Dina Ta Ta Ibounai Iseda Gwauhamata Ita Hagugurua
1 Salamo torea tauna Davida be mai ena ura ida Iehova dekenai ia gwau: “Lau ese ane dekenai, oiemu ladana do lau hanamoa, bona dina ta ta ibounai, egu gwauhamata gaudia oi dekenai, be do lau karaia momokani.” (Sal. 61:8) Davida ia diba gwauhamata be ta ena ura hegeregerena ai ia karaia gauna. To danu, ia diba bema gwauhamata ia karaia, namona be ia hagugurua. Ena be unai be ena maduna, Iehova ia hanamoa, badina be dala ia kehoa dina ta ta ibounai ena gwauhamata gaudia ia hagugurua diba totona.
2 Iehova dekenai iseda mauri ita gwauhamatalaia neganai, mai iseda ura ida ita gwau iena ura do ita karaia. Iseda ura ita dadaraia bona iseda mauri lalonai Iehova hesiai henia gaukarana ita atoa guna. (Luka 9:23) Unai dainai, ita danu be dina ta ta ibounai iseda gwauhamata gauna ita henia be namo. (Had. 5:4-6) Unai gwauhamata be taunimanima vairanai, ranu bapatiso amo ita hamomokania bona iseda mauri ena oromana amo ita hahedinaraia be namo, badina be “uduna dekenai ita gwauraia hedinarai, be mauri do ita davaria.” (Roma 10:10) Dala ta be sivarai namona ita harorolaia. (Heb. 13:15) Ita ta ta iseda mauri dalana be idauidau, to namona be dina ta ta ibounai ita ibounai be ma haida dekenai sivarai namona ita harorolaia gaukarana ita laloa bada.
3 Dina Ibounai Haroro Daladia Oi Tahua: Sivarai namona be ma ta dekenai oi herevalaia be moale gauna. Dina ibounai unai ita karaia totona, namona be haroro daladia ita tahua. Ekspiriens namodia momo idia moalelaia taudia be edia gaukara taudia, eiava sikuli taudia, eiava edia dekena taudia, o dina ta ta ai idia davaria taudia dekenai idia haroro. Revareva eiava telefon amo ma haida dekenai ita haroro diba danu. Unai daladia bona ruma-ta-ruma-ta haroro gaukara bona lou-henia gaukara karaia loulou karana amo, Baibel stadi karaia ena moale do ita mamia diba. Oibe, dina ta ta ibounai, namona be haroro daladia ita tahua.
4 Taihu ta be ena gaukara gabuna dekenai laga-ani negana ai Dina Iboudiai Buka Helaga Tahua bukana ia duahia. Gaukara hahine ta ia boiria ia ida ia duahia, bona daudau lasi murinai Baibel stadi ia hamatamaia. Wiki ta ta ai, dina ima lalodiai, hora ena kahana ta ai idia stadi. Gaukara tauna ta ese edia dina ta ta ai idia karaia stadi ia itaia. Gabeai ia hahedinaraia ia be manoka tadikaka ta. Taihu ena goada karana ese unai tau ia doria elda tauna ia tahua bona heduru ia abia ia goada lou totona. Unai taihu be dina ta ta ibounai ena gwauhamata ia ura ia hagugurua dainai, taunimanima rua edia mauri ia hanamoa.
5 Iehova ese ita totona ia karaia gaudia ibounai ita laloa neganai, iseda kudouna ese ita ia doria iseda gwauhamata be dina ta ta ai ita hagugurua bona unai ese ita do ia hamoalea bada. Salamo ia torea tauna bamona, do ita gwau: “Lohiabada Dirava e, lau ese oi do lau hanamoa, mai egu kudouna ibounai danu. Lau ese oiemu ladana, be do lau hanamoa bada ela bona hanaihanai.”—Sal. 86:12.