“Tanikiu” Karana Hahedinaraia
1 Ita momo be ita maragi negana amo idia hadibaia “mani emu kara” bona “tanikiu” herevadia do ita gwauraia bema ta ese kara namo ia hahedinaraia neganai. Paulo ese ita ia sisiba henia namona be nega ibounai “tanikiu” karana ita hahedinaraia, bona Iehova ita tanikiu henia bada be namo. (Kol. 3:15, 16) To edena bamona ita ese tanikiu karana ita hahedinaraia iseda Havaraia Tauna Badana dekenai? Bona dahaka badina namodia dainai ia ita tanikiu henia?
2 Aposetolo Paulo ia gwau: “To Dirava ita hanamoa [“tanikiu henia,” NW]! Lohiabada Iesu Keriso ena siahu dainai Dirava ese ita ia hagoadaia, vadaeni ita kwalimu!” (1 Kor. 15:57) Lagani ta ta ena Memorial hebouna ai, Dirava bona Keriso edia lalokau bada karana ita laloa lou; idia henia boubouna dainai ita be mauri hanaihanai helarona ita abia. (Ioa. 3:16) Ita ibounai be eda lalokau tauna ta ia mase, to Dirava ita tanikiu henia badina Iesu ena toreisi lou gwauhamatana dainai! Inai tanobada ena dokona amo do ita roho mauri diba dainai iseda lalona idia moale dikadika. (Ioa. 11:25, 26) Ia auka ita ese tanikiu herevadia ita gwauraia nega vairai Iehova do ia henia hahenamodia tanobada Paradaisona lalonai ita laloa neganai. (Apok. 21:4) Unai badina namodia dainai ibounai ese Dirava idia “tanikiu henia” be namo, ani?
3 Dirava Ita Tanikiu Henia Dalana: Namona be guriguri amo iseda tanikiu herevadia be Iehova dekenai ita gwauraia. (Sal. 136:1-3) Danu, dala idauidau amo ia ita tanikiu henia diba. Hegeregere, Sunday, March 23 ai, Keriso ena mase laloatao hebouna idia karaia neganai do ita hebou danu. Mai moale ida iseda kohu be Iehova hanamoa totona ‘ita henia’, ita gaukaralaia kongregesen bona tanobada hegegemadai gaukarana durua totona. (Aon. 3:9) Elda taudia ita durua bona idia danu ita gaukara hebou, unai amo ita hahedinaraia Iehova ita laloa bada badina elda taudia amo heduru ia henia ita dekenai. (1 Tes. 5:12, 13) Dina ibounai ita gaukara goada Dirava ena ladana ia hanamoa karadia sibona ita karaia. (1 Pet. 2:12) Iehova ia moale ia ita laloa bada karadia ita hahedinaraia neganai.—1 Tes. 5:18.
4 Iseda Tanikiu Kara Namona: Mai eda lalona ibounai ida Basileia ena sivarai namona ita harorolaia, Iehova ena ladana ita hanamoa, guriguri amo ia ita laloa bada karana ita gwauraia, bona hereva momokani ita abia isi be mai eda lalona ibounai ida Havaraia Tauna ita tanikiu henia kara namodia, ita dainai ia karaia gaudia ibounai dainai. Iehova ia moale ita ia itaia iena hesiai gaukara helagana ita karaia bona unai amo iena ura ita abia isi. Iena ura be “taunimanima ibounai ese mauri do idia davaria.” (1 Tim. 2:3, 4) Unai dainai pablisa momo be February ena Iseda Basileia Gaukara pepana lalonai ia noho boiboina idia haerelaia bona heduru painia gaukarana do idia karaia March, April, bona May huadia ta, rua, eiava toiosi lalodiai. Bema goada ita henia unai hesiai gaukarana lalonai, ita ese “tanikiu” kara namona ita hahedinaraia Dirava dekenai. Do oi hegeregere ma painia haida oi bamoa April eiava May huana lalonai, a?
5 Ita be mauri hanaihanai helarona ita abia. Unai helaro ia vara momokani neganai, do ita diba momokani badina momo idia noho, Iehova be dina ibounai ita tanikiu henia totona.—Sal. 79:13.