Ita Goeva Neganai Dirava Ena Ladana Ia Hanamoa
1 Taunimanima idia goeva noho totona, Mose ena Taravatu ese kara idauidau ia gwauraia idia badinaia totona. Israel besena be idau badina taravatu ese ia haganidia lauma dalana ai bona tauanina dalana ai idia goeva totona. (Lev. 11:35, 36; 15:1-11; Isa. 52:11) Idia goeva neganai unai ese Dirava ena ladana ia hanamoa bona bese taudia be gorere momo idia davaria lasi.
2 Hari inai negai danu, edia goeva karana dainai taunimanima idia diba idia be Iehova ena orea taudia. Ena be unai goeva karana be Iehova ena orea toana, to orea taudia ta ta sibona sibona dekenai unai be ia momokani eiava? Bema iseda kohu ita atoa namonamo bona iseda tauanina ia goeva karadia ita laloa bada, unai ese ia hahedinaraia Iehova ena taravatu badinaia karana ita laloa bada.
3 Iseda ruma toana be edena bamona? Ita harorolaia Basileia sivaraina ia hadikaia, a? Ita haroro neganai ita gwau tanobada be paradaiso gabuna ai do ita halaoa, to bema iseda ruma toana be ia dika bona rei ita utua lasi eiava ava dikadia ita kokia lasi, reana taunimanima do idia gwau ita koikoi, ani? Bema iseda ruma ena kohu ita atodia namonamo lasi eiava iseda kara idia goeva lasi dainai bonana dikadia idia noho, ita gwau diba lasi ‘gabeai goeva kara do ita karadia Dirava ena Basileia henunai Nega Matamatana lalonai,” ani?—om-MO rau 130-2.
4 Haroro gaukara totona ita gaukaralaia motuka ena toana be edena bamona? Ena lalona bona ena murina kahana idia goeva be namo, unai neganai taunimanima ese iseda haroro gaukara ena toana do idia gwauraia dika diba lasi, ani? Iseda dabua, iseda buka udaia baege, bona iseda toana be edena bamona? Gau ibounai idia goeva dainai taunimanima be idia badu diba lasi, a? Ita sibona eda tauanina bona iseda dabua idia goeva noho totona, namona be dina ta ta iboudiai ita digu bona iseda dabua ita huridia.—w89-MO 12/1 rau 16-22.
5 Bema tadikaka ta be ia digu momo lasi bona ena ruma toana be ia dika dainai taunimanima ese kongregesen idia gwauraia dika, dahaka ita karaia? Reana ia buruka eiava ia gorere dainai unai bamona ia noho, unai dainai mai lalokau danu ita durua be namo. Bema ita durua unai be hebogahisi karana. Reana ma tau ta be ia hegeregerena ia noho, to ia diba lasi unai be hekwakwanai gauna; hebogahisi karana amo sisiba idia henia neganai reana ena kara do ia hamaoromaoroa. Idia goeva lasi taudia be idia hegeregere lasi kongregesen dekenai dagi gaukara idia abia totona. Momokani, namo lasi elda taudia ese ma haida idia doridia sibodia edia taravatu unai kara dekenai idia badinaia totona.
6 Kamonai matamata taudia ita boiridia mai iseda Kingdom Hall dekenai lauma dalana ai aniani idia abia totona. Oibe, iseda Kingdom Hall momo edia toana idia namo bona gau ibounai idia atoa namonamo dainai mai moale danu ita ura taunimanima ita boiridia mai. To, ena toana ia namo noho totona, ita hekwarahi be gau badana. Namona be oiemu Kingdom Hall oi itaia. Helai gaudia, foloa, bona haba idia goeva, a? Mei rumadia idia hagoevaia hanaihanai, a? Bema hanaihanai foloa ia miro eiava haba ena peni ia kokia ita itaia, reana ita manadalaia bona gabeai ita laloa unai be ia dika lasi. To, vadivadi taudia be nega ginigunana idia vareai bona idia itaia neganai reana idia moale lasi. Namona be ita goada karaia iseda Kingdom Hall toana ia namo noho totona, bema nega idia gwauraia unai gabu hagoevaia eiava hanamoa totona, namona be ita heduru. Ena be Kingdom Hall haida be uda gaudia amo idia karadia, to edia toana idia namo diba, bona idia hagoevaia bona gau ibounai idia atoa namonamo diba.
7 Ena be ita hereva lasi, to iseda tauanina idia goeva, iseda ruma, motuka, bona Kingdom Hall idia goeva neganai, unai ese Dirava ena ladana ia hanamoa. Iseda kara toana ia namo dainai haida do ita hahekwakwanaidia lasi, to ia hahedinaraia iseda tomadiho be ia goeva bona ia maoromaoro.—1 Kor. 10:31, 32; Iak. 1:27.
[Questions]
1. (a) Israel besena ia idau ena badina be dahaka? (b) Unai kara ese daika ena ladana ia hanamoa?
2. Edena bamona ita hahedinaraia diba Iehova ena taravatu badinaia karana ita laloa bada?
3. Iseda ruma toana ia dika neganai, edena bamona unai ese iseda haroro gaukara ia hadikaia diba?
4. Dahaka kara ma haida do ita laloa namonamo be gau badana?
5. (a) Bema ta ia digu momo lasi eiava ena ruma bona tano ia naria namonamo lasi, dahaka ita karaia? (b) Elda taudia ese dahaka do idia karaia lasi be namo?
6. (a) Dahaka dainai iseda Kingdom Hall toana ia namo be gau badana? (b) Ia goeva noho bona gau ibounai atoa namonamo totona, dahaka ita karaia?
This article is repeated in km 8/98 and 7/02.