Baibel Stadi Taudia Hegaegaelaidia Do Idia Haroro Totona
1 Baibel stadi ita karaia ena badina be ita ura hahediba taudia matamatadia ai do ita halaodia, ma haida hadibaia gaukarana lalonai ita do idia durua totona. (Mat. 28:19, 20) Unai dainai stadi ita karaia ena badina be diba do ita henidia, to unai mo sibona lasi; namona be stadi amo ita hadibadia mai lalona ibounai ida idia abidadama bona ita hegaegaelaidia edia helaro ma taunimanima haida dekenai do idia harorolaia totona. (2 Kor. 4:13) Edia diba ia hegeregere ma haida do idia hadibaia totona, idia badinaia diba heduru daladia be dahaka?—2 Tim. 2:2.
2 Haroro Gaukara be Tahua Gauna ta ai Oi Halaoa: Stadi hamatamaia negana amo, namona be oi hahedinaraia goevagoeva tomadiho momokanina ena kara ta be “iseda uduna dekenai ita gwauraia hedinarai, be mauri do ita davaria.” (Roma 10:10) Iseda ladana, Iehova ena Witness taudia, ena anina be taunimanima ita haroro henidia. Namona be ita durudia bena do idia lalo-parara, diba idia abia ena badina be idia mo sibona lasi idia mauri totona. Idia be hahediba taudia ai do idia lao neganai, idia hadibaia taudia danu be hahemauri do idia davaria diba.—1 Tim. 4:16.
3 Idia Diba Vadaeni Gaudia Riviulaia: Nega ta ta ai, idia diba vadaeni gaudia ita riviulaia be hadibaia dala namona. Unai ese stadi tauna ia durua lauma dalanai ia tubu totona, badina ia kamonai hamatamaia hereva momokanidia be ena darana bona lalona dekenai idia diho. Ita danu be unai bamona ita davaria Gima Kohorona Stadi lalonai riviu henanadai ita haerelaidia neganai. Auka lasi henanadai namodia oi hegaegaelaia, stadi tauna be sibona ena hereva amo do ia haerelaidia diba totona.
4 Riviu karaia totona umui lao haroro bamona. Henanadai oi henia eiava taunimanima haida haroro henidia neganai ia vara momo gauna ta oi gwauraia. Oi be ruma tauna bamona oi karaia, henanadai oi henia bona stadi tauna be do ia haerelaia toho. Ia haere neganai ena hereva namodia dainai oi hanamoa, bona ia badinaia diba heduru herevadia oi henia, gabeai haere henia dalana do ia hanamoa totona. Unai dala amo oi hadibaia neganai, ia diba vadaeni sivaraidia herevalaia dalana do ia diba bona Baibel gaukaralaia namonamo dalana do ia manadalaia.
5 Buka Helaga Herevalaia Bukana: Namona be stadi tauna be sibona ena Buka Helaga Herevalaia bukana do ia abia, bona oi durua gaukaralaia dalana ia diba namonamo totona. Oi hadibaia unai buka lalonai heduru hereva idia noho taunimanima ida hereva ita hamatamaia totona, henanadai be Baibel amo haere ita henia totona, eiava ura lasi herevadia ita hanaidia totona. Stadi lalonai unai buka oi gaukaralaia, bona mai goada danu taunimanima do ita hereva henia diba daladia oi hahedinaraia. Unai buka ese ena gari do ia hamaragia, bona Basileia ena sivarai do ia harorolaia urana do ia habadaia.
6 Hebou be Gau Badana Oi Hahedinaraia Goevagoeva: Kongregesen heboudia, hegeregere Hesiai Hebou bona Haroro School, idia hegaegaelaia haroro gaukara dekenai ita idia durua totona. Haroro gaukara do ita karaia namonamo totona idia manada vadaeni bona mai edia diba taudia ese unai gaukara karaia daladia idia riviulaia bona haheitalai idia karaia. Oi hahedinaraia hebou be gau badana, bona oi durua hebou dekenai ia lao totona. Bema hanaihanai ia mai hebou dekenai unai ese ia do ia hagoadaia Iesu ena hahediba tauna momokanina ta ai do ia lao totona.
7 Oi sibona emu kara toana danu be gau badana. Bema mai emu ura danu haroro gaukara oi karaia hanaihanai, unai ese ia hahedinaraia hereva momokani oi laloa bada. Oiemu kara ese oi stadi henia tauna ia hagoadaia kara ma haida ia karaia ena abidadama ia hahedinaraia totona. (Luka 6:40) Unai kara ibounai ese kamonai matamata tauna ia durua, bena ia diba haroro gaukara be maduna namona bona unai gaukara ia durua dainai do ia moale.—1 Tim. 1:12.
[Questions]
1. Baibel stadi ita karaia ena badina badana be dahaka?
2. Namona be Baibel stadi tauna ita durua dahaka do ia lalo-pararalaia totona?
3. (a) Umui stadilaia vadaeni herevadia be nega ta ta ai umui riviulaia ena namo be dahaka? (b) Riviu lalonai edena bamona henanadai do ita henia?
4. Edena dala ma ta amo riviu do oi karaia diba?
5. Buka Helaga Herevalaia bukana be edena daladia amo emu Baibel stadi tauna ia durua bada diba?
6. Dahaka dainai Baibel stadi tauna ita hagoadaia hebou do ia laloa bada bona hebou dekenai ia mai totona?
7. Oiemu kara toana be edena bamona emu Baibel stadi tauna ia durua diba?