Peroveta Herevadia Laloa Bada

¹ “Ai daradara lasi momokani, to ai diba peroveta taudia edia hereva be momokani.” (2 Pet. 1:19) Dahaka dainai Petero be unai bamona ia hereva? Petero bona hahediba taudia rua ese lagani 32 gunanai Iesu ena toana ia idau idia itaia bona hereva idia kamonai neganai, Heberu Revarevadia lalonai Basileia idia perovetalaia herevadia bona Iesu Keriso sibona ese ia perovetalaia gaudia be idia “momokani.” Unai mata hanai ese idia ia hadibaia momokani, Iesu be mai ena hairai ida Basileia ena siahu do ia abia bona Tamana ena gwaumaoro ia abia. Keristani ginigunadia ese unai “peroveta herevadia idia abia dae momokani, lamepa bamona,” edia kudouna ia dibura lasi totona. Unai diari, peroveta herevadia idia lalodia bada dainai ia durudia idia noga bona nega matamata idia naria noho. Unai nega ai “daba ena hisiu,” Keriso unai, be Basileia do ia lohiaia.​—2 Pet. 1:​16-19; Mat. 17:​1-9.

² Iesu ena toana ia idau neganai, ita be Petero ida ita noho lasi unai ita itaia totona. To, inai nega lalonai idia noho Keristani taudia be peroveta herevadia idia lalodia bada dainai, idia ese Keriso ena Basileia ena toana idia itaia lasi, to ena Pavapava be ia lohia vadaeni ena toana idauidau idia itaia noho! Lagani 1914 amo ema bona hari, idia hanaia lagani ta ta ai, peroveta herevadia idia momokani badina Iesu ese ia gwauraia ena “giroa mai” idia hahedinaraia “toa” gaudia idia vara ita itaia. Unai toa ena kahana badana ta be Dirava ena gavamani, o Basileia, be bese ibounai dekenai do idia harorolaia, ena Pavapava ese inai tanobada ia do haorea lasi neganai. Iesu ena hakaua henunai, tano 232 lalonai Basileia haroro gaukara idia karaia, guna idia karaia bamona lasi. (Mat. 24:​3-14) Unai sibona lasi, to “hisihisi badana” negana ia mai kahirakahira noho lalonai, ia lohia vadaeni Pavapava ese “taunimanima momo herea” be “bese idauidau” amo ia gogodia; idia be “Mamoe ena Natuna ena rarana” idia abidadama henia taudia.​—Apok. 7:​9, 10, 14.

³ “Daba ena hisiu” be ia daekau vadaeni, anina be Keriso be Basileia ena siahu ia abia vadaeni dainai, peroveta herevadia do ita lalodia bada noho be mai anina, a? Oibe! Mai ena hairai bada Iesu Keriso ese aposetolo Ioane dekenai Apokalupo bukana lalonai idia noho mata hanai ia henia. Unai mata hanai ese Keristani ginigunadia ia hagoadaia bona ia hadibadia, to ita, “Lohiabada ena Dina” lalonai ita noho taudia, dekenai idia be mai anina bada. (Apok. 1:10) Unai dainai, Iehova ena taunimanima edia kongregesen buka stadi lalonai, Apokalupo Ena Hagugurua Negana Ia Kahirakahira! bukana idia stadilaia noho.

⁴ “Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale. Badina inai gaudia ibounai do idia vara ena nega be ia kahirakahira vadaeni.” (Apok. 1:3) Bema ita ura ita moale, unai peroveta herevadia edia anina ita diba be namo, oibe, ita lalo-pararalaidia be namo. Dahaka do ita karaia? Gwauraia lou lou karana amo Apokalupo ena hereva be iseda lalona dekenai do ita laloatao diba. Aposetolo Petero, Keristani ginigunadia edia nega lalonai hakaua oreana ena memba ta, be unai gwauraia lou lou karana ia abia dae dainai hereva momokani ia gwauraidia lou, lauma dalanai tadikaka ia ‘hagoadaia’ totona. (2 Pet. 1:​12, 13) Iseda nega lalonai “hesiai tauna mai ena kamonai, bona mai ena kara maoromaoro” ese peroveta herevadia idia gwauraia lou lou, unai amo ita idia durua lauma gaudia ita ura henia noho totona.​—Mat. 24:​45-47.

