Henanadai Mauana

◼ Hebou dekenai dahaka do ita abia lao?

 Wiki ta ta lalodiai kongregesen heboudia dekenai, namo idia havaraia hakaua bona hagoadaia herevadia ita abia. (Isa. 48:17; Heb. 10:​24, 25) To, unai namo ena bada be ita hegaegae namonamo eiava lasi hegeregerena do ita abia.

 Ruma bese taudia ta ta ese sibodia edia stadi bukadia bona hebou dekenai do idia gaukaralaia gaudia idia abia be namo. Unai anina be Baibel ta, ane buka ta, do umui stadilaia bukadia, noutbuk ta, bona peni eiava pensolo ta do umui abia.

 Haroro Sikuli Ena Sediual bona Haroro School ena Buka be mai anina bada, Haroro Sikuli dekenai. Unai gaudia ese ita idia durua, stiuden taudia edia hereva kwaradia ita laloa noho totona bona sikuli naria tauna ese sisiba ia henia neganai, ita itaia diba danu. Ita ta ta sibona ese unai sisiba bona heduru herevadia ita gaukaralaia diba, iseda tok bona haroro herevadia hanamoa totona.

 Hesiai Hebou dekenai, unai hua ena Iseda Basileia Gaukara pepana bona Herevalaia bukana ita mailaia be namo. Unai hebou dekenai do idia herevalaia bukadia, hegeregere haheitalai dekenai do idia gaukaralaia bukadia, oi abia lao. Elda taudia dekenai Hesiai Gaukara Karaia Totona Ita Hegaegae bukana ta ia noho be namo.

 Namona be tama sina idia gaukara goada, edia natudia be mai regerege lasi ida do idia helai noho bona kamonai namonamo totona. Sibodia edia Gima Kohorona bona buka ma haida edia kopi ta oi henia, herevana idia do duahiduahi lasi neganai danu, ese do ia hagoadadia unai gaudia idia laloa bada totona. Bema maragidia ita hadibadia iseda orea ena buka idauidau do idia laloa bada bona idia gaukaralaia, lauma dalana ai namo bada do ia havaraia hanaihanai karadia dekenai idia manada matamaia.

 Kongregesen heboudia amo ita abia moale do ia bada herea bona eda lalona do ia namo bema do ita gaukaralaia gaudia ibounai ita abia mai. (2 Tim. 3:17) Unai be ‘Dirava ena ura dalana ita dekenai do ia hadibaia, bona Lauma Helaga ena diba bona diari ita dekenai do ia henia’ dalana namo hereana.​—Kol. 1:9.