona Noga! ia duahia tauna ta ia gwau idia amo ia abia diba ena namo be lagani 6 lalodiai iunivesiti sikulina dekenai ia abia diba ena namo ia hanaia momokani. Nega momo ena be nega daudau lasi lalonai unai magasin idia duahia, to mai edia ura bada taudia ese unai bamona hanamoa herevadia idia gwauraia. Iseda hahenamo ta be idia ura momokani taudia dekenai iseda magasin ita abidia lao loulou diba!
2 Ena be taunimanima momo be hereva momokani idia ura henia, to Baibel stadi idia do abia dae lasi. To reana edia ura ia bada diba bema ta ese Gima Kohorona bona Noga! matamatadia iboudiai ia abia lao loulou. Oibe, magasin idia abia loulou taudia vadivadi henia karana ese taunimanima haida ia durua, gabeai Baibel stadi idia abia dae totona.
3 Bema magasin idia abia loulou taudia listana ita karaia, namo do ita davaria bema magasin ita duahia guna bona iseda lista dekenai idia noho taudia edia ura gaudia ita tahua.
4 Oiemu magasin henia listana dekenai ladana oi torea gwauraia neganai, namona be ruma tauna be magasin ia ura momokani eiava lasi, oi laloa namonamo. Bema mai ena ura ida magasin ia abia tauna oi davaria, reana ia oi hamaoroa wiki rua murinai hereva namodia ma haida do idia mai magasin matamatadia lalonai, bona sabskripsen amo hanaihanai ia abia diba. Bema sabskripsen ia ura lasi, oi hamaoroa matamatadia do oi mailaia diba, idia ta ta edia davana be 30 toea. Namona be inai dala namona oi gaukaralaia Baibel ena hereva be ruma tauna ida oi herevalaia totona. Ai diba oi ese inai hesiai gaukara namona ta do oi moalelaia.