⁵ Laloa Bada Dalana: Apokalupo bukana ena hereva be edena bamona dala amo do ita laloa bada? Aposetolo Paulo ia gwau Dirava be aneru eiava peroveta taudia amo Keristani taudia ia hereva henidia lasi, iena hesiai taudia gunadia ia kara henidia bamona. To, Iehova be iena lalokau Natuna, “gau ibounai be ia ese ia biagua” tauna amo ita ia hereva henia. (Heb. 1:​1, 2) “Dirava ena Natuna ena ladana ia bada momokani dainai, unai hereva momokani, ita kamonai vadaeni gauna, do ita dogoatao bona badinaia be namo. Namo lasi ita manokalaia, do ita boio garina.” (Heb. 2:1) Oibe, Dirava ena Hereva ita hakala henia be namo bona gau badana be Iesu Keriso ese ia perovetalaia herevadia ita laloa bada. Edena bamona Apokalupo bukana stadilaia karana ita laloa bada?

⁶ Gau ginigunana be, wiki ibounai Kongregesen Buka Stadi dekenai ita lao. Ita ibounai be hari inai nega lalonai idia vara gaudia ita raraia noho be namo; idia be Apokalupo ena peroveta herevadia idia hagugurua noho. Bena ita hegaegae diba Iehova ena ura hegeregerena ai ita kara totona. Namona be oiemu ura be Apokalupo bukana ita stadilaia noho lalonai, buka stadi ta do oi reaia lasi.

⁷ Gau iharuana be, stadi gauna oi hegaegaelaia namonamo. Idia torea siridia oi kehoa bona oi itaia edena dala ai ita stadilaia Apokalupo siridia edia anina idia habadaia. Unai dala amo oi ese henanadai edia haere sibona do oi abia lasi to edia badina danu. Oi hekwarahi diba sibona abia totona lasi to aonega bona lalo-parara danu. (Aon. 4:7) Gau ihatoina be, stadi lalonai oi haere bona siri oi duahia. Namona be emu lalona oi hadaia nega tamona do oi haere eiava nega momo stadi ta ta negadiai. Unai oi karaia neganai emu lalonai be umui stadilaia gaudia do oi laloa.

⁸ Peroveta herevadia ita lalodia bada totona, ita hegaegae, stadi ita lao, bona ita haere be hegeregere lasi. Anina be stadi murinai, ‘iseda diba bona aonega do ita gaukaralaia, mai iseda lalona’ ida ita stadilaia gaudia do ita laloa lou lou. (1 Tim. 4:15) Bema peroveta hereva be iseda kudouna lalonai lamepa bamona do ia diari, namona be idia be iseda lalohadai, ura, hemami, kara, bona hagugurua gaudia lalonai ita badinaia be namo. (2 Pet. 1:19) Unai dainai, ita sibona dekenai inai bamona ita henanadai be namo: Inai hereva ena anina be dahaka lau dekenai? Iehova bona ena Natuna, Iesu Keriso dekenai dahaka lau dibaia? Lau stadilaia gaudia ese dahaka taravatu ia hahedinaraia? Stadi gaudia lau lalo-pararalaia a? Egu mauri lalonai unai hereva momokanidia be edena bamona lau badinaia diba, a? Egu ruma bese lalonai? Kongregesen lalonai? Ita dibaia gaudia ita badinaia neganai, salamo torea tauna bamona ita hereva diba: “Oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.”​—Sal. 119:105; Iobu 29:​3, 4.

⁹ Dika Negana ai Ita Noga: Apokalupo ena mata hanai lalodiai, Iesu ese inai nega lalonai idia noho Keristani taudia be Lohiabada ena Dina lalonai do idia vara gaudia momo ia hadibadia. Hanaia lagani 80 lalodiai, unai gaudia haida idia vara vadaeni: Basileia ia vara; tuari guba dekenai bona Satani bona ena demoni idia lusi bena tanobada dekenai idia negedia diho; Babulonia Badana ia moru; bona tanobada ena siahu besena namba 8, dagedage gauna kakakakana unai, ia hedinarai. Apokalupo lalonai peroveta herevadia idia guguru vadaeni dainai ita diba kahirakahira idia do guguru lasi gaudia do idia vara: 144,000 ena orena taudia dekenai maka idia atoa, hutuma bada gogoa gaukara ia ore, Babulonia idia hadikaia ore, Aramagedono ia mai, guri dekenai Satani idia tahoa dobi, bona Keriso ena Lagani 1,000 Lohia neganai do ia matamaia. Iesu ena hadibaia hereva ita laloa bada be namo, ia gwau: “Kamonai! Lau be henaoa tauna bamona umui dekenai do lau mai. Ia noga noho, bona iena dabua ia atoa hegaegae noho tauna be namo. Ia namo lasi, mai kopina kavakava do ia loaloa, badina be unai bamona iena hemarai do ia hedinaraia garina”!​—Apok. 16:15

¹⁰ Ita noga noho a? Peroveta herevadia ita lalodia bada, a? Herevana, iseda mauri be Iehova dekenai ita gwauhamatalaia lagani 5 eiava 50 idia hanaia vadaeni, to Paulo ena hereva Roma Keristani taudia dekenai be mai anina bada danu ita dekenai: “Ita diba iseda nega be kwadogi. Mahuta dekena amo do ita toreisi negana be ia ginidae vadaeni. Badina be Lohiabada ena mai dinana be kahirakahira. Badina be ita abidadama henia hamatamaia nega dekenai iseda hamauria be do ia daudau, to harihari iseda hamauria be ia kahirakahira vadaeni. Hanuaboi ia ore vadaeni, daba ia kahirakahira vadaeni.” Paulo ese Keristani taudia ia hamaorodia ‘dibura ena kara do idia negea’ bona ‘do idia naria namonamo.’ (Roma 13:​11-13) Ita noho tanobadana ena kara be dibura masemase. Hanaia lagani 30 o 40 gunanai idia hemarailaia kara dikadia be inai nega lalonai tanobada taudia ese idia abia dae. Umui naria namonamo, inai tanobadana ena dibura lalonai umui vareai lao bona umui kara dika garina. Bema tanobada ena lalohadai eiava kara dikadia oi karaia bona oi laloa idia be gau ta lasi neganai, oi ese hari ia noho hepapahuahu, kahirakahira do idia hamaoromaoroa vaitani gauna, oi reaia diba. Unai hepapahuahu be: Iehova ena lohia siahuna maorona hamomokania bona ena ladana hahelagaia karana. Lauma dalanai mahuta karana ese ta ena roho mauri dalana, kahirakahira do ia vara, do ia hadikaia.

¹¹ Kudouna Ibounai Ida Peroveta Herevadia Abia Dae: Guna Heberu peroveta taudia be lauma helaga ese ia henidia Mesia ena peroveta herevadia edia guguru dalana idia lalodia bada. Idia ese Dirava ena ura hagugurua dalana “ena anina idia tahua goadagoada, bona ia totona idia henanadai momo.” (1 Pet. 1:​10, 11) Unai hegeregere, oi ese Apokalupo bukana lalonai idia noho peroveta herevadia oi lalodia bada neganai, lauma gaudia do oi ura henia bada. Oiemu ura lauma gaudia totona do ia bada, unai amo do oi ura “Dirava ena laloa dobu gaudia” do oi tahua. (1 Kor. 2:10) Oiemu kudouna lalonai peroveta herevadia oi abia dae bona oi ura henidia neganai, ta ese oi do ia doria lasi hebou oi lao totona; oi sibona do oi ura oi lao bona oi haere. (Luka 6:45) Bona bema ‘hereva be oiemu kudouna dekenai ia noho,’ oi do ia hasiahua ‘emu uduna dekenai oi gwauraia hedinaraia mauri oi davaria totona.’​—Roma 10:​8-10.

¹² Inai tanobada ena dokona ia mai kahirakahira neganai, ita idia hevasehalaia taudia ese ita do idia kirikirilaia badina Dirava ena peroveta herevadia ita abidadama henia dainai. (2 Pet. 3:​3, 4) To ita be peroveta hereva do ita laloa noho. Dirava ena Hereva ena lamepa ese ita ia hadibaia ita be edena nega lalonai ita noho. Ita dekenai ia hahedinaraia goevagoeva ita be inai dibura tanobadana ena nega dokona ai ita noho. Daba ena hisiu ia hedinarai vadaeni! Keriso be Basileia siahuna ai ia lohia vadaeni! Dina matamata ia hedinarai matamaia ita itaia diba. Namona be ita dekenai Dirava ese ia gwauhamatalaia tanobada matamatana be gau momokanina, Iesu ena toana ia idau mata hanai idia itaia aposetolo toi dekenai Basileia be gau momokanina hegeregerena!