Apokalupo—Moale Korikorina Ena Ki
1 Aposetolo Ioane ena hereva Apokalupo 1:3 ai be sivarai namona ita dekenai, badina moale davaria dalana ita ia hamaorolaia. Ia gwau: “Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale.” Apokalupo—Ena Hagugurua Negana Ia Kahirakahira! bukana ese momo ia durua vadaeni moale bada herea idia davaria totona. Unai badina namona dainai ita ura ita hariharilaia.
2 Reana herevahereva hamatamaia dalana namona be inai henanadai amo:
◼ “Oi laloa Baibel bukana, Apokalupo, ita lalo-pararalaia diba, eiava oi laloa ia be hehuni herevana ta? [Haere naria.] Momo be oi laloa bamona idia laloa. Mani Baibel ena hereva Apokalupo 1:3 ai oi itaia. [Duahia.] Unai dainai ita itaia Apokalupo ita lalo-pararalaia diba, bona ena hereva ese ita ia hamoalea diba. Edena bamona?” Rau 6, paragraf 2 dekenai ia noho herevadia oi riviulaia, bena oi gwau: “Inai buka ese Apokalupo bukana ena siri ta ta iboudiai edia anina ia kikilaia. Oiemu nega do oi gaukaralaia namonamo bema oi duahia. Inai kopi oi abia diba, ena davana be K4.00 sibona.”
3 Momo be inai tanobada ai idia vara hisihisi gaudia idia lalo-hekwarahilaia noho dainai, reana inai oi tohoa:
◼ “Lau hereva henia taudia ibounai be nega vaira idia laloa noho. Tanobada ena biagua taudia idia laloa maino negana be kahirakahira do ia hamatamaia. To dahaka oi laloa? [Haere naria.] Ena be taunimanima idia hekwarahi maino havaraia totona, to dagedage bona hisihisi idia do noho bona tanobada ibounai lalonai idia bada idia lao. Baibel ia hahedinaraia unai hekwakwanai haorea gauna korikorina be dahaka. [2 Petero 3:13 duahia. Oi lao rau 302 ai ia noho laulauna dekenai, bona Dirava ena guba Basileiana be maino korikorina bona noho namona tanobada dekenai edena bamona do ia havaraia oi hahedinaraia.] Oi dekenai inai buka ese Dirava ena Basileia henunai mauri hanaihanai idia moalelaia besena tauna ta ai oi lao diba dalana do ia hahedinaraia.” Buka oi hariharilaia, davana be K4.00.
4 Bema ia bisi noho tauna ta oi davaria bona hereva kwadogina sibona oi gwauraia diba, reana oi gwau:
◼ “Lau itaia oi bisi dainai, lau ura inai pepapepa sibona, [eiava magasin] ena ladana be [pepapepa o magasin amo, herevalaia gauna namona abia hidi] Inai Tanobada Do Ia Ore Eiava? lau rakatania. Oi lau hagoadaia oi duahia. Ma nega ta lau mai neganai, lau ura emu lalohadai lau diba.”
5 Namona be mai iseda ura ida February lalonai Apokalupo—Ena Hagugurua Negana Ia Kahirakahira! bukana ita hariharilaia, bona taunimanima momo do ita durua Apokalupo ena peroveta namodia hadibalaia amo moale korikorina do idia davaria.—Aon. 3:13.