Magasin Gaukaralaidia Hereva Momokani Harorolaia Totona
1 Hari inai negai, sivarai maorona bona momokanina ena namo ia hadikaia gaudia be advertising momo, politikol gwauhamata koikoidia, bona intenesenel koikoi herevadia. Gima Kohorona bona Noga! magasin idia idau, badina idia sibodia ese hereva momokani Dirava ena Basileia dekenai idia gwauraia hedinarai, bona ita ibounai idia hadibaia dahaka do ita karaia Basileia do ia havaraia hahenamo do ita moalelaia ela bona hanaihanai totona.
2 Tanobada ta dekenai sivarai ia naria gavamani dipatmen tauna ta be unai magasin rua edia namo ia diba, bona mai moale danu ia heduru, tadikaka be gwaumaoro do idia abia idia hariharilaidia totona. Ia gwau: “Lau laloa Gima Kohorona be magasin hereadaena ta; mai moale danu umui lau ura durua.” Unai magasin lalodiai mauri havaraia aonega herevadia idia noho, bona taunimanima durudia totona iseda maduna be unai magasin ita hariharilaidia. (Ioane 17:3) May lalonai, unai mai anina bada magasin be edena bamona do oi hariharilaidia? Reana henunai idia noho herevadia ese oi do idia durua.
3 Bema May 15 “Gima Kohorona” magasin amo sivarai ginigunadia oi ura gwauraia hedinarai, reana inai bamona do oi hereva diba:
◼ “Taunimanima ai hereva henia bona buka iboudiai amo taunimanima idia hoia momo bukana ai herevalaia. Unai buka oi diba, a? [Naria do ia haere totona.] Baibel ai herevalaia unai. Taunimanima momo be Baibel idia abia be mai ena badina. Ena badina be 2 Timoteo 3:16 dekenai ia gwauraia.” Unai siri oi duahia murinai, magasin ena sivarai ta lalonai hereva badadia oi gwauraia hedinarai.
4 Eiava hamatamaia hereva oi gwauraia murinai, reana inai bamona do oi hereva diba:
◼ “Reana oi diba vadaeni idia ore lagani haida lalonai, tanobada hegegemadai, natudia idia davaria hekwakwanai be idia momo idia lao. Oiemu hanua lalonai natudia ese idia davaria hekwakwanai dainai reana oi lalohisihisi; unai kara haida be dahaka?” Naria do ia haere totona. Tanobada hegegemadai, natudia ese idia davaria hekwakwanai badadia edia sivarai haida be Noga! magasin amo oi hahedinaraia, bona Dirava ena Basileia ese unai hekwakwanai do ia kokia dalana oi hadibaia.
5 Oiemu lou-henia pepana dekenai, reana guna idia kamonai sisina to kara ta idia karaia lasi taudia edia ladana be lisi dekenai oi toredia. Idia kamonai sisina sibona dainai, reana oi laloa idia oi lou henidia loulou be anina lasi. To reana unai lisi oi gaukaralaia diba magasin dala do oi hamatamaia totona. Magasin lalonai sivarai oi itaia neganai, namona be oi laloa unai lisi dekenai daika ese unai sivarai do ia ura henia, bena ia dekenai oi lao bona unai magasin oi henia toho.
6 Nega Idauidau Bona Gabu Idauidau Haroro Gaukarana: Unai be dala namona taunimanima edia lalona oi veria magasin do idia lalodia totona. Matana veria laulaudia bema oi hahedinaraia sisina neganai, unai ese dala ia kehoa bena reana taunimanima danu oi kiki hamatamaia diba. Taihu ta be ena gaukara patana latanai magasin haida ia atodia, ia danu idia gaukara hebou taudia idia raka hanai neganai idia itadia totona; unai dala amo magasin haida ia hariharilaidia. Namona be hanaihanai oi dekenai magasin haida idia noho, bona hari hua lalonai sitoa dekenai, sikuli dekenai, basi oi guia neganai, eiava ma gabu ta dekenai taunimanima oi davaria neganai, magasin oi hariharilaidia toho.
7 Gima Kohorona bona Noga! magasin edia heduru dainai, mai anina bada henanadai Iehova bona iena tomadiho dekenai edia haere ita diba. Dala idauidau amo unai magasin ita gaukaralaidia, badina ita ura dala iboudiai amo haida ita durudia bena “Iehova, hereva momokani Diravana” do idia dibaia.—Sal. 31:5.