Dina Bona Hanuaboi ai Dirava Ena Hesiai Gaukara Karaia
1 Ita be hahenamo badana ta ita abia. Unai hahenamo be Iehova ena ladana ita gwauraia. Ita be Iehova ena tanobada ibounai oreana ena evanelia gaukara taudia, bona ia ese ita ia gaukaralaia Basileia harorolaia gaukara badana haorea totona! (Mar. 13:10) Nega ia kwadogi dainai, iseda haroro gaukara ita hagugurua momokani, a?
2 Ita diba lasi sivarai namona do idia abia dae taudia edia namba be hida. Iehova ese ita ia hamaoroa idia be ‘hutuma bada herea’ bona iboudiai be “dina bona hanuaboi idia ese Dirava ena hesiai gaukara idia karaia noho.” (Apok. 7:9, 15) Dirava ena hesiai gaukara idia karaia goadagoada vadaeni Witness taudia edia momo be milioni 5 ia hanaia; idia be kamonai taudia sibona lasi, bona hebou dekenai idia lao taudia sibona lasi. Idia be tanobada hegegemadai ai sivarai namona harorolaia taudia!
3 Dina iboudiai, ruma-ta-ruma-ta gaukara dekenai eiava nega bona gabu idaudia ai, Iehova hanamoa daladia idia noho. Mani oi laloa, bema dina ta ta ai, ita ta ta be tau tamona dekenai hereva momokani ita kikilaia, taunimanima momo herea do ita haroro henidia. Iehova ita laloa bada dainai, mai iseda ura ida ia do ita herevalaia.—Sal. 92:1, 2.
4 Ma Haida Ita Durua Hesiai Gaukara Idia Karaia Totona: Iehova ese iseda gaukara ena anina ia habadaia noho. (Hag. 2:7) Lagani 1995 ai, Papua New Guinea dekenai, hua ta ta ai Baibel stadi edia averes be 4,574. Iseda tahua gauna be unai stadi taudia ita durua Iesu ena hahediba taudia ai do idia lao totona. (Mat. 28:19, 20) Idia momo be hanaihanai hebou dekenai idia lao dainai idia goada idia lao. Edia turadia dekenai “Dirava ena hoa gaudia idia herevalaia” noho vadaeni. (Kara 2:11) Hari idia hegeregere, ruma-ta-ruma-ta gaukarana idia karaia matamaia, a?
5 Namona be April lalonai idia hegeregere taudia matamatadia ita boiria haroro gaukara idia karaia totona. Emu Baibel stiuden tauna ia hahedinaraia unai ia ura ia karaia, a? Bema ia ura, ia ese Baibel ena taravatu ia badinadia, a? (Hesiai Gaukara Karaia Totona Ita Hegaegae bukana, rau 97-9 itaia.) Bema ia ura haroro gaukara ia matamaia, kongregesen gunalaia tauna ida unai oi kikilaia. Ia ese elda rua do ia abia hidi unai idia tahua namonamo totona. Bema idia gwau ia hegeregere bapatiso lasi pablisa ta ai ia lao totona, ia do oi boiria haroro gaukara dekenai do umui gaukara hebou. April lalonai, haroro naria taudia bona buka stadi naria taudia ese pablisa gaukara idia hamatamaia diba taudia idia laloa bona durua be namo.
6 Reana namona be tama sina taudia ese edia natudia idia laloa danu, idia hegeregere pablisa gaukara hamatamaia totona, eiava. (Sal. 148:12, 13) Bema emui natuna ia ura Basileia gaukara ia karaia bona ena kara ia namo, kongregesen hesiai komiti ena elda ta ida umui herevalaia. Umui bona emui natuna ida idia hebou murinai, elda rua ese do idia tahua bema emui natuna ia hegeregere pablisa gaukara karaia totona, eiava. Memero kekeni be ita ida Dirava idia hanamoa neganai, ita ia hamoalea bada!
7 Iehova mo sibona ena hesiai gaukara helagana ita karaia be maoro. (Luka 4:8) Namona be iseda hahenamo ita gaukaralaia momokani bona ia ita hanamoa bada.—Sal. 109:30; 113:3.