Henanadai Mauana

◼ Ta danu Diba bukana ita stadilaia ela bona edena negai?

Iehova ese ena orea hari ia hanamoa. Unai ia hamomokania gauna be lagani ta ta ai ita itaia kamonai matamata taudia tausen momo be hereva momokani idia abia dae. Ia hedinarai Diba bukana be heduru namo hereana unai ia vara totona. January 15, 1996 ena Gima Kohorona ese ia hahedinaraia unai buka idia karaia dalana be Baibel stadi tauna do ia durua lauma dalanai ia tubu haraga, reana hua haida murinai bapatiso do ia abia.

Unai dainai, unai Gima Kohorona be rau 17 dekenai ia gwau: “Tau ta be Diba bukana ai ena stadi ia haorea bona ia bapatiso murinai, reana buka iharuana . . . amo ta ese do ia stadi henia noho lasi.”

To Diba bukana ia haorea murinai ia do bapatiso lasi tauna be edena bamona? June 1996 ena Iseda Basileia Gaukara pepana, rau 6, paragraf 23 ese Gima Kohorona ena hereva, Diba bukana haorea murinai ma buka ta ita stadilaia lasi herevana, ia gwauraia lou. Unai ena anina be unai nega murinai Baibel stadi tauna durua karana ita laloa lasi, a? Lasi. Ita ura taunimanima ese hereva momokani ena hahediba hereva badadia idia diba. To, ai laloa nega kwadogi murinai, hadibaia tauna namona ese kudou maoro stiuden tauna ia durua bona iena diba do ia hegeregere ena lalona ia hadaia Iehova do ia hesiai henia. Reana badina idauidau dainai, Baibel stiuden taudia haida idia ura nega tamona lasi to nega haida pura ta ta ai do idia stadi.

Momokani, stiuden haida be reana do idia tubu haraga lasi haida bamona. To bema Diba bukana ia haorea murinai, reana unai stadi be sisina daudau ia heau vadaeni neganai, unai tau ese ena lalona ia do hadaia lasi kongregesen do ia bamoa, reana ia namo pablisa ese unai gauna Kongregesen Hesiai Komiti ena elda ta ida ia herevalaia. Bema badina namona ta ia noho, reana heduru haida ia abia noho diba. Unai be Gima Kohorona, January 15, 1996, rau 17, paragraf 11 bona 12 lalonai ia noho hakaua herevana hegeregerena.

Ena be hereva momokani sisina ia diba, to bema ia laloa bada unai ese stiuden tauna ena lalona ia veria diba Keristani heboudia dekenai ia lao. Unai amo ia hahedinaraia goevagoeva ia ura Iehova ia hesiai henia. To bema Diba bukana be sisina daudau ia stadilaia murinai unai bamona lauma gaudia laloa karana ia hedinarai lasi, reana ia namo unai stadi ita hadokoa.