Umui be Edena Bamona Do Umui Noho?
1 Taunimanima kota henia negana be kahirakahira do ia ginidae. Baibel ese ia gwauraia “Dirava ena Dina.” Unai nega ai Dirava ena hahemaoro be kara dika taudia dekenai do ia henia; to unai be kara maoromaoro taudia hamauria negana danu. Unai nega lalonai idia mauri noho taudia iboudiai be edia mauri idia gaukaralaia dalana hegeregerena do ia kota henidia. Petero be unai ia diba dainai, ena henanadai be inai: “Umui be edena bamona do umui noho?” Ia gwau iseda ‘kara ibounai do idia helaga be namo, Dirava ita badinaia namonamo,’ bona ‘Dirava ena Dina do ita naria noho,’ to ita naria ‘mai goevagoeva, kerere lasi, bona mai maino danu.’—2 Pet. 3:11-14.
2 Kara Ibounai Idia Helaga Bona Dirava Badinaia Karana: Kara helagana ena anina be iseda kara namodia amo ita hahedinaraia Baibel ena hahegani ita matauraia. (Tito 2:7, 8) Keristani tauna ese mataganigani bona tauanina karadia do ia dadaraia.—Roma 13:11, 14.
3 ‘Dirava badinaia’ karana ena anina be “Dirava dekenai oi tabekau bona oi ura henia bada mai emu kudouna ibounai ida, badina iena kara namodia oi laloa bada.” Iena hesiai gaukara ita ura henia bada neganai, Dirava badinaia karana ita hahedinaraia momokani. Haroro gaukara ita karaia badina ia be iseda maduna dainai sibona lasi; Dirava ita lalokau henia bada dainai ita karaia. (Mar. 12:29, 30) Unai lalokau ese ita ia ha-uraia bena iseda hesiai gaukara amo ita diba Dirava badinaia karana ita karaia. Unai badinaia karana be do ita karaia hanaihanai gauna dainai, ita diba iseda haroro gaukara amo do ita laga-ani lasi danu. Unai be wiki ta ta ai do ita karaia gaukarana.—Heb. 13:15.
4 Iehova ena dina ita “naria noho” ena anina be dina ta ta ai ita laloa, ena anina ita laloa maragi lasi. Ena anina iseda mauri lalonai be Basileia gaudia do ita tahua guna.—Mat. 6:33.
5 Mai Goevagoeva, Kerere Lasi, Bona mai Maino Danu: Ita hutuma bada taudia be iseda ‘dabua ita huria vadaeni Mamoe ena Natuna ena rarana lalonai, bona idia be kurokuro bona goeva momokani.’ (Apok. 7:14) “Mai goevagoeva” ena anina be, ita gwauhamatalaia vadaeni mauri goevana be tanobada dikadia amo do ita hamiroa lasi, to do ita gimaia namonamo. Ita “kerere lasi” ena anina be Dirava dadaraia, bona tanobada ena kohu tahua goadagoada karadia do ita karaia lasi, badina iseda Keristani karadia namodia ita hadikaia garina. (Iam. 1:27; 1 Ioa. 2:15-17) Do ita hahedinaraia “maino” lalonai ita noho badina “Dirava ena maino” ita hahedinaraia ma haida ita kara henia neganai.—Fil. 4:7; Roma 12:18; 14:19.
6 Bema inai tanobada ena kara mirodia amo ita gini siri, Iehova ese ia hahemaoro henia vadaeni tanobadana ‘taudia edia kara bamona do ita karaia lasi.’ To, iseda kara namodia ese ma haida do ia durua “Dirava ena gaukara idia karaia, bona iena gaukara idia karaia lasi taudia” edia idau do idia itaia.—Roma 12:2; Mal. 3:18.
7 Hanaihanai ita abia lauma aniani namona ese iseda ura Dirava badinaia karana hahedinaraia totona ia hagoadaia. Pablisa matamata taudia momo edia ura be unai bamona danu. Idia dekenai hahenamo ta ai ita lao bema iseda August ena haroro gaukara dekenai idia ita durua.
8 “Kara namodia” ita karaia noho neganai, Iehova ena ladana do ita abia isi, kongregesen do ia goada, bona ma haida ese namo do idia davaria. (1 Pet. 2:12) Namona be hanaihanai ita be unai bamona ita noho tauna ta.