Tiokratik Gaukara Goadalaia Noho
1 Lagani lalonai nega ta ta ai dala ia kehoa kara idauidau ita karaia totona. Ita momo ita ura unai nega ita gaukaralaia kara idauna ta do ita karaia totona eiava ita laga-ani totona. To, ita naria namonamo, namo lasi iseda tiokratik gaukara ita reaia.—Fil. 3:16.
2 December bona January lalonai do ita abia distrik hebouheboudia be mai moale danu ita naria noho. Oi hegaegae vadaeni ta do oi lao henia totona, a? Namona be oi hegaegae haraga, lao dalana bona noho rumana do oi davaria totona. Oiemu kongregesen lalonai ta oi durua diba hebouhebou dekenai ia lao totona, a? Unai bamona hebogahisi karana amo oi bona ia danu be hahenamo bada umui davaria diba.
3 Bema oi be mai emu nega, hegeregere sikuli holide negana, oi laloa emu haroro gaukara do oi habadaia diba, a? Momo herea ese idia davaria unai be nega namona edia ladana idia henia heduru pioneer gaukara do idia karaia totona. Nega momo unai ese dala ia kehoa hesiai gaukara ma ta do idia karaia totona. Ruma bese ibounai be dina ta ta iboudiai haroro gaukara do idia moalelaia hebou diba. Ena be unai oi karaia diba eiava lasi, to namona be emu nega haroro gaukara dekenai oi habadaia toho, ani? Bema ita hegaegae namonamo, ita momo be adorahi kahanai haroro gaukara ita karaia diba bona unai amo hahenamo do ita davaria diba.
4 Bema kongregesen ta be ia hegeregere lasi ena teritori haida dekenai idia haroro totona, reana oi ese oi durudia diba, ani? Reana holide neganai oiemu hanua dekenai oi haroro diba, eiava bema kongregesen eiava grup maragina unuseniai idia gaukara, idia danu oi haroro diba. Reana oiemu kongregesen lalonai ma haida idia ura oi idia bamoa bona idia haroro momo lasi gabuna ta dekenai, pura tamona eiava rua do umui lao haroro totona. Bema oiemu grup be ia maragi, reana kahirakahira ia noho kongregesen ena pablisa taudia idia ura oi danu idia lao. Bema gabu daudau dekenai oi lao diba lasi, sedira sekit naria tauna ese oi ia hadibaia diba edena kongregesen, kahirakahira ia noho gauna unai, ia ura heduru ia abia.
5 Holide totona oi hegaegae ma gabu ta dekenai do oi lao totona, a? Bema oibe, oi hegaegae unai gabu dekenai hebou dekenai do oi lao totona, a? Unai tadikaka danu umui lao haroro be namo, ani? Holide neganai bema unai bamona oi karaia oi bona ma haida be hahenamo umui davaria diba. (Roma 1:11, 12) Danu, emu laolao lalonai oi davaria taudia oi haroro henidia diba, ani? Namona be emu Baibel bona hariharilaia buka bona magasin oi abidia lao danu. Oi laga-ani neganai, unai nega haida oi gaukaralaia duahiduahi bona sibona emu Baibel stadi oi karaia totona. Laloaboio lasi, ena be nega haida moni gaukara amo holide ita abia be ia namo, to ita ura lasi Iehova hesiai henia gaukara amo holide ita abia.
6 Namona be elda taudia idia gima noho kongregesen ena gaukara do idia haheaua namonamo totona. Bema elda taudia eiava hesiai taudia be do idia lao holide totona, namona be idia hegaegae ma ta be edia maduna do ia huaia totona. Bema kongregesen naria tauna idia hadibaia haraga edena dina do idia noho lasi, unai ese ia durua bena ia hegaegae namonamo diba, ma ta ese unai gaukara ia naria totona.
7 Oibe, tiokratik gaukara dainai do oi bisi bada herea diba. To kara idauna ta oi karaia neganai unai ese oiemu Basileia gaukara do ia hakererea diba. Nega ibounai haroro gaukara karaia totona oi laloa. Lauma dalanai dahaka be gau badana oi laloa namonamo, bona oi badinaia noho.—Fil. 1:10.
[Questions]
1. Dahaka kara ita reaia garina do ita naria namonamo?
2. Lagani ta ta iboudiai distrik hebouheboudia ita naria dainai dahaka ita karaia diba hegaegae totona?
3. Iseda nega haroro gaukara dekenai be edena bamona ita habadaia diba?
4. Iseda tadikaka durudia totona ma dahaka do ita karaia diba?
5. Holide abia totona ita hegaegae neganai, dahaka ita laloa danu be namo?
6. Bema elda taudia eiava hesiai taudia be holide dainai kongregesen do idia rakatania, dahaka do idia karaia guna be namo?