Memero Kekeni be Haheitalai Namona Idia Itaia be Gau Badana
1 Ita moale badina ‘Iehova ena ladana idia hanamoa’ memero kekeni be idia momo idia lao dainai. (Sal. 148:12, 13) Idia momo edia lagani be idia do bada lasi. Idia goada idia lao badina edia tamana bona sinana bona kongregesen ena buruka taudia edia haheitalai be namo dainai. To, ita laloaboio lasi, ma haida, hegeregere memero kekeni badadia bona tau bona hahine matamatadia, edia haheitalai be namo dainai danu. Bema oi be unai bamona lagani tauna, inai hereva ese oi ia durua diba.
2 Memero kekeni be lagani 13 idia do davaria lasi neganai, idia ura memero kekeni badadia edia kara idia tohotohoa. Idia bamoa taudia bona idia ura henia taudia edia kara idia ura tohotohoa. Idia be memero kekeni badadia idia lalodia bada badina memero kekeni badadia edia toadia be mai edia aonega bona edia diba be bada. Unai dainai, oiemu hereva bona oiemu kara bona lauma gaudia oi laloa bada karana, bona kongregesen gaukara oi durua karadia do idia tohotohoa.
3 Oi be mero o kekeni badana ta dainai, oi be mai emu gaukara bona maduna badana. Hari, oiemu kara be mai ena siahu oi idia bamoa memero kekeni maragidia dekenai. Sibona dekenai oi henanadai, ‘Memero kekeni maragidia dekenai lauegu kara toana be edena bamona? Gau ibounai lau laloa namonamo, bona “uhau edia lebulebu” ena kavakava bona kerere karadia lau dadaraidia, a? Egu tamana bona sinana, elda taudia, bona lagani bada taudia ma haida lau kamonai henidia bona lau matauraidia, a?’ (2 Tim. 2:22; Kol. 3:20) Memero kekeni maragidia ese oiemu hereva idia kamonai bona oiemu kara idia itaia, bona lauma dalanai idia goada totona oiemu kara be mai ena siahu.
4 Kongregesen ena gaukara badana be Basileia ena sivarai idia harorolaia. Bema mai emu ura danu nega ibounai oi lao haroro totona, unai ese oi idia bamoa memero kekeni maragidia ia hagoadadia edia haroro gaukara do idia habadaia totona. Bema pioneer gaukara lalonai oi vareai, oi idia bamoa memero kekeni ia hagoadadia unai bamona do idia karaia totona danu. Hebou dekenai haere oi henia neganai, bona Kingdom Hall ena gaukara oi durua, unai danu be haheitalai namona.
5 Ena be Timoteo be tauhau laganidia ia hanaia vadaeni negana ai Paulo ese inai sisiba ia henia, to umui memero kekeni ese inai hereva umui badinaia diba, ia gwau: “Abidadama taudia edia toana namona bamona do oi lao. Vadaeni oiemu hereva namona, kara namona, lalokau, abidadama bona laloa goevagoeva idia itaia neganai, oiemu kara bamona do idia karaia.” (1 Tim. 4:12) Iehova ena hesiai gaukara be mai goada bona emu lalona ibounai ida oi karaia neganai, oi idia bamoa memero kekeni badadia bona maragidia ese oiemu kara idia itaia neganai ia hagoadadia, ia durudia lauma dalanai tau badadia ai do idia lao totona. (Ef. 4:13) Bema lagani 13 idia abia vadaeni memero kekeni edia ruma bese be hari sibona idia stadi henidia, unai memero kekeni ese oiemu kara namona idia itaia neganai, reana ia durudia hereva momokani lalonai idia vareai totona.
6 Mai anina bada gauna be inai: mai emu goada danu Dirava ena kara toana oi hahedinaraia namonamo neganai, unai ena anina be Iehova bona iena orea ia hanamoa. (Her. 27:11) Oi idia raraia kudou-namo taudia do idia hoa badina oiemu kara bona tanobada memero kekeni edia kara be idau herea dainai. Unai dainai, Iehova hanamoa gaukara badana oi karaia neganai, oi be mai emu dala memero kekeni ma haida oi durudia totona.—Sal. 71:17.
[Questions]
1. Daidia edia haheitalai namona ese Witness memero kekeni idia durua diba?
2. Lagani 13 idia do abia lasi memero kekeni be reana daidia edia kara idia tohotohoa?
3. Memero kekeni badadia edia gaukara bona maduna badana be dahaka?
4. Memero kekeni ma haida hagoadadia totona, dahaka oi karaia diba?
5. Bema mai emu goada bona mai emu lalona ibounai danu hesiai gaukara oi karaia, unai ese kongregesen ena memero kekeni ma haida be edena bamona ia durudia diba?
6. Mai emu goada danu Dirava ena kara toana oi hahedinaraia namonamo ese dahaka namo ia havaradia? Daidia ia durudia diba danu